Llibertá, Igualdá y Fraternidá, ye la triloxía de valores masónicos que los revolucionarios franceses de 1789 tomaron emprestada pa convertila nel glayíu de guerra del pensamientu democráticu republicanu. A lo llargo del sieglu XIX, la burguesía lliberal acabó garrando’l poder na mayor parte del continente européu y procedió a executar la so particular versión de la triloxía revolucionaria: la llibertá concretóse en llibertá d’espresión, d’imprenta, de manifestación, de compraventa, y depués de muncho lluchar, d’asociación. La igualdá convirtióse n’igualdá delantre la llei, enterrando la desigualdá xurídica consagrada pola sociedá estamental, y col tiempu nel derechu a votu pa tola ciudadanía, independientemente de la so riqueza, raza, relixón o xéneru. La fraternidá convirtióse nun vagu discursu patrioteru afitáu na llealtá al Estáu-nación de turnu y, col puxu del movimientu obreru del sieglu XX, nel llamáu wellfare state o estáu social, basáu nuna política de servicios públicos sufragaos pola fiscalidá progresiva col envís de garantizar unes condiciones de vida mínimes pa tola población.

La esquierda occidental aceptó depués de la II guerra mundial una versión rebaxada de la triloxía republicana a cambiu de mayores cotes de bienestar social. Aceptó un estáu lliberal-sufraguista reconociendo’l calter sacrosantu de la propiedá privada de los medios de producción, arrenunciando a llevantar una “sociedá republicana de productores llibres y iguales”, que dixera Marx. Aceptó renunciar al poder políticu por más poder de compra pa la clase obrera. Aceptó renunciar a la propiedá de los medios de producción pol accesu a la propiedá de más medios de consumu. Per cuarenta años, la cosa paez que furruló, polo menos n’Europa occidental, yá que yera necesario recrear unes condiciones de vida amañoses pa la mayoría social pa torgar les tentaciones d’esperimentos colectivistes más radicales, como los qu’había al otru llau de la muria de Berlín.

Baltada la muria y esaniciáu l’enemigu, al lliberalismu trunfante abúlta-y mui caru esi estáu social que, mal que bien, representaba la concreción rebaxada de la triloxía republicana. Asina, procede na década de los ’90 al so asaltu, con lleis restrictives de les llibertaes individuales, en nome de la seguridá y de la llucha escontra’l terrorismu; col afondamientu de les desigualdaes sociales, que xeneren una evidente desigualdá énte la llei; cola privatización de los servicios públicos, o la so voladura controlada, en nome de la eficacia empresarial y la llucha escontra l’abusu. Tenemos asina una sociedá menos llibre, menos igualitaria, menos solidaria. ¿Qué fai la esquierda énte eso? ¿Recrear un modelu keynesianu ensin les condiciones amañoses pa ello? ¿Travestise en derecha mazcarada de nueva esquierda? ¿Recurrir al slogan facilón y abellugase nos clásicos como quien lo fai nes sagraes escritures? La llucha pola defensa del mediu ambiente, pola normalización llingüística, pola igualdá de xéneru, pola renta básica, pol derechu de los pueblos a disponer de sí mesmos, pola economía cooperativa, significa güei l’actualización d’esa vieya triloxía republicana que sigue siendo la base sobre la que llevantar una alternativa creíble al modelu neolliberal.