| Esi
fo’l titular del diariu francés
L’Humanité en conociéndose
los resultaos del referéndum pel
que la mayoría de los votantes galos
refutaron el Tratáu pel que s’afitaba
una Constitución pa la UE. Depués
del resultáu de los Países
Baxos, onde la mayoría del non fo
tovía más clara, y l’anuncia
del primer ministru británicu Tony
Blair de suspender la convocatoria del referéndum
pal Reinu Uníu, ta más claro
tovía que l’intentu d’imponer
una constitución oligárquica
y antidemocrática queda, de momento,
derrotáu.
Son munches les obxeciones que se-y puen
facer al Tratáu constituyente, tanto
nes conteníos como nes formes. Nos
conteníos, básicamente que
ye un intentu de conxelar los estaos-nación
preesistentes, torgando la posibilidá
de procesos d’autodeterminación,
que nun afita un modelu social européu,
sinón que namás regula –paradóxicamente-
la desregulación del mercáu
llaboral y la obligatoriedá de privatizaciones
en sectores hasta agora consideraos estratéxicos,
que ye prácticamente irreformable,
qu’impón una fiscalidá
regresiva y desigual, qu’afita la
preeminencia de les autoridaes financieres
(BCE) sobre les polítiques, que ye
contradictoria en política esterior
y defensa, y que consagra la soberanía
de los estaos perriba de la de la ciudadanía.
Con estos conteníos, nun yera raro
que les formes fueren igual de malcurioses:
la Constitución nun fo redactada
por una comisión elexida por una
asamblea constituyente, que ye lo mínimo
obligao nun procesu asina, sinón
pola pantasmal Convención Europea
de Valery Giscard d’Estaing. Nun afitaba
un procesu de ratificación igualitariu,
como sería lo lóxico, basáu
nun referéndum convocáu a
un tiempu en tolos países de la Unión,
sinón que dexó en manes de
cada Estáu decidir si yera ratificáu
pela vía parlamentaria o en referéndum.
Asina, nueve gobiernos torgaron a los sos
ciudadanos la posibilidá de decidir
sobre una Constitución que ye fundamental
pal so futuru, y amás en nome de
la democracia. N’otros trés,
hubo referéndum, col resultáu
yá conocíu: Nel Reinu d’España
salió que sí, con una participación
del 42% (39% n’Asturies); en Francia
y Países Baxos, que non, con una
participación respectiva del 70%
y del 63%. De los 88 millones de ciudadanos
que tuvieron oportunidá de pronunciase,
lleven votando pol sí unos 26, pol
non unos 23 y absteniéndose unos
37, quedando otros 2 millones de votos blancos
o nulos. Les perspectives pa los prósimos
referéndum son ca vuelta piores pal
votu afirmativu. Los gobiernos europeos
yá nun saben per onde enfilar: nun
esperaben una derrota asina, y amás,
cola soberbia que los define, afirmaben
que nun había un plan B, pa imponer
un chantax tan inmoral como’l qu’en
1978 fexo parir l’actual Constitución
española. “Esto o el caos”,
dixo la clase política de la UE.
Y la xente de Francia y Países Baxos
prefirió el caos anantes qu’esi
albuertu.
El gobiernu español, pesie a ser
el del únicu estáu onde’l
Tratáu fo ratificáu en consulta
ciudadana, anque fuera tramposa y precipitada,
ta agora nuna situación incómoda:
pensando en ser “los primeros n’Europa”,
danse cuenta del so error: el sí
español queda tapecíu pola
alta abstención, que fadría
nulu’l resultáu na mayoría
de los países onde tán lexislaos
los referéndum, y amás contrasta
mui mal cola alta participación de
Francia y Países Baxos.
Estos resultaos han de valir pa la reflesión
de tolos actores de la política europea,
tanto ente los partidarios como ente los
contrarios a la mesma, porque:
a)
El non amuesa un divorciu claru ente la
clase política y la ciudadanía:
Tanto en Francia como nos Países
Baxos el Tratáu tenía un
apoyu masivu nel Parlamentu: más
del 90% nel primer casu y un 85% nel segundu.
La mesma ciudadanía que votó
masivamente a esos partíos nun-yos
fexo casu a la hora de votar nel referéndum.
Incluso nel casu español, l’altísima
abstención ye una bona prueba d’esi
divorciu. Convertir esi divorciu respuesta
organizada ye’l retu de los defensores
del non.
b) El non ye mayoritariamente
d’esquierdes: Por muncho que los
mass media favorables al Tratáu
intenten falar de Le Pen, la rialidá
ye que la campaña del non fo llevada
cásique n’esclusiva pola
esquierda social –sindicatos y movimientos
de base- como política –comunistes,
trotskistes, republicanos d’esquierda
y parte de los socialistes nel casu francés,
Partíu Socialista nel neerlandés-.
Le Pen fexo una campaña mínima
pol non, porque sabía que cuanta
más campaña fexera, más
emburriaba a la esquierda pal sí,
reconociendo asina que’l votu negativu
ye un votu d’esquierda, mui mayoritariu
amás nes zones tradicionalmente
más colloraes de Francia.
c) El non ye mayoría
onde hai una sociedá civil fuerte:
La victoria del non nun sería posible
ensin la movilización d’una
sociedá organizada, onde los partíos
tuvieron un papel importante pero minoritariu
énte los sindicatos y asociaciones
ciudadanes. Onde nun hai esa sociedá
civil, o eses espresiones civiles tán
col poder –como los sindicatos mayoritarios
nos casos español y asturianu-
la xente nun vota o vota lo que diz el
gobiernu. Fortalecer la sociedá
civil ye asina una xera inaplazable pa
la esquierda europea.
d) El non ye l’apueste
por otra Unión, non pola ausencia
de la mesma: Esi non popular y d’esquierdes
ye tamién un sí a otra Europa
posible, social, democrática, que
tovía nun tien un referente políticu
claru, siendo esi el gran retu que tienen
agora les esquierdes europees.
Una
cabera reflesión. Los que dende Asturies
defendimos el non tenemos que felicitanos,
pero sobre too agradecer que fueren otros
los que mos fexeron el trabayu de refugar
esti Tratáu. Fuimos a una campaña
ensin creer que yera posible la victoria,
por cumplir, y eso vióse en que la
presencia de les organizaciones que pidimos
el non fo menor de lo que la ocasión
requería. Nun mos dotamos de ferramientes
unitaries –y falo de ferramientes
unitaries riales, non de sosañes
de les mesmes- porque tampoco creíemos
en serio que fuere posible torgar el procesu.
Incluso asina, la respuesta fo mayor de
lo qu’esperábemnos, y eso debía
valinos de llección pal futuru.
El
Tratáu de la Constitución
neolliberal y antidemocrática da
les boquiaes. La esquierda ye la responsable.
Otra Europa ye posible. Celebrémoslo
|
