Ente les munches noticies que marcaron la política asturiana d’unos díis p’acá, destaca con fuercia, poles sos connotaciones económiques, étiques y estétiques, la decisión unánime de los tres grupos parlamentarios de la Xunta Xeneral, de mercar cuatro coches oficiales, ún pa la presidenta de la cámara, y otru pa ca ún de los tres grupos. La noticia nun tendría en sí mayor importancia de nun ser porque na operación gastáronse 288.000 euros, esto ye, 72.000 euros por coche, (12 millones de pesetes). Actuaciones como esta son les que, con tola razón del mundu, predisponen a la xente contra la política, porque dan a entender que, a la hora de la verdá, tolos dirixentes son igual de fartones, de caprichosos y de miserables. Nesti casu, ye la pura verdá.

Asturies pasa anguaño per una crisis financiera pergrave, gracies al brillante modelu de financiación que pautaron los qu’agora mos gobiernen en Madrid y n’Uviéu. Na sanidá, la situación ye tan dramática que los trabayadores del ERA lleven tres meses ensin cobrar. Que nesi contestu los líderes parlamentarios se dediquen a marafundiar les perres en coches de 12 millones ye un actu d’inmoralidá tala que clama al cielu. Que nun se diga qu’eso ye demagoxa, porque con esos 48 millones nun se ye a pagar el furacu financieru d’Asturies. Cierto, nun se pue, pero cuando s’aprueba’l déficit 0 y s’impón moderación o conxelación salarial, los gastos de nuevu ricu coles perres de tola ciudadanía son inalmisibles. Incluso anque Asturies tuviera, que nun tien, una prosperidá económica descomanada, nun hai nenguna necesidá de gastos estravagantes d’esi calter, qu’amás tienen un fuerte costu políticu, sobre too pa la esquierda.

Que la derecha lo faga entra dientro de lo normal, porque partimos de que pola procedencia social de los sos líderes y polos intereses que defende, la estética patricia, incluso a costa del paganu de los impuestos, ye la norma. Pero que lo faga la presunta esquierda ye muncho más grave, anque’l PSOE yá mos tenga avezaos a esi tipu d’actuaciones de plebeyu veníu a más. Va cuantayá que nesi partíu nun queden cabezaleros del altor moral de la socialdemocracia clásica, como Per Albin Hansson, que morrió d’un ataque cardíacu nel mesmu tranvía que tolos díis lu llevaba a casa dende’l so trabayu como primer ministru del Reinu de Suecia. Pero que lo faga IU ye tovía más inalmisible, porque ye una organización que, pretendiendo ser alternativa al turnismu PP-PSOE, reproduz los mesmos esquemes de comportamientu. Preséntense a les elecciones col slogan “Vamos recuperar la to ilusión. Palabra”. ¿Cómo van facelo? ¿Mintiendo y engañando igual que los demás, como fixeron col pautu de gobiernu? ¿O gastando les nuestres perres en caprichos más propios de Bokassa que d’un dirixente obreru? Los cuatro diputaos d’IU-BA compórtense asina, sigún los casos, como los señoritos con petites revolucionarios que siempre fueron, o como los nuevos ricos horteres que siempre quixo ser. Llamentable.