Bien ye cierto qu’unes elecciones europees nun son estrapolables, que l’altísima abstención distorsiona los resultaos, que’l comportamientu electoral varía d’una elección a otra en función del tipu de convocatoria, too eso ye verdá, pero si los resultaos, en cuenta de ser pa la esquierda lo malos que son, foren bonos, de xuru que la llectura diba ser distinta. Nun se trata de facer sangre (yá fexo abonda l’electoráu) pero sí de facer delles reflesiones:

1ª. Nes elecciones europees el votu ye más ideolóxicu que “pragmáticu” y por eso siempre saquen más votos les opciones minoritaries y/o con plantegamientos más radicales: xube la esquierda radical, la ultradrecha, los nacionalismos subestatales, les opciones populistas, les de centru lliberal tradicionalmente arrequexaes ente’l bipartidismo… Too eso siguió pasando na Unión Europea, en tolos países menos nel Reinu d’España, que ye l’únicu estáu onde’l bipartidismu sal reforciáu. N’Asturies, esi datu rescampla con especial fuercia.

2ª. El PSOE y el PP saquen n’Asturies cásique un 90% del votu popular, nunes elecciones onde la presencia asturiana neses candidaturas yera anecdótica, y onde se votó más en clave de política estatal qu’otra cosa, como si la UE, los fondos de cohesión o la Constitución europea nun tuvieren un ris que ver con Asturies.

3ª. Hai que dir a 1933 pa ver al PCE –o al so sucesor, IU- sacando un porcentax tan baxu n’Asturies. IU federal tien hemorraxes per toles ferides, y por manches transfusiones que-y fagan (¿Quién?) la cosa tien mala igua. N’Asturies, IU-BA ta entubáu por un pautu de gobiernu col PSOE que permite caltener la situación, por dura que seya.

4ª. Más p’abaxo, el desastre. Les opciones asturianistes que se presentaben –PAS y AA- saquen resultaos llaceriosos nel primer casu y mui probetayos nel segundu, anque toos dos cuntaron col sofitu de les coaliciones nes que se presentaben, que –tamién- sacaron unos resultaos probes.

Estes elecciones foron les últimes –salvo xenerales anticipaes- d’equí a 2007. Poro, son la cabera semeya fixa anantes de la prósima cita electoral. Por eso yera importante un bon resultáu. Que seya malu nun ye catastrófico, pero val pa debilitar o fortalecer les postures polítiques de ca ún. Les fuercies que defende o dicen defender la oficialidá y una reforma estatutaria de másimos son agora más febles qu’hai una selmana, y eso ye malo.

Too esto debería valir pa facer una necesaria y imprescindible reflesión nel conxuntu de la esquierda y l’asturianismu –tuviera presente nestes elecciones o non- y debería sirvir pa refugar del sectarismu o la prepotencia, anque ye bien revesoso que pase eso. Sigue siendo más cómodo consolase con que los resultaos del otru seyan piores que ponese a reflesionar en serio sobre qué tamos faciendo mal. El 13 de xunu yá pasó. Queden per delantre trés años de debate sobre la reforma estatutaria, ocasión perimportante pa poner l’axenda asturianista enriba la mesa. ¿Serémos quién a dir toos na mesma dirección?