A cualesquier observador mínimamente atentu y oxetivu de la realidá asturiana nun-y queda otro qu’escandalizase énte’l voluptuosu baille de trapaceros que ta siendo esta primer fase del debate sobre la reforma estatutaria asturiana. Tolos cabezaleros de los partíos parlamentarios dicen agora exactamente lo contrario de lo que dixeron o firmaron hai un añu, trés meses o dos selmanes. Ún de los casos más escandalosos ye’l del PP, que pasó de negase dafechu a falar de cualesquier tipu de reforma, acusando de peligrosu asturchale a quien s’atreviere a contradicilos, a defender una reforma de máximos y puxando pa la equiparación competencial con Cataluña y Vasconia. Pero los sarapicos autonomistes ye lo que tienen, que son eso, sarapicos, y el Doctor Madrid cortólu dafechu diciendo-y a Ovidio Sánchez que fixere’l favor de nun abrir tanto la boca. Nun va ser esti l’últimu exemplu de conversión y re-conversión en cuestión de selmanes, yá que según se vaiga acelerando’l ritmu del debate vamos asistir a xiros tovía más escandalosos.

Metanto, los sectores que defendemos otru modelu d’Asturies, con toles contradicciones qu’ello conlleva, tenemos que ser quién a trabayar nuna doble dirección: d’un llau, popularizar la idea de qu’esti modelu que tenemos dende l’aniciu de la Restauración nun ye nin l’únicu de los posibles nin el meyor de los esistentes, y que ye posible y necesario plantegar otra Asturies espeyada nun marcu políticu cualitativamente estremáu del esistente anguaño. D’otru, partir de la realidá de pura aritmética parlamentaria, que diz que la reforma que vien (non la que queremos, sinón la que vien) namás va tirar p’alantre si la voten el PSOE y el PP. Esto ye, que namás van incluyise na reforma aquellos aspectos que’l PSOE y el PP quieran, y aquellos que nun-yos quede otru remediu meter porque entiendan que tienen un costu electoral claru. Pero pa que tenga un costu electoral, esto ye, qu’oponese a ciertes coses quite votos, tien qu’haber daqué o daquién que quite esos votos. L’asturianismu políticu ta como ta, y nun ta en condiciones de disputa-y l’espaciu electoral a curtiu plazu a les fuercies sucursalistes. Tando asina les coses, el llabor de llucha por una reforma de máximos tien que tar lideráu pol asturianismu social.

Y nesi llabor de llucha, la reivindicación de la oficialidá tien de xugar un papel cimeru. Nun se trata de que nun heba otres reivindicaciones qu’incluyir, sinón de que la oficialidá ye la más importante, porque la urxencia de la so aprobación ye evidente, pa ser quien a entamar la necesaria normalización, porque’l so reconocimientu dexa abierta la puerta a posibles reformes posteriores pa incluyir lo que nun podamos incluyir d’esta, y porque’l reconocimientu espresu de los derechos llingüísticos nun pué quedar como un puntu más d’una tabla reivindicativa que negociar pa que depués quede pel camín a cambiu de concesiones n’otros ámbitos. Nun ye cuestión del too o la nada, sinón de daqué pa siguir avanzando o la nada. A ver si somos quien.