Pero caro, los ritmos políticos son los ritmos políticos, y mientres en Vasconia y Cataluña hai mayoríes palamentaries cualificaes que falen abiertamente de prepasar l’actual marcu xurídicu-políticu, n’Asturies tamos tovía intentando falar de reforma estatutaria ensin que mos metan presos por ello. La modificación del actual estatutu asturianu, asinatura pendiente y indispensable nesti país, nun forma parte de les prioridaes nin de l’axenda del actual gobiernu nin de les fuercies que componen la Xunta Xeneral. Por formar, nun forma parte nin del debate: asistimos a una xuba de los impuestos indirectos pa ser a tapar el furacu financieru que dexen unes tresferencies mal feches y a nadie del actual gobiernu se-y ocurre plantegar que, ensin una reforma rial del modelu de financiación autonómica, cualisquier posibilidá d’autogobiernu efectivu que pa prau. Y el problema nun ye sólo qu’esi discursu nun salga del gobiernu, sinón que dende la oposición tampoco se siente voces con un discursu estremáu y razonable que faga ver la anecesidá del cambeu. Mientres, dende la esquierda nacionalista podemos celebrar l’aniversariu con manifiestos y proclames anticonstitucionales pa creer que mos paecemos más a vascos y catalanes n’intensidá de reivindicación nacional. Pero la intensidá va ser namás de discursu y non de fuercia. Porque la fuercia nun la tenemos, y nun vamos tenela mientres sigamos plantegando como exa central del discursu reivindicaciones que, siendo mui xustes, nun formen parte de lo qu’esti pueblu ve como necesidaes inmediates.