L’otru domingu axuntáronse en Madrid cientos de miles de persones pa torgar l’aprobación del proyectu de llei qu’iguala les pareyes homosexuales coles heterosexuales. Rara manifestación, que nun se fai pa pidir el reconocimientu d’un derechu, sinón pa desixir que nun-y lu reconozan a otros. Cola demagoxa tan propia d’ella, la derecha católica diz que reconocer la igualdá llegal a les pareyes homosexuales implica discriminar a les heterosexuales y atacar a la familia. Nótase que’l PSOE nun tien mayoría absoluta y que los sos socios nun lu dexen recular. En tou casu, esta manifestación –igual que les otres dos entamaes pola derecha nes selmanes anteriores pol archivu de Salamanca y la presunta negociación con ETA- amuesen el cinismu y la zorramplonería tanto del gobiernu como de la oposición.

La manifestación “en defensa de la familia” buscaba dos coses: una, torgar el matrimoniu homosexual y impone-y al conxuntu de la sociedá valores relixosos; y dos, pidir más perres. La primera ye evidente: llegalizar el matrimoniu civil ente dos homes o dos muyeres nun va a la escontra de naide, yá que, evidentemente, nun ye obligatorio. La Ilesia Católica tien tol derechu del mundu a nun reconocer esos matrimonios y negase a celebralos, como tamién se niega a reconocer el divorciu, yá qu’eses postures son coherentes dafechu col so dogma. Los católicos y católiques nun deben divorciase, nin casase o tener relaciones sexuales con persones del mesmu sexu, y sería ridículo, y inaceptable, que l’Estáu quixera obligalos, o que los partíos políticos dixeren a la Ilesia cómo tien de ser el so dogma –como la incalificable carta que Llamazares escribió va años a Rouco Varela riñéndolu pola suspensión a un sacerdote católicu que declararara públicamente que yera gay y nun respetaba’l votu de castidá-. Pero nun ye’l casu. Lo que se da ye xusto lo contrario: la mayoría parlamentaria pretende reconocer el derechu al matrimoniu civil a gays y lesbianes, y faciéndolo, nun torga a los católicos de siguir calteniendo la so doctrina, pero la xerarquía católica pretende dici-y al conxuntu de la sociedá, católica o non, lo que ye y lo que tien de ser el matrimoniu, y eso ye inaceptable.

Pero na manifestación, aparte d’esprecetase pol matrimoniu gay, denunciáronse más coses: los convocantes acusen al gobiernu de nun respetar el derechu de los proxenitores a la educación de los fíos porque, sigún ellos, nun dan perres abondes a les escueles concertaes. Esto yá ye de traca. Les ordes (xesuites, dominicos, clarises) y organizaciones relixoses (Opus Dei, Regnum Christi) quieren siguir faciendo caxa coles perres publiques, abriendo escueles pagaes pol gobiernu pa siguir dando una educación confesional: esi ye’l negociu de les concertaes. ¿Qué pensaríemos d’un empresariu fabricante de zapatos qu’abriera una empresa y pretendiera que l’alministración-y pagara la nómina de los trabayadores y financiara toles meyores nel negociu, y qu’acusara al gobiernu de tar a la escontra de la llibre empresa de nun facelo? Esto ye lo mesmo. La Ilesia sigue pretendiendo que’l conxuntu de la sociedá financie la so actividá, y acusa a quien nun lo acepta d’atacar la llibertá relixosa. Vivir pa ver.

En toa esta historia hai daqué sorprendente: que’l PSOE, un partíu mui valiente a la hora d’enfrentase a la esquierda pero mui cobarde a la hora d’enfrentase a la derecha, aguante. Nótase que necesita de terceros pa garantizar la mayoría parlamentaria. Pero hai más. El PSOE, como la mayoría de la exsocialdemocracia europea, abandonaes yá les banderes de la xusticia social y la redistribución de la riqueza, aplicando un modelu económicu cagáu y pintáu al de la derecha clásica, necesita nueves banderes –o más bien, sacar otra vuelta del baúl delles vieyes- pa que la opinión pública podia siguir estremando ente derecha y “esquierda” a la hora de votar. Eses banderes son el laicismu y un ciertu reformismu democratizante. Tony Blair ye tan lliberal como los torys británicos, pero caltuvo una traza reformista al llegar a un alcuerdu políticu nel conflictu irlandés, concede-y l’autonomía a Gales y Escocia y intentar –anque quedare pa prau- reformar la Cámara de los Lores. Depués apostó pola guerra imperial y la mázcara reformista cayó dexando albentestate’l continuismu. Rodríguez Zapatero, almirador inconfesu de Blair dende anantes de ser secretariu xeneral del PSOE –la so corriente llamábase, mui significativamente, Nueva Vía- intenta facer daqué asemeyao col laicismu y les reformes autonómica y constitucional, emburriáu amás por ERC y IU-ICV, pero caltién la política económica lliberal con Solbes. El matrimoniu gay permite apaecer al gobiernu como reformista y valiente a la hora de llevantar un estáu laicu, pero sigue presente la relixón na escuela pública pagada con fondos igualmente públicos y los conciertos coles escueles privaes, coses toes elles mui poco laiques y qu’amás van na llinia privatizadora de los servicios públicos que defenden los lliberales. Y ehí naide gorguta, incluyendo n’Asturies, onde’l gobiernu de la “esquierda plural” sigue financiando los negocios privaos de les escueles concertaes con perres públiques. No fondero, tamos asistiendo a una gran comedia: la esquierda oficial asume’l papel de cocu quemaconventos porque sabe qu’eso présta-y a bona parte de la so parroquia y la derecha, el PP, asume el d’home del sacu (sobre too pa llenalu de perres públiques) clerical pola mesma razón. Nin el PSOE va acabar colos conciertos o sacar la relixón de la escuela, o llegalizar dafechu l’albuertu (otra promesa reformista arrequexada), nin el PP va asumir la oxeción de conciencia nel matrimoniu gay o prohibir dafechu l’albuertu (que sería lo más coherente cola so postura y nun fexeron cuando gobernaron). Pero sirve pa estremase del contrariu. Ye útil.

La cabera conclusión de tou esti debate vese en cómo la clase política asume como-y da la gana’l conceptu de “demanda social”. El PSOE quier llegalizar el matrimoniu homosexual basándose nesa presunta demanda social. Como muncho, esos matrimonios nun van pasar d’unes poques decenes de miles. Pal PP, esa demanda nun esiste. El lobby gay tien pesu abondu nel PSOE, y fo quien a sacar p’alantre la so propuesta. L’albuertu llibre tamién ye una demanda social –pal PP inesistente-, pero’l PSOE decidió arrequexala pa esta lexislatura –con esto yá cumplen la cuota reformista-. La oficialidá del asturianu tamién ye una demanda social, pero nun hai capacidá de presión política pa sacala p’alantre. Ye más, l’únicu movimientu social n’Asturies dende la transición con capacidá de movilización permanente y curiosa, sacante los sindicatos y movilizaciones puntuales –como les campañes a la escontra la guerra imperial de turnu- ye’l de vindicación llingüística. Los gays y lesbianes votaron mayoritariamente al PSOE, y cumplió. Si nun cumpliera, podrín votar a IU, pero non al PP, que nun-yos fai casu. Los defensores del albuertu tán igual. Los defensores de la oficialidá nun tienen esa opción. Cuando lo fexeron, votando en bona parte a IU, vieron les sos esperances traicionaes. Los partíos que defenden en serio la oficialidá –ente otres coses- son (somos) tovía mui minoritarios. Fortalecelos ye una xera inaplazable.

Hai qu’avanzar hacia un Estáu laicu, evidentemente, y esos avances lleven aparcaos un cuartu de sieglu precisamente pola cobardía de la esquierda oficial. Ye bono qu vengan agora, por mínimos que seyan, pero los árboles tienen que dexanos ver la biesca. Hai que dir contra un Estáu aconfesional, neutral en materia relixosa. Pero’l laicismu ye daqué más. ¿Pa cuándo un Estáu laicu no nacional? ¿Pa cuándo un Estáu que reconoza n’igualdá efectiva toles llingües y identidaes nacionales qu’esisten nelli? La respuesta ta clara: cuando se tenga fuercia abonda pa ello.