Ta claro que la propuesta de Rodríguez Ibarra de modificar la llei electoral pa que namás los partíos que sacaren un 5% a nivel estatal tuvieren representaos nel Parlamentu ye una barbaridá antidemocrática, del estilu de la llei del 10% de Turquía, fecha pa torgar la presencia de kurdos, radicales d’esquierda y islamistes, y que sirvió precisamente pa da-y la mayoría absoluta a estos últimos. En tou casu, y anque tuviera que recular pola presión de Zapatero, ye una constatación de que’l discursu de la “España plural” y el federalismu ta mui lloñe de ser asumíu pol PSOE fuera de Cataluña. Querer dexar fuera del parlamentu a les opciones que votaron más de la mitá de los vascos y catalanes nun ye precisamente como pa da-y llecciones de democracia a naide.

El discursu del PSOE tien munches contradicciones, munchísimes, como la de pretender presentase como d’esquierda cuando quier facer una reforma fiscal qu’hasta’l PP cree escesivamente favorable a les grandes empreses y a les rentes más altes. En rialidá, eses contradicciones ente lo que se diz y lo que se fai yá les tenía cuando gobernaba, pero’l poder ye un cementu mui poderosu. Agora, cenciellamente, rescamplen con muncha más fuercia por tar na oposición.

A IU, por contra, pása-y xusto al revés: les contradicciones nótense-y muncho más cuando gobierna que cuando ta na oposición, porque siempre lo fai dende una posición subordinada al programa y a les contradicciones del PSOE. Asina, bramaron contra la xuba d’impuestos indirectos y aprueben el de les gasolinas, prometieron oficialidá y reforma estatutaria y nun va haber nin lo uno nin lo otro. Y suma y sigue.

Y nun son los únicos. El PP critica la política autonómica del PSOE pero nel País Valencianu, onde gobiernen, quieren modificar l’estatutu pa tener ente otres coses una axencia tributaria propia, exactamente igual que Maragall en Cataluña. El casu ye aguantar, ye caltenese nel poder, ye ganar les elecciones. Depués, ya veremos.