En mayu cumpliéronse 28 años de la matanza de Montejurra, onde pistoleros de la ultraderecha entamaron con impunidá absoluta un operativu miltar pa torgar la tradicional romería carlista que tolos años celebra una victoria militar de la tercer guerra (1872-76). Col sofitu de les autoridaes civiles y militares de Navarra, mercenarios venceyaos al bunker franquista asesinaron a dos militantes d’un Partíu Carlista que nesos años representaba una importante fuercia d’oposición al réxime. Los fechos nun fueron xulgaos porque entraron na amnistía de 1977. El ministru del Interior responsable d’aquella masacre ye’l fundador del PP y actual presidente de Galicia, Manuel Fraga. Les families de los dos muertos nun entraron na categoría de víctimes del terrorismu sigún la llei de Mayor Oreja, que sirvió pa condecorar a terroristes d’Estáu como Carrero Blanco y Melitón Manzanas. Hai unos meses, un tribunal reconoció lo evidente: que los dos carlistes asesinaos en 1976 fuéronlo por una banda terrorista, que nesti casu yera entamada, armada y dirixida pol aparatu del Estáu escontra una fuercia de la oposición democrática. Fraga, nun dixo un ris. Mayor Oreja, tampoco.

Quien si diz muncho, porque pa eso ye’l xefe de la oposición, ye Ovidio Sánchez, el cabezaleru del PP asturianu. Anda tou esprecetáu porque l’Axencia de Cooperación al Desarrollu apurrió una ayuda de 180.000 euros a la Universidá que l’Asociación de les Madres de la Plaza de Mayu tien en Buenos Aires. Les Madres de Mayu, que perdieron los sos fíos por aciu del terrorismu d’Estáu de la Xunta Militar qu’entafarró Arxentina de sangre y muerte ente 1976 y 1983, tienen discursu broncu y radical que nun-y presta a la derecha esapñola, que decidió recurrir al llevantu pa desprestixales. Asina, acusen a Hebe de Bonafini, presidenta de l’asociación, de sofitar a ETA, tracamundiando a costafecha la defensa de los derechos de los presos vascos a cumplir condena nel so país col apoyu abiertu a l’actividá terrorista. Asina, si el gobiernu asturianu apurre perres a una universidá entamada poles madres de mayu, ye como si el Principáu collaborara con ETA, vien a dicir Ovidio Sánchez depués de lleer los insultos, llevantos, invenciones y babayaes d’Alfonso Ussía, fabulador profesional dende’l diariu ABC. El casu ye emporcar y tracamundiar, qu’una opinión pública desinformada pero sensibilizada pol tema del terrorismu ye fácil de remanar, a ver si caen dellos votucos nes elecciones. Que pa ello faga falta insultar a una de les asociaciones más dignes d’América Llatina ye lo de menos. Posiblemente Ovidio Sánchez prefiera qu’eses perres, en cuenta de dir pa un centru educativu xestionáu poles Madres de Plaza de Mayu, vaigan pa una escuela privada en manes de sectes relixoses como l’Opus Dei o Lexonarios de Cristo, que yá se sabe qu’eso de caltener los negocios privaos con perres públiques presta muncho.

Mientres, les víctimes tienen que demostrar la so inocencia, y los defensores de la impunidá, en Navarra, Arxentina o Asturies, ríense de nós.