|
Les
oportunes declaraciones de díis José
María Fidalgo, secretariu xeneral de CC.OO.,
criticando los presupuestos xenerales del Principáu
pal 2004 ataquen el noyu central de la cuestión
asturiana: la falta d’inversiones n’actividá
productiva, que faen qu’esti país siga
desangrándose adulces pola emigración
de la so mano d’obra más preparao y
tenga que caltenese de la caridá del mesmu
Estáu central que mos llevó a esta
situación.
Dende’l socialismu
asturianista llevamos años diciendo lo mesmo:
que’l vieyu modelu de desenrrollu económicu
n’Asturies, basáu na industria pesao-estractiva
y con capital foriatu fundió a primeros de
los ’90, y que dende les instituciones, l’empresariáu
y les grandes organizaciones de la esquierda asturiana,
en cuenta d’apostar por un nuevu modelu de
desenrrollu, optaron por allongar l’agonía
al traviés de los fondos europeos y les migayes
del gobiernu central. Si gobernaba la derecha, el
repartu de prebendes yera pa los empresarios averaos
y pa la so rede clientelar (y nuna marraza por esos
fondos entamó la fronda marquesista), y,
si como ye vezu, gobierna la presunta esquierda,
los fondos van pa obres faraóniques y pal
comederu propiu. La presencia d’IU-BA nun
paez que modifique muncho la cuestión: siguimios
ensin inversiones n’economía productiva,
que xeneren empléu estable y sostenible nel
tiempu.
Caro qu’economía productiva ye un términu
ambiguu que permite munches interpretaciones, y
hai quien cree que son les obres faraóniques
como la del Muselón o les autovíes
a mediu acabar, pero eso nun ye economía
productiva, sinón desarrollismu puru y duru.
L’alternativa namás pue venir d’una
iniciativa pública fuerte y ensin complexos
(mal vamos si dende’l gobiernu tienen que
pidir perdón por criar una empresa pública
pa llevantar el nuevu hospital universitariu). Pa
eso fai falta capacidá financiera, y eso
namás pue facese con un cambeu estructural
nel modelu d’autogobiernu, con capacidá
rial pa criar y recaudar impuestos directos, y con
una banca pública asturiana, coses imposibles
con esti Estatutu y esta Constitución. Unos
producen. Nós tatexamos n’ayén,
como dixo’l Padre
Galo.
|
