Muncho s’espreceta la derecha asturiana pol alcuerdu de gobiernu catalán, qu’inclúi la criación de preseos pa corrixir el déficit fiscal qu’esi país tien col restu del reinu. Argumenten que, de dase la situación en que les comunidaes que más aporten dexaren de facelo, les que tienen una balanza fiscal positiva saldrín mui perxudicaes, y que polo tanto nun pue revisase’l modelu de financiación autonómica en nome de la “solidariedá” interterritorial.

Esa afirmación ye, como mínimo, hipócrita. Si Asturies ye agora una comunidá que recibe más de lo qu’aporta (yá superamos los niveles de subvención d’Estremadura y Andalucía) ye por un procesu de toma de decisiones nel qu’esti país tuvo mui poco que dicir: Fo l’Estáu central el que, dende finales de los cincuenta, apostó por siguir col monocultivu industrial-pesáu pa caltener los sos intereses estratéxicos, anque esi modelu entamara a dexar de ser funcional y fuere la hora de pensar na diversificación. Fo l’Estáu central el que mos metió nuna UE que desmanteló los sectores productivos asturianos, y el que trancó empreses y apurrió prexubilaciones en cuenta d’actividá productiva, y el mesmu que nun mos dexa capacidá financiera nin pa fixar impuestos nin pa reactivar la economía. Ye esi mesmu Estáu, col sofitu incondicional de la clase política, les burocracies sindicales y l’empresariáu parasitariu de la cosa pública, quien caltien esa dinámica sucursalizada. Ye pa plasmar viendo a los defensores del llibre mercáu y la competitividá defender la cultura de la subvención cuando depende d’ello el comederu y el votu cautivu.

¿Nun ye más razonable defender un modelu finacieru que parta de la soberanía fiscal, que permita un gobiernu asturianu con capacidá impositiva y recursos abondos pa pilotar una reactivación económica con tolos sectores dispuestos a apostar pola producción, y non pola subvención? ¿Nun ye meyor poner les ferramientes pal desarrollu económicu que les cadenes de la subvención improductiva? Articular l’Asturies productiva como alternativa política, esi ye’l retu, esi ye’l programa de la esquierda nacional.