Paez raro que la Coalición Europa de los Pueblos escueya como escenariu pa presentase en sociedá la ciudá de San Sebastián, cola intención espresa de remembrar aquel pautu firmáu n’agostu de 1930 pa traer la II República Española. Nun resulta raro nel casu d’ERC, pero sí nel de los demás socios, poles connotaciones y conteníos qu’esi pautu tuvo na vida política española de los años siguientes.

En 1930, cola llamada dictablanda del xeneral Berenguer intentando improvisar un marcu políticu que permitiere una transición ordenada del réxime autoritariu de Primo de Rivera a una oligocracia lliberal-conservadora como la fixada pola Constitución de 1876, los partíos de la oposición republicana entamaron contactos pa llegar a un alcuerdu que permitiere un cambiu de réxime n’España. El 17 d’agostu d’esi añu aconceyaben en San Sebastián Alejandro Lerroux y Manuel Azaña, pola Alianza Republicana; Marcelino Domingo, Alvaro de Albornoz y Angel Galarza, pol Partido Republicano Radical Socialista; Niceto Alcalá Zamora y Miguel Maura, pola Derecha Liberal Republicana; Manuel Carrasco Formiguera, pola Acció Catalana; Matías Mallol Bosch, pola Acció Republicana de Catalunya; Jaume Ayguadé, por Estat Catalá, y Santiago Casares Quiroga, pola Federación Republicana Gallega, que suscribieron un documentu nel que se comprometín a actuar conxuntamente pa baltar la monarquía borbónica, instaurar la II República n’España y concede-y l’autonomía a Cataluña. L’alcuerdu final yera’l resultáu d’un prealcuerdu algamáu el 14 de mayu, y la escenificación d’agostu féxose pa incluyir nel pautu a les organizaciones republicanes catalanes –que meses depués axuntarínse pa fundar ERC- a cambiu de la promesa d’autonomía. Fo, en definitiva, un pautu de los republicanos españoles colos catalanes, onde l’únicu compromisu cola rialidá plurinacional del Estáu fo’l reconocimientu del derechu de Cataluña a l’autonomía, siempre dientro de les llendes del estáu unitariu y con un Estatutu que debía ser aprobáu poles Cortes españoles. Quedaron fuera del pautu el Partíu Republicanu Federal, más a la esquierda que los anteriores, defensor del pautu llibre ente les partes constituyentes del Estáu –y defensores asina del principiu d’autodeterminación de tolos pueblos hispanos-, el PSOE –ún de los sos cabezaleros, Indalecio Prieto, namás asistió a títulu individual por nun cuntar col preste del partíu-, la CNT –que daquella yera la principal fuercia sindical española- y el PCE.

Fo esi un pautu bilateral ente la gran mayoría del republicanismu estatalista y el catalanista, precedente del modelu asimétricu que trunfaría munchos años depués cola Constitución de 1978. ERC pue recordalu con ciñu, porque, por munches llendes que tuviera l’autonomía pautada, yera un avance pal procesu catalán. Pa les demás naciones del Estáu, en tanto que naciones, de bien poco valió, yá que nin siquiera contemplaba la posibilidá de sumase al procesu catalán. Por eso resulta raro que lu firme hasta Eusko Alkartasuna, partíu anfitrión nuna Vasconia que nin siquier apaez mentada nel famosu pautu. Quién diba dicinos que diben ser les esquierdes nacionalistes –o parte d’elles- les que remembraren l’alcuerdu qu’ayudó a parir la II República Española.