Que la muyer del César non solo nun tien que ser honrada, sinón tamién paecelo, ye una obviedá que lleva munchu tiempu diciéndose. Tan importante ye uno como lo otro, pero los diputaos de la Xunta paecen nun decatase d’ello. Depués de la barbaridá de los coches d’once millones pa los grupos parlamentarios, gastu inxustificáu y especialmente inmoral nun momentu de crisis financiera del Principáu, y col qu’amosaron que mui honraos nun son, pretenden agora paecelo reculando na compra d’un ordenador portátil por diputáu, gastu que nesti casu sí ye razonable y necesariu, yá qu’un bon portátil ye una ferramienta de trabayu parlamentariu pero un coche de nuevu ricu non. Nel casu de los coches, pudo más el petite hortera que la virtú. Nel de los ordenadores, primó un falsu pudor –falsu porque nun lu amosaron nel casu los coches- sobre una necesidá razonable.

Yá dixi la selmana pasada qu’esti tipu d’actuaciones siempre-y pasaben muncha más factura a la esquierda qu’a la derecha, yá que de la derecha son muncho más esperables y amás nun anda faciendo bandera de l’austeridá –pa ellos, porque pa los demás sí, caro- mientres que de la esquierda nun cabe esperar que reproduzca cuando ta nel poder los mesmos vicios que los d’aquellos a quien pretende ser alternativa. Eso llévanos al tema de la ética republicana, entendida esta como códigu de valores basáu nel serviciu públicu y el respetu absolutu polos bienes colectivos. Ética republicana fo la de Pi y Margall, que fo l’únicu ministru del Interior de tol sieglu XIX que nun gastó un rial de los fondos reservaos, nin siquiera cuando cesó, y eso que yera llei non escrita que quedaren pa él. Ética republicana fo tamién la del alcalde socialista de Xixón, Palacio, del que se diz que diba nos viaxes oficiales a Madrid nel billete más baratu de tren y llevando la comida de casa. Posiblemente esti seya un exemplu mui desaxeráu, pero contrasta tovía más viendo la desmesura del so sucesor na alcaldía y actual presidente del Principáu. ¿Somos quién a imaxinar a los dirixentes de la esquierda oficial reproducir esi tipu de comportamientos?

Cuando la esquierda se comporta como la derecha, la derecha gana. Cuando la esquierda asume como propios los valores de la derecha, la derecha gana. ¿Pa qué votar a esa esquierda si se comporta igual que la derecha? Esa ye la cuestión que tienen na cabeza miles de persones viendo esti espectáculu llaceriosu. El retu de la esquierda asturianista ye ser a amosa-y a la ciudadanía que’l so proyectu ye estremáu del dominante non solo nos conteníos, nel modelu de país, sinón tamién nes formes, nes actuaciones, nel códigu de valores. La ética republicana, la voluntá de servir al país, al pueblu asturianu, nun ta güei representada polos que, a la hora de la verdá, tán toos nel mesmu carru, o más bien coche (de luxu, caro).