L’otru xueves 25 de mayo cumplióse, ensin pena nin gloria como tolos años, el 198 aniversariu d’ún de los acontecimientos más sobresalientes de la Historia asturiana: la proclamación de soberanía de la Xunta Xeneral del Principáu acompañada de la declaración de guerra a la Francia napoleónica. Estos acontecimientos, que suponen l’aniciu de la Historia contemporánea asturiana -porque marquen el principiu de la fin del Vieyu Réxime y la entrada de les mases populares na política- y que tuvieron gran sonadía daquella, tán güei escaecíos pa la inmensa mayoría de la población incluida la clase política representada nuna Xunta Xeneral que nun tien pa nada nin les atribuciones nin l’altor de mires que tuvieron los diputaos d’aquella de mayu de 1808. Namás delles organizaciones cíviques y Izquierda asturiana (IAS) apostamos por caltener viva la llama de la memoria histórica.

Paga la pena repasar los fechos. El 9 de mayu de 1808 lleguen a Asturies les primeres noticies de la masacre del 2 de mayu en Madrid, onde les tropes napoleóniques reprimen xabazmente la sublevación del pueblu de Madrid. Esi día entama un motín popular n’Uviéu encabezáu por muyeres y estudiantes que lleva a la Xunta Xeneral (quixo la feliz casualidá histórica qu’esi mes fuera’l so períodu de sesiones) a celebrar un conceyu ampliáu a otros sectores sociales (cabildu catedraliciu, Universidá y gremios artesanos) que decidió nun reconocer a otru rei qu’a Fernando VII y entamar los preparativos bélicos. El 13 de mayu la mayoría de los diputaos, que tomaren la decisión de rebelase baxo presión popular, reculen y revocan los acuerdos. Una minoría de diputados, encabezada pol que taba acabante de ser elexíu Procurador Xeneral, Álvaro Flórez Estrada, entama la conspiración. La nueche del 24 al 25 de mayu los rebalbos, apoyaos polos militares y obreros de la fábrica d’armas, tomen la Rial Audiencia, representante del gobiernu central, y obliguen al so presidente a convocar una sesión estraordinaria de la Junta, convocando namás a los quince diputaos partidarios de la guerra. A un tiempu, cásique 3.000 campesinos armaos provinientes de los conceyos vecinos tomen la capital. La mañana del 25 de mayu, la Xunta Xeneral proclamábase soberana, declarába-y la guerra a Francia, ponía embaxadores n’Inglaterra pa solicitar ayuda militar y entamaba la formación del Exército Defensivo Asturiano.

Si esos sucesos lleguen a pasar en dalguna de les llamaes “nacionalidaes históriques” nun somos a imaxinar lo pesada que se pondría tanto la clase política d’eses comunidaes como la nuestra, l’asturiana, tan dispuesta a reconocer les “rialidaes nacionales” ayenes como roceana a aceptar la nuestra. Si tien d’haber un día d’Asturies, entendíu como xornada de celebración de la identidá colectiva, nun hai dulda que’l 25 de mayu ye muncho más propiciu que’l 8 setiembre, que ye estrictamente una festividá relixosa (el día de la Virxe de Cuadonga, y non l’aniversariu de la batalla del mesmu nome, del que desconocemos la fecha esacta).

Y ye que’l 25 de mayu ye un acontecimientu poliédricu, susceptible de numberoses interpretaciones, y precisamente por ello lo más indicao pa convertise en xornada colectiva d’Asturies. Toles corrientes polítiques presentes anguaño na sociedá asturiana tienen motivos pa vese reflexaes nes xornaes de mayu: la derecha conservadora pue ver la sublevación popular en defensa de la relixón y el rei lexítimu; los lliberales puen talantala como’l primer clau nel ataúd del Vieyu Réxime, pol calter revolucionariu burgués de los sos cabezaleros y les midides qu’adoptaron; dende la esquierda vemos la entrada de les mases populares na vida política, pero lo que naide pue negar -y eso ye lo que reivindicamos dende la esquierda asturianista- ye la rialidá incontestable de qu’esto constitúi el primer actu d’autodeterminación del pueblu asturianu: el 25 de mayu Asturies declaróse soberana, non pa llevantar un estáu independiente, sinón pa proclamar que nun almitía’l dominiu francés y sí el de Fernando VII. Que l’esfuerzu yera dignu de meyor causa ye evidente (Fernando VII foi posiblemente’l rei más fatu, sangrín y miserable de la Historia española, y eso qu’hai un ampliu catálogu pa escoyer) pero non por ello hai que resta-y importancia al fechu en sí: el 25 de mayu supunxo un procesu d’autodeterminación coolectiva basada nun fondu sentimientu identitariu, exemplificáu na criación de la bandera asturiana y na propia denominación del Exércitu.

Ye curioso qu’Asturies entrara na dómina contemporánea dueña del so destín y que décades depués quedara somorguiada nel Estáu centralista y uniformizador que llevantó’l lliberalismu moderáu, pero ye indignante que la clase política asturiana siga enfotada n’afondar esi modelu que namás que trexo dependencia y sucursalismu, en cuenta d’apostar pol autogobiernu como ferramienta de democracia, xusticia social y autoreconocimientu colectivu del pueblu asturianu. Asturies necesita reconocese a sí mesma, non por mimetismu hacia otros pueblos, sinón porque ye condición indispensable pa entamar un procesu de rexeneración política, cultural y económica del que salga un país más xustu y solidariu que nun obligue a lo meyor de la so mocedá a convertise en lleendes urbanes. Na Historia asturiana tenemos munchos exemplos de que cuando esti pueblu tuvo uníu y consciente de só y de la so fuercia, foi quien a tomar el cielu por asaltu. Recordémoslo, celebrémoslo, no por señaldá de lo que fuimos, sinón pa saber lo que podemos ser: únicos amos del nuestru futuru.

Faustino Zapico Álvarez ye Historiador y miembru de la Dirección Nacional d’Izquierda Asturiana (IAS)

Artículu publicáu en La Nueva España
el 3 de xunu de 2006