Yera un llugar común afirmar que’l rei d’España yera un home simpáticu y bonal, de tratu candial y cenciellu, amigu del contactu col pueblu, de gran educación y paciencia, especialmente colos que nun son monárquicos. “Falando entiéndese la xente”, paez ser que dixo. Y nesto que mira tu que, como nun quier la cosa, fai esi xestu tan féu a unos parroquianos que ximielgaben banderes de la II República española, col déu anular, como un vulgar hooligan fuboleru. La escena, nesti país tan democráticu onde nun hai censura, namás salió nuna canal televisiva, Euskal Telebista (estos vascos, yá se sabe...). Pelo que se ve, que’l xefe d’estáu, que tien que tar perriba del bien y del mal, pierda los papeles ente un garapiellu de ciudadanos republicanos nun ye noticia.

La monarquía sigue siendo güei la gran intocable de la II Restauración. Les circunstancies de la llegada y afitamientu nel tronu de Juan Carlos I siguen siendo un tabú pa la clase política española y asturiana, empapizada col discursu de lo políticamente correcho. Un monarca puestu a déu por un dictador terrorista que llegó al poder pasando perriba d’un mar de sangre. Un monarca que fo’l mascarón de proa d’una brillante operación de marketing onde too cambió pa quedar como taba. Un monarca con un padremuñu desconocíu, pero que se sabe milmillonariu, gracies a escuros negocios con ciudadanos de probada honradez como De la Rosa, Colón de Carvajal o Mario Conde. Un monarca del que tovía nun se sabe l’auténticu papel que xugó naquel 23-F de fantasía. Un monarca que ye, en definitiva, como tolos sos antepasaos: un Borbón de los pies a la cabeza, con tolo qu’ello implica.

La rialidá del monarca, los sos negocios y los sos familiares ye ún de los secretos meyor guardaos d’esti réxime, que nun pue permitir que la rialidá estropie lo que debe presentase como un cuentu de fades. La monarquía vivió esti añu circunstancies especialmente propicies pa facer medrar la so emponderación ente la opinión pública: la boda del heriede fo una perbona oportunidá pa que tola clase política y periodística fexera rescamplar el cortesanu falagosu que lleva dientro, y xenerar con ello un estáu d’ánimu monárquico-dulzayu qu’estraga al más llambión. ¿Qué ye un déu en comparanza con trenta años de propaganda? Poca cosa, pero nin siquiera eso saquen los medios, nun vaiga a ser qu’entame a cayer la imaxe prefabricada per décades. ¿Acasu va llegar la República porque la gran masa vea nel telediariu Juan Carlos de Borbón faciendo un xestu vulgar y maleducáu? ¿Tantu poder tien esi déu? ¿Quién tien más, el déu rial o el qu’ordenó que nun saliere na TV? ¿Y si son el mesmu? ¿Por qué ye tan importante? Y si nun lo ye... ¿Por qué hai censura? Del déu de Franco al déu del Rei, el casu ye fadiar.