Nun ye que tenga razón el PP cuando diz que’l PSOE tien 17 discursos estremaos nes 17 comunidaes autónomes, pero la rialidá paezse abondo cuando vemos los xiros dialécticos que tien que dar la dirección federal d’esi partíu pa xustificar a un tiempu lo que fai el el PSE-EE y el PSC. El PSC, que nun hai qu’escaecelo, nació en 1977 de la xuntura de la pequeñísima federación catalana del PSOE con dos partíos de la socialdemocracia catalanista, tien unos plantegamientos respecto a la vertebración del estáu que choquen enforma col centralismu unitarista de Bono, Ibarra o Chaves, anque esti caberu, viéndoles vinir, yá apuesta por reformes federalizantes. La formación d’un gobiernu con ERC, IC y EUiA refuercia esa tendencia y eso ye bona noticia pa los qu’apostamos por una reforma estructural del marcu xurídicu-políticu vixente, independientemente del llabor que, no concreto, seya a desendolcar el nuevu gobiernu catalán.

Si lo de Cataluña provoca sana envidia, porque hai una mayoría parlamentaria de cásique’l 90% qu’apuesta por una superación del Estatutu, y porque hai un gobiernu de coalición en que cada parte caltién la so identidá política, el so discursu y el so programa, a la hora de facer les necesaries pero odioses comparaciones con Asturies, vemos que la rialidá ye enforma más murnia, yá que la necesaria reforma del marcu políticu nun forma parte del orde del día de les fuercies polítiques parlamentaries.

Y hai un datu mui inquietante. El PP catalán nun quier la reforma estatutaria porque diz que lo que tienen agora ta mui bien. La FSA, PP y IU-BA nun quieren la reforma del estatutu asturianu (o nun la quieren tanto como pa renunciar a entrar en gobiernu, que vien a ser lo mesmo). Dao que l’estatutu asturianu ta mui per debaxo del catalán en capacidá competencial, va resultar qu’hasta’l PP catalán ye más autonomista qu’esta “esquierda plural” que gobierna y pretende asitiase como referente del asturianismu. Tener fe ye creer no que nun se ve. Pues eso.