| Lleo
y plasmo cola la tribuna d’Avelino
Alonso titulada «Los mansos»,
en LA NUEVA ESPAÑA, onde l’autor
amuesa la so estrañeza énte
la esistencia de la esquierda federalista.
Pelo que se ve, pal sorprendíu Alonso
la esquierda siempre fo xacobina, y agora,
por xenial descubrimientu de Gaspar Llamazares,
resulta que nun lo ye, sinón que
ye federalista.
En rialidad, más
sorprendíu quedó quien esto
escribe siendo Avelino Alonso director d’un
Atenéu -el de La Calzada- nuna ciudad,
Xixón, de fonda tradición
federalista. Y ye que, anque dellos nun
quieran darse cuenta o fagan que nun se
dan, la primera esquierda qu’hubo
n’Asturies -y n’España-
foi la federal, nacida como reacción
democrática al centralismu y al elitismu
lliberal. Republicanos federales foron los
que gobernaron en Xixón, Asturies
y España cuando la brevísima
I República. Foron el primer partíu
de la esquierda asturiana nel postrer cuartu
del sieglu XIX y una fuercia curiosa nel
primer tercio del XX. Foron los primeros
n’organizar a los obreros como talos
(¿nun abulta llamativo que’l
director d’un atenéu xixonés
ignore que la decana de les instituciones
culturales de la ciudá, l’Atenéu
Obreru, fuera fundáu polos federales?).
Fueron los únicos, xunta los socialistes,
n’oponese a la inxusta y llaceriosa
guerra de Cuba. Fueron los primeros en vindicar
na nuestra tierra la Comuna de París
(revolución obrera... y federalista).
El federalismu como modelu
políticu nun sólo fo bandera
de los republicanos federales, sinón
que fo imitáu en mayor o menor midida
por bona parte de les restantes esquierdas
asturianes. Asina, a lo cabero del sieglu
XIX les esquierdes tradicionalmente centralistes
sumábense a la iniciativa federalista
de redactar una Constitución asturiana
abiertamente federalizante, qu’incluyía,
aparte de la plena soberanía fiscal
(ríase usté del Estatut),
la entrega a les asociaciones obreres de
les tierras incultes y les mines. ¿Serín
unos lliberal-conservadores mazcaraos? El
PSOE pasó a partir de 1918 a defender
-ensin muchu aquel, eso sí- un modelo
federal. Lo mesmo fadría’l
PCE depués de la so fundación,
inspiráu nel modelu soviéticu
(¿O nun mos alcordamos de que la
URSS yera una federación de repúbliques?).
En 1919 el Conceyu de Mieres, a iniciativa
del so alcalde, l’históricu
socialista Manuel Llaneza, ellaboraba unes
«Bases pa l’autonomía
d‘Asturies» de claru conteníu
federalizante, incluyendo otra vuelta la
soberanía fiscal (quién lo
diría, viendo la actual FSA). En
1931, cuando se proclama la II República,
la bandera que cimbla na casa conceyu de
Xixón ye... la republicana federal
(de cinco colores y non de trés,
como la que sería bandera oficial),
y once conceyales de la nueva Corporación
yeren republicanos federales. Esi mesmu
año saldrín elexíos
por Asturies trés diputados federalistes,
ún pola Conxunción Republicano-
Socialista y otros dos na candidatura d’esquierda
radical de federales y sindicalistes agrarios,
que cuntó col sofitu de la CNT. Ente
esos diputaos electos taba Eduardo Barriobero,
abogáu, cenetista y presidente del
Partíu Republicanu Federal dende
1936 hasta’l so fusilamientu poles
tropes franquistes en Barcelona, en 1939.
Pa rematar, l’alcalde de Xixón
cuando la guerra civil sería Avelino
González Mallada, de CNT y federalista,
caña llibertaria. ¿Serín
toos ellos reaccionarios?
Preste o non, las esquierdes
asturianes del sieglu XIX y bona parte del
XX fueron federalistes, porque asociaben
la federación cola democracia, col
poder d’abaxo p’arriba, cola
participación popular. ¿Será
eso reaccionario? ¿Serálo
talantar qu’un Estáu debe esistir
pola llibre unión de los sos habitantes?
Cuando morrió Franco, tola esquierda,
dende’l el PSOE a la más radical,
reivindicaba la República federal.
Depués, como otres tantes promeses,
contentóse con esti unitarismu descentralizáu
que consagra la Constitución de 1978
y que ye fonte d’agravios y discriminaciones.
Asociar centralismu con solidariedá
ye absurdo: el franquismu yera centralismu
n’estáu puro y yera fonte de
fondes discriminaciones y desequilibrios
sociales y territoriales.
Paez qu’anguaño
vuelve a tar de moda’l federalismu.
Hasta’l presidente Areces diz que
lo ye, anque la so práctica desmienta
radicalmente esa afirmación, como
tantes otres. Lo mesmo pasa col restu de
la esquierda plural que mos gobierna, que
dexa pa prau el federalismu cuando ta en
xuegu ocupar un par de conseyeríes.
Sicasí, la mesma necesidá
de vestise cola ropa federal apurre una
idea de que nun ye una idea ni esótica
ni pasaxera na tradición d’esquierda.
Ye lexítimo presentase
como d’esquierdes (selo ye otru cantar)
y defender el centralismu (incorrectamente
entendíu como sinónimu de
xacobinismu), pero ye absurdo presentar
eso como la única forma posible de
ser d’esquierdes: básicamente,
porque implica desterrar d’esi conceptu
a la inmensa mayoría de les esquierdes
que nesti país foron. Los qu’anguaño
siguimos siendo, ente otres coses, siguidores
de Pi y Margall sabemos que nun tamos inventando
nada, sinón únicamente actualizando
lo que la primera esquierda asturiana tuvo
la chapeta de ser: federalista.
Faustino Zapico Álvarez
es historiador y miembro de la dirección
nacional de Izquierda Asturiana (IAS).
Artículu
publicáu en La Nueva España
el 24 de xineru de 2006
|
