Ponga un muséu na so vida, paez ser la conseña. Como alternativa rexeneradora de la economía asturiana, los museos paecen ser la nueva moda. Escaecíes, o puestes na so rial espresión, les pretensiones de parques temáticos (alcordémonos del pantasmal Legendarium de L.lena), de multinacionales salvadores (Saudí Bank&Petromocho), d’actividaes pesao-estractives de gran costu ambiental (Río Narcea Gold Mine Co.) y demás ocurrencies, agora lo que toca ye poner museos de tolo “museable”: de la sidra al xurásicu, del quesu a la minería, de la gaita al camín de fierro, too ye catalogable, inventariable, susceptible de metese nuna vitrina pa que propios y foriatos esfruten d’ello.

Nun toi echando pelos museos. Paécenme una alternativa válida, especialmente pa dellos conceyos, como elementu dinamizador de la economía local. En rialidá, faen falta munchos más, y ente ellos un muséu nacional asturianu. Iniciatives como la de declarar al valle de Turón un Bien d’Interés Cultural son iniciatives mui bones y valioses, pero por sí soles de bien pocu valen. Con declaración o ensin ella, Turón va siguir teniendo poco más de 5.000 habitantes cuando hai trenta años pasaba de los 20.000 y poco más de 300 puestos de trabayu en tol valle. El respetu del padremuñu, por sí solu, nun ye abondo pa reactivar la economía local. Los mesmos que trancaron les mines ensin alternativa reactivadora, los mesmos qu’anestesiaron el valle, los mesmos qu’achuquinaron tol padremuñu industrial, quieren agora salvar la mínima parte de lo que queda y presentase como los esforzaos defensores de lo qu’estrozaron.

Amás, hai veces que más que museos lo que se pretende son momificaciones. Da la impresión que lo que se quier ye una semeya fixa d’un tiempu concretu yá periclitáu, d’una actividá inservible, d’un mundu que yá nun ye funcional. Paez que lo que ponemos nel muséu, tamos diciendo que yá nun val, que’l so tiempu yá pasó, que lo que-y queda ye ponelo tetrás de la vitrina. Pasó cola minería, quieren facelo cola siderurxa. Nun toi diciendo que nun fagan falta esos museos, pero tal paez que si se pon el muséu ye pa que quede’l recuerdu pa cuando yá nun quede minería nin siderurxa en toa Asturies.

Adulces, vamos embalsamando Asturies. Y gracies, porque lo que nun se momifica queda fecho un bardial. Y el casu ye que les actividaes más propies d’otru tiempu, les que sí son momificables, o directamente esaniciables, gocen de mui bona salú. Les actuales instituciones asturianes son un bon exemplu d’ello. L’Estatutu tamién. ¿Pa cuándo un Muséu de la Clase Política Asturiana? ¿Y otru de la Burocracia Sindical? ¿Y otru específicu pa Villa? Depués de too, la Xunta Xeneral yá ye un parque temáticu. Namás falta la montaña rusa. Ciudá Astur, dicen dellos xeógrafos. Muséu Astur, deberíemos dicir. Semeya fixa d’un tiempu enllancáu nel tiempu, fosilizáu, paráu. Otros países muévense, busquen alternatives, críen nueves ferramientes. Equí, a veles vinir. Como la esfinxe maragata.