Son yá siete les comunidaes autónomes que defenden abiertamente la reforma estatutaria: dos d’elles (Madrid y País Valencianu) gobernaes pol PP; tres (Cataluña, Andalucía y Aragón) pol PSOE y otres dos (Vasconia y Canaries) polos nacionalistes. La fondura de les reformes ye variable, y va dende una simple modificación de la llei electoral p’asegurar la mayoría al PP (casu de Madrid) al plan Ibarretxe. País Valencianu, Canaries, Cataluña y Andalucía reclamen una axencia tributaria propia, ente otres coses. El PSOE acepta toles propuestes de reforma, escepto la vasca, y promete apoyales de ganar –cosa improbable- les elecciones de marzu.

El casu ye que too esto n’Asturies paez ciencia ficción. Cuando paez que’l PSOE quier superar la fase del pautu autonómicu de 1993, que dio na penosa reforma asturiana de 1998, el gobiernu asturianu, dirixíu por un presidente que se diz federalista y del que formen parte organizaciones que se dicen nacionalistes, calla como un afogáu. Equí nun se sienten voces de reforma, equí la FSA nun se da por aludida, y los sos socios d’IU-BA paecen más enfotaos en rentabilizar políticamente los cachinos de poder que garraron que n’intentar cumplir el programa electoral col que comparecieron énte la sociedá asturiana. Faltó tiempu pa escaecer la solemne promesa (“O reforma estatutaria y oficialidá, o nun entramos nel gobiernu”) namás se vio que la FSA nun cedía, escudándose en que’l PSOE asturianu taba mui condicionáu por Madrid, pero agora que la dirección federal da vía llibre... ¿Qué nuevu argumentu inventar? ¿Qué disculpa poner? ¿Cómo nun pensar que lo que-y importaba de verdá a IU yera entrar nel gobiernu al preciu que fuera? Eso sí, si queremos topar xustificaciones, toparémosles. Siempre se topen cuando lo qu’importa ye caltenese nel poder o nun reconocer que la estratexa desendolcada taba equivocada. Pero la rialidá sigue siendo la mesma: mientres n’otres partes del Estáu hasta’l PP fala de reforma estatutaria, equí nun falen d’ella nin los nacionalistes gubernamentales ¿Será esi’l fechu diferencial asturianu?