José Luis Rodríguez Zapatero entamó un pequeñu espolín cuando dixo que nun diba intentar formar formar gobiernu si'l PSOE sacaba menos votos que'l PP. Dende l'oficialismu acusáronlu de mentirosu, yá que'l PSOE gobierna en dellos conceyos y autonomíes ensin ser la llista más votada. Dende IU, acúsenlu de resucitar el discursu del "votu útil" pa tornar a la derecha y dexalos a ellos ensin espaciu.

En rialidá, nun fexo otra cosa que curase en salú, porque ye consciente de que si'l PSOE nun saca más diputaos que'l PP nes elecciones de marzu, les sos posibilidaes de formar gobiernu son mínimes. Les cuentes son clares: De 350 diputaos en disputa, les esquierdes (IU, Esquerra Republicana de Catalunta, Bloque Nacionalista Galego, Chunta Aragonesista, Nafarroa Bai, etc.) puen algamar al rodiu los 20 dputaos. Les llistes del centru derecha (Convergencia i Unió, Partíu Nacionalista Vascu-Eusko Alkartasuna, Coalición Canaria, Partíu Aragonés, etc.) puen llegar a los 25. Queden asina poco más de 300 diputaos pa repartir ente'l PSOE y el PP. Si el PP nun saca la mayoría absoluta, namás pue cuntar de mano col sofitu de Coalición Canaria, gracies a la gran capacidá qu'amosó la reciente lexislatura pa facer amigos, polo que sería dable intentar formar una mayoría alternativa al rodiu del PSOE. Un "toos contra'l fuu" nun ye mui probable, porque nun resultaría creíble nin operativo un gobiernu nel que tuvieren a un tiempu IU y CiU, por poner un casu, arriendes del PA, PNV, ERC, BNG, etc. Asina que, pa gobernar, el PSOE tendría qu'intentar formar mayoría colos 20 diputaos o más que va tener a la so esquierda o coles dos dolcenes de los centru-derecha periféricos, o bien con unos pocos de cada. Pa llegar asina a los 176 escaños que dan la mayoría absoluta, necesitaría como mínimo ponese perriba de los 150 diputaos, lo qu'implicaría, dau'l repartu, que'l PP quedaría per debaxo d'esa cifra.

Zapatero fai de la necesidá virtí, y llánza-y un chantaxe emocional a los que tovía nun escoyeron ente IU y el PSOE. Mui intelixente.