Asistimos a la ceremonia de los hipócrites cola revelación de que Carod Rovira tuvo una reunión con ETA en cálida de secretariu xeneral d’ERC. Esprecétense los mesmos que, en cálida de miembros del gobiernu, tamién lo fexeron n’Arxelia y Suiza. Como satanizar a ERC yera mui revesoso, dada la innegable trayectoria democrática d’esi partíu, cosa que’l PP nun tien, yera necesaria una revelación d’esi calter pa cargar de ropa vieyo a los republicanos y, de pasu, al gobiernu catalán y a Zapatero y el PSOE. Si Carod s’aconceya con ETA, ye porque los apoya o porque tien un plan secretu que los incluí. Si ye asina, el PSC gobierna con terroristes o cómplices d’ellos, y polo tanto si Zapatero gobierna va facelo gracies a apoyos de la ETA. Yá dicía Goebbels qu’una mentira repetida milenta veces acababa paeciendo verdá.

El casu ye que les cuestiones verdaderamente importantes d’esti asuntu son les que nun salen nos medios adictos: ¿Por qué el CNI siguía al vicexefe del gobiernu catalán? ¿Por qué, si tanto sabín de la reunión, nun detuvieron a los miembros d’ETA que participaron nella? ¿Por qué se-y pasó esa información al diariu ABC? Nun ye la primer vez que s’usen los servicios secretos pa ponelos al serviciu del gobiernu de turnu. Pasó col PSOE y pasa col PP. Lo importante nun ye la “llucha antiterrorista” sinón l’aprovechamientu políticu de la violencia pa sacar porgüeyu electoral. Esti ye un episodiu más. El PSOE, tan cobarde como siempre, fáise l’inocente y intenta nun salise del discursu oficial.

Y hai que salise d’esi discursu. Col PP nun hai concesión posible. D’ehí el xestu de Carod: abandonar el gobiernu pa que nun se centren los ataques nel tripartitu y encabezar la llista electoral d’ERC al Congresu por Barcelona. Un actu de valentía y honestidá que mui pocos cabezaleros políticos s’atreverín a facer. ¿Son ustedes quién a imaxinar a un dirixente asturianu faciendo lo mesmo?