Qué tema más escabrosu y non por ello menos discutíu. Falando de globalización paez que yá ta too dicho, pero güei vamos da-y dende equí una perspeutiva distinta: la de xéneru.

La globalización pue vese como un conceptu económicu lideráu por homes y que tien unas consecuencias que van sofrir en mayor midida las muyeres. Nun podemos nin pretendemos escaecer los efectos d´esta nel mercáu llaboral, condiciones de trabayu, desastre ecolóxicu, agotamientu de recursos, aplastamientu de culturas nativas... pero toas estas consecuencias nun puen estudiase ensin aplicar la variable de xéneru nellas.

Pa entamar podemos definir la globalización como una estratexa económica basada nuna doctrina neolliberal ya de llibre mercáu, onde la distribución de la riqueza queda ente unos pocos, y digo POCOS, porque casualmente éstos resultan ser una mayoría aplastantemente masculina.

Na cúpula: las multinacionales, en manos d'homes; las ferramientas: las perras, una política monetaria qu'aplasta a zancaes la economía política, un control de los mercaos financieros, compra de los medios de comunicación ( principal arma de concienciación social o aculturización)...

Teniendo en cuenta que na sociedá actual el dineru ye sinónimu de llibertá, yá qu'esti ta mayoritariamente en manos masculinas, podemos deducir que´l mayor índice de probeza y privación de llibertá súfrenlu las muyeres.

Los países del Sur tán siendo los más afectaos por esti modelu económicu, ya dientro d'estos las muyeres llevan la peor parte, sofriendo una doble discriminación: d'un llau el fechu de ñacer nun país probe (económicamente falando) ya d'otru el fechu de ser muyer; discriminadas por razón d'orixen ya por razón de sexu, polo que se deduz que la mundialización ye un procesu que va afectar en mayor midida a estas muyeres. Esto va xunto a la creciente FEMINIZACIÓN DE LA PROBEZA.

¿Cómo? Empeorando la situación de subsistencia nel Sur, agotando unos recursos ya unas materias primas nestos países, que posteriormente serán desarrolladas ya convertidas en productos finales a consumir nel Occidente, too ello esplotando mano d´obra barato ya en gran parte femenina ya escaeciendo unas condiciones llaborales mínimamente dignas; robamos las materies primas nel so orixen, desarrollámoslas tamién ellí pa posteriormente consumilas equí, too ello por supuesto, col menor coste posible pa la empresa.

Traslladando esto a las economías familiares d'estas trabayadoras, tendríamos que la muyer obtien una mínima remuneración económica que distribuirá ente los miembros de la unidá familiar, de forma non equitativa, entamando cimeramente pel cabeza de familia masculín, bien seya maríu, padre, hermanos...pa siguir pel restu de miembros masculinos, los sos fíos ya solo depués las fías, qu'aprenderán ya asumirán el so rol discrimináu (¿?) dende que son neñas, ya pa finar, ocuparase d´ella, que na mayoría las veces va ser con un salariu ruinu, falando siempre de bienes necesarios ya básicos: resumiendo, va ser ella la que xenere riqueza qu'a posteriori disfrutarán los varones de la unidá familiar.

Esto tiénenlo estudiao tamién los neolliberales col so modelu económicu basáu nel trabayu non remuneráu de la muyer en so casa ya na comunidá ya nel de los perbaxos salarios nos distintos sectores económicos. El trabayu de la muyer nas estructuras sociales informales ye esencial na infraestructura social necesaria pa l'actividá ya inversión empresarial que-yos cría emplegu ya riqueza.

Too esto vese agravao polos programes d´axuste estructural desendolcaos pol Bancu Mundial, qu´afecten tamién a estes unidaes familiares amenorgando los ingresos, el preciu nos bienes de primera necesidá, el gastu públicu ya las condiciones llaborales.

Pero los efectos del procesu globalizador nun afectan sólo a las muyeres del Sur, tamién tien consecuencias negativas nas muyeres del Norte. La estratexa globalizadora neolliberal nel "primer mundu" básase nel desendolque d´un modelu consumista, qu´arrastra consigo unos cambeos sociales brutales, tales como el cambeu de vezos ya costumes que llevan a una asimilación cultural global con un atropellu de las diferentes culturas de los pueblos, integrándonos a toas ya toos nel sistema que mos ufiertan. Dánnoslo too fecho: Dícennos lo que tenemos que pensar ( y qué nun pensar ), lo que tenemos que consumir, no que tenemos qu'ocupar el nuesu tiempu llibre, too eso, por supuesto, ensin dexar de consumir.

Ye un sistema económicu ya social con un monopoliu nel sistema productivu y de trabayu, con economíes d´escala que faen una competencia imposible de llevar a pequenas/os empresarias/os ya autónomas/os; con una nula influencia política onde les multinacionales tán perriba de la opinión popular ya onde se produz un aplastamientu incontroláu de las costumes y culturas de los pueblos.

El poder ye únicamente económicu ya masculín; dexando per baxu el poder políticu, con una decadencia de los estaos nacionales como principios de organización política ya económica que van pasar a ser meros instrumentos de cultura popular, tradiciones hestóricas... Los mecanismos de poder de decisión serán a escala global, únicamente económica.

Pero esti modelu el desarrollu nun será socialmente sostenible mientras la población permaneza escluyida de l'actividá económica ya la participación política ya mientras los medios de producción, el capital, los medios de comunicación...resumiendo, el poder tea esclusivamente en manos privadas y masculinas.

¡¡¡DESAFÍU A LA IDEOLOXÍA PATRIARCAL YA REVOLUCIÓN DE XÉNERU!!!

Cristina Álvarez trabaya nel Coleutivu Feminista Milenta Muyeres