La Corriente Collorada d’IU aconceyó en Madrid hai dos selmanes y decidió por amplia mayoría colar de la coalición. La corriente que dirixe Ángeles Maestro renuncia a intentar ganar la mayoría na prósima asamblea federal, a celebrar a finales d’añu, y da’l proyectu de la coalición por achuquináu gracies a la política de subalternidá respecto del PSOE.

Esta escisión va dar nos prósimos meses nuna nueva fuercia política, que va axuntar previsiblemente tanto a la Corriente Collorada como o otros sectores de la esquierda radical que nun participaben del proyectu d’IU. N’Asturies, ta tovía por ver la repercusión que vaiga tener esta rotura, pero too diz que va ser mínima, yá que los sectores que formaben la Corriente Collorada n’Asturies dixebráronse d’esta na anterior asamblea federal porque yá nun compartín la crítica de Maestro a los gobiernos de coalición col PSOE. Equí tolos sectores d’IU-BA tán nel gobiernu. Pa lo bono y pa lo malo, comparten el mesmu destín y naide ta dispuestu a abandonar el techu de les conseyeríes por ponese albentestate a entamar daqué dende 0. Mui coherente.

La situación ye incómoda pa unos y otros. Los resultaos electorales de 2004 debiliten a IU-BA y fortalecen al PSOE, que va actuar tovía con más prepotencia y menos respetu pol pautu de gobiernu. Eso va obligar a IU a francer o a subordinase tovía más, y como abandonar el gobiernu implicaría una rotura, por nun dicir un españíu, lo que queda ye reforciar la subalternidá respecto de la FSA y la so política, y eso a la llarga implica esaniciar el perfil d’IU-BA como proyectu estremáu y hipotecar el so espaciu electoral, pues bona parte de la so base, tanto militante como electoral, va tener ca vuelta mayores problemes pa estremar IU del PSOE, y yá se sabe que cuando dos partíos son mui asemeyaos, la xente tiende a votar al más fuerte. Asina, con esa política de subordinación y esi silenciu compliz de toles corrientes, IU lo único que fai ye retrasar lo inevitable. El PSOE va intentar imponer una reforma estatutaria de mínimos, como en 1999, pero esta vuelta IU va tar nel gobiernu y va tener que decidir qué fai. Si sal del gobiernu, va tener que redefinir una nueva estratexa con mui pocu marxe de maniobra, yá que’l procesu de reforma acabará unos meses anantes de les elecciones de 2007. Si queda, traicionando con ello –tovía más- les sos promeses electorales, el resultáu en 2007 pue ser tan malu pa ellos que veamos un gobiernu por mayoría absoluta tanto del PSOE como del PP, y ehí volverín a abrise les compuertes de les lluches intestines y les rotures con unes corrientes que, perdíu el despachu na conseyería, recuperarín la coherencia ideolóxica. Tovía nun ye la hora de la Corriente Collorada n’Asturies, nin de nenguna otra espresión de la esquierda estraparlamentaria, pero nada ye eterno. Y sábenlo.