“Cola Universidá nun se xuega. Les pites al corral”, dicen los cartelos que sacaron los partidarios de Juan Vázquez nes elecciones a rector y que, a un tiempo, dicen defender la normalización llingüistica na Universidá. Con ello pretendín decir que yá valió, que lo de La Pita como broma nun taba mal, pero por Dios, que nun se-y ocurriera al electoráu face-y casu y nun votar pol candidatu “progresista”.

La rialidá ye la que ye. Vázquez ye un enemigu declaráu de la llingua asturiana. Non un indiferente o un roceanu, sinón un enemigu declaráu, que nun facía la menor mención a la cuestión llingüistica nel so programa, lo que diz muncho de la capacidá de presión de los sectores presuntamente favorables a la llingua que pidieron el votu pa él, o del nulu compromiso, a la hora de la verdá, d’esos sectores pa cola causa de la normalización y dignificación del nuestru idioma. De fechu, la única ocasión en qu’estos sectores usaron la llingua fo pa metese… cola Pita.

¿Por qué Vázquez ye más “progresista” que Gotor, aparte de porque lo diz él? En política va cuantayá que los discursos nun son nada si nun vienen acompañaos de fechos que-y dean credibilidá. La política de Vázquez ye privatizadora y tecnocrática, pero como diz ser “progresista”, la obligación de tola esquierda universitaria ye votalu pa que nun gane Gotor, igual de privatizador y tecnocráticu, pero que ye “conservador”. La Xunta Moza propón un decálogo pa la normalización llingüistica, y gracies a la campaña inteligente de La Pita, Gotor, que yá propunxere nel so programa apocaes midides de normalizadotes, acéptalu. Podrá ser por oportunismo, pero féxolo, sabiendo qu’esa medida costába-y dalgún votu de la caverna, lo qu’indica que nel so cálculu pesó más ceder énte l’asturianismu qu’énte l’antiasturianismu. Vázquez, por contra, nun quixo nin aconceyase cola Xunta. Mui “progresista”.

¿Por qué la cuestión llingüistica ye daqué prescindible pa munchos sectores de la esquierda a la hora d’elixir votu? ¿Por qué munchos sectores nun se ven na obligación de facer concesiones pa ganar ensin votu? Ente otres coses, pola falta d’una esquierda asturianista con fuercia abondo pa condicionar el resultáu. Pasó nes elecciones autonómiques de 2003, colos pautos poselectorales y coles elecciones de 2004. Nesi tipu d’elecciones, evidentemente, son manches coses aparte de la llingua asturiana, les que tán en xuegu. Nes elecciones a rector, vista la trayectoria, práctica y programa de los candidatos, asina como’l marxe d’actuación, la cuestión llingüistica tien que tener un pesu determinante a la hora d’escoyer el votu. Eso entendiólo Gotor, pero non Vázquez nin los que lu apoyaron pesie a la so actitú faltosa. Pero pa esos sectores la burlla permanente hacia la llingua nun ye razón abonda pa nega-y el sofitu. ¿Y si Vázquez llega a defender nel so programa que les muyeres nun pudieren facer estudios de tercer ciclu? ¿Nun sería razón abondo pa nega-y la etiqueta de “progresista” ¿Por qué unos derechos sí y otros non?