Quiciabes nun paguemos nunca la enorme delda que tien Asturies cola emigración que, va yá décades, coló pa otres tierres pa ganar un pan que nun podía ganar ente nós. Cuando tovía tenemos cientos de compatriotes naguando por volver a esti país pa pasar equí los sos caberos díis, una nueva fola d'emigrantes va, pasín ente pasu, dexando Asturies erma de brazos, cabeza y espíritu.

La emigración asturiana ye un secretu a voces. Si dende qu'entamó'l nuevu sieglu perdimos yá decenes de miles d'habitantes (que tovía nun se reflexen nel censu porque formalmente siguen residiendo equí) los medios de comunicación nun se faen ecu d'ello, pesie a les tremendes consecuencies económiques qu'eso tien. Tenemos, con un 1.075.000 habitantes formales, la tasa d'actividá más baxa de la UE, yá que la nuestra población activo ocupao nun llega a les 350.000 persones. Asturies gasta tolos años más de 500 millones d'euros en caltener un sistema educativu que sirve pa formar una mano d'obra que va desendolcar el so trabayu, a xenerar riqueza, n'otros países. Tamos desangrándonos en recursos humanos que son tamién recursos económicos. Pero d'eso nun se fala, y cuando se fai, ye pa desmentilo, como cuando Nerón-Areces llegó a afirmar que yera "una lleenda urbana" el datu de qu'en 2001 l'INEM xestionó los contratos de 18.000 asturianos fuera d'Asturies.

Nun ye solo que marche xente, ye que marcha lo más preparao, lo más dinámico, lo más emprendedor de la mocedá asturiana. Mentanto, siguimos na Arcadia feliz de les prexubilaciones y les grandes superficies, esmoleciéndonos polos munchos inmigrantes qu'hai n'El Ejido o tirándonos de los pelos pol plan Ibarretxe o la formación del nuevu gobiernu catalán. Una xeneración entera ta votando colos pies, y vota colar, vota botar, vota emigrar. El gran retu del asturianismu ye ser a plantegar toles alternatives posibles pa torgar esti procesu, recuperar esa Asturies productiva que mos permita facer volver a esa xeneración espulsada.