|
El
PP negóse a participar nel homenax que se
fexo nel parlamentu español a les víctimes
del franquismu argumentando que “fiede a naftalina”.
Y dizlo el mesmu partíu que condecoró
póstumamente a terroristes gubernamentales
como Carrero Blanco, a torturadores como Melitón
Manzanas y a militares golpistes como Sáenz
de Ynestrillas, pol únicu méritu de
ser asesinaos por ETA. Ye la derecha ensin complexos,
ye’l resultáu de l’amnesia colectiva,
de la renuncia a conocer la verdá con lluz
y taquígrafos, del silenciu impuestu polos
arquitectos de la transición que llevó
del franquismo a esta II Restauración.
El partíu del que formen parte fíos
de ministros de Franco como Cabanillas o Arias Salgado;
exalcaldes franquistes como Matutes; millonarios
como Rato; señoritos andaluces como Arenas;
exprofesores de Formación d’Espíritu
Nacional como Rozada; militantes de sectes integristes
católiques como Michavila, Acebes, Palacio
o Tocino; el partíu fundáu por un
exministru de Franco y responsable de les matances
de Vitoria y Montejurra, y dirixíu pol fíu
d’un exmilitante del PNV que depués
ganóse la vida como plumíferu del
dictador (por cierto qu’Aznar refirióse
hai poco al pasáu peneuvista del güelu
como “la parte equivocada” de la so
vida, que vien a dicir que la parte franquista fo
l’acertada). Esa xente ye la que s’atreve
a llamar maurientes a les víctimes de la
tortura, la represión, l’asesinatu,
a los paseaos, a los fugaos, a los que dieron la
cara contra la dictadura, a los que lo perdieron
too por nun comulgar col réxime más
criminal y inmoral de la Historia d’España
y d’Asturies. ¿Y cuála ye la
respuesta dende la esquierda, más p’allá
d’unes crítiques apocadísimes?
Mientres asistimos a una fola indecente de revisionismo
históricu que sirva pa tapecer los crímenes
de la dictadura qu’agora empecipiamos a conocer
más claramente (¿Y por qué
hubo qu’esperar casi trenta años depués
de morrer la bestia pa saber ónde tán
les tumbes?) dende la esquierda oficial namás
vemos sentimentalismu y “buen rollito”.
Unos col flower power. Otros, el power mesmu.
|
