Izquierda Asturiana ye un proyectu políticu asturianu que tien como oxetivu la consecución de les mayores cotes de soberanía pal nuesu país dende un proyectu socialista y verde.

IAS-Corvera nun almite les declaraciones de Solares sobre les restricciones en Cultura. |Corvera

7/02/2004 El conceyal de Cultura del conceyu, Luis Solares (PP) manifestó la so intención d’eliminar el programa d’ociu alternativu “Ensin llaves” pola falta d’apoyos económicos dende’l gobiernu’l Principáu. Del mesmu mou, l’edil popular anunció la posible retirada de les ayudes económiques a delles asociaciones culturales del conceyu que vienen desenvolviendo una actividá perimportante nesti ámbitu. Izquierda Asturiana de Corvera critica estes declaraciones amenazantes y que namás van en perxuiciu de los corveranos y les corveranes, desixéndo-y a Solares mayor respetu a la ciudadanía del conceyu en que gobiernen PP y USPC, no que tan siendo 8 meses de claru recule en cuantes a lo que ye política cultural en xeneral, y en propuestes de cultura asturiana, en concreto.
Comunicáu enteru.

MIAS presentó'l 'Manifiestu de Zaragoza'. |actualidá

7/02/2004 La selmana pasada Carlos Suari, portavoz de Mocedá d'Izquierda Asturiana (MIAS) y Daniel Mari Ripa, responsable de rellaciones internacionales de Chobenalla Aragonesista y miembru del Comité Nacional de Chunta Aragonesista (CHA) presentaron a la opinión publica asturiana el “Manifiestu de Zaragoza” en el Conseyu de la Mocedá del Principáu d’Asturies. Esti manifiestu, impulsáu por Chobenalla Aragonesista (estaya moza de Chunta Aragonesista) y firmáu por múltiples agrupaciones xuveniles (ente elles les JERC de Catalunya, JEN de Mallorca, JSA e IU-Juventud d'Aragón o Gazte Abertzaleak d'Euzkadi), llega a Asturies de la mano de MIAS, col envís d'aportar lluz sobre la tema de la despenalización del consumu del cannabis y los sos derivaos, nun momentu nel que la presión social fai d'interés indiscutible l'asuntu.
Sigún explicó Carlos Suari'l “Manifiestu de Zaragoza” va presentalu MIAS nos Conseyos de Mocedá d'Asturies, Xixón y de Uviéu nun primer momentu pa culminar cola presentación d'una campaña própia de MIAS entitulada "Coles drogues: + información, - hipocresía" denunciando asina la doble moral de los diferentes gobiernos con esta tema.
Información completa na web de MIAS.

IAS-Avilés refuga les condiciones nes que va ñacer la Oficina de Política Llingüística. |Avilés

7/02/2004 Va unos díes, Juan José Fernández, conceyal de Cultura n’Avilés por Izquierda Unida – Bloque por Asturies, anunció la creación de la Oficina de Política Llingüística municipal, nun episodiu que por esperpénticu nun dexa de ser dafechu impresentable. Y ye que, el conceyal d’IU-Bloque anunció la nacencia de la nomada Oficina, ensin cuntar colos servicios del correspondiente espertu o técnicu, ye dicir, un serviciu ensin trabayador, una oficina ensin oficinista. Énte esta anuncia, Izquierda Asturiana d’Avilés quier manifestar la so fonda decepción al tiempu que recuerda los compromisos alquiríos: primeru, electoralmente, pola coalición en cuestión; segundu, nel pactu de gobiernu IU-Bloque - PSOE nel que s’inxer Avilés; y terceru; pol edil como compromisu personal delles vegaes anunciáu.
Comunicáu enteru.

IAS sofita la Marcha Verde de Xixón. |Xixón

2/02/2004 Izquierda Asturiana de Xixón apoyó nun comunicáu publicáu estos díes la marcha verde tanto polo que representa en defensa d’unes posiciones que nuna bona parte compartimos, como de rebelión y organización ciudadana espontánea del Xixón rural , que tamién existe, contra unes formes autoritaries y escurantistes que caractericen la xestión de les autoridaes municipales nesti tema y que conderguen a los vecinos y vecines a ser simples espectadores nun procesu qu’en dellos casos va afectar fondamente les sos vides y a la tresformación de los sos entornos vitales.
D'otru llau IAS denuncia que’l planteamientu subxacente tres el PXOU nun ye más que la imposición d’un modelu de ciudá desarrollista, especulador y al serviciu, una vegada más, de la yá denominada en dellos círculos ciudadanos, como “mafia del cementu" y que en nengún casu va dar respuesta a les necesidaes de vivienda de la población nin ye la manera de crear les 15.000 viviendes prometíes pola coalición de gobiernu del Principáu.
Finalmente l'asamblea local d'IAS de Xixón decidió asistir a la manifestación ensin amosar nenguna simboloxía nin propaganda del partíu siguiendo asina los encamientos de los organizadores nel sen de que nun s'intente aprovechar la marcha pa los intereses particulares de los distintos partíos políticos nun periódu preelectoral, dexando asina'l protagonismu en manes de les persones afectaes.
Comunicáu enteru. (3/2)
Comunicáu enteru. (5/2)

IAS de Mieres énte’l nuevu plan municipal pa la xestión y tratamiento de basures. |Mieres

2/02/2004 Izquierda Asturiana de Mieres criticó duramente el nuevu plan municipal pa la xestión y tratamientu de basures entamáu pol Conceyu.
D'un llau la corporación nun contó en nengún momentu cola opinión de la ciudadanía, contratando los servicios d'empreses privaes pa la recoyida de basures. IAS critica tamién l'actitú caciquil y despótica del gobiernu municipal (PSOE/IU-BA) enfrentando y estremando a los vecinos y vecines nos conceyos abiertos.
Izquierda Asturiana (IAS) de Mieres ve factible que se lleve alantre'l proyectu ensin el correspondiente aumentu d'impuestos al tienmpu que va siguir apostando por una política que nun tenga como oxetivu final desmantelar los servicios municipales privatizándolos sinón qu'apueste poles meyores na calidá del serviciu. Nun pue facese afincar sobre los vecinos tola responsabilidá económica de lo qu'habría considerase como un gastu primordial del consistoriu tratándose de daqué tan importante como la protección del mediu ambiente y la racionalización y aprovechamientu de los recursos lloñe d'estes polítiques paxareres y d'escaparate.
Comunicáu enteru.

IAS pola implantación de Medicina Deportiva y Ciencies de l'Actividá Física n'Avilés. |Avilés

2/02/2004 Izquierda Asturiana d'Avilés fixo públicu un comunicáu d'apoyu a la plataforma pro-Facultá de Ciencies de l’Actividá Físico y del Deporte d’Avilés amestando la so voz a los que d’unes feches p’acá vienen pidiendo la implantación de la Facultá de Medicina Deportivo tamién n’Avilés.
IAS-Avilés manifiestó asina’l so esmolecimientu pola necesidá de dotar al conceyu y a la comarca en xeneral d’unes instalaciones universitaries y d’unos estudios qu’anguaño tán ente lo más solicitao y qu’al empar constituyen lo cimero de tou un campu científicu de los más mozos y que más tán evolucionando nos últimos años. Estes ciencies estúdiense anguaño n'otros puntos del Estáu quedando'l nuesu país como donante de mozos y moces emigrantes qu'han marchar d'Asturies pa desenvolver estos estudios.
Comunicáu enteru.

IAS de Mieres escueye directiva nueva. |Mieres

26/01/2004 La selmana pasada l’agrupación local d’Izquierda Asturiana (IAS) en Mieres procedió a escoyer los nuevos cargos de la so directiva con vistes a articular el llabor que se desenvuelve na comarca del Caudal. Esta reestructuración ye por mor del aumentu d’actividá de dicha agrupación y la xorreciente presencia d’IAS na vida política municipal que, depués de les últimes elecciones, dio en ser la cuarta fuerza política nel conceyu.
D’esta miente, escoyóse como secretariu a Xuan Lamelas, Ernesto Suárez fai les funciones de portavoz y Candi Oliva ye la tesorera. Dientro del organigrama local inxérense tamién Xuan Castañón na estaya d’Educación, Roberto Lobo na de Mocedá y Faustino Zapico, cabeza de llista d’IAS, como enllaz cola dirección nacional.
Esti colectivu d’homes y muyeres que fan parte d’Izquierda Asturiana en Mieres constitúi un grupu sólidu y experimentáu y parte activo y destacao del asturianismu político asina como de l’axitación cultural, la llucha poles llibertaes, la reivindicación llingüística del asturiano, la emancipación de la muyer, la ecoloxía y l’antimilitarismu. Asúmese d’esta manera el retu d’abordar los problemes de Mieres cola responsabilidá de ser yá un referente pa bien de colectivos y ciudadanos mierenses y ser quien a dar respuesta a les sos quexes, proyectos, inquietúes y moliciones.

Comunicáu enteru.

IAS d'Avilés denuncia l'estáu de los viales públicos ente La Madalena y Castañeda. |Avilés

26/01/2004 Izquierda Asturiana d'Avilés denunció énte los medios de comunicación la penosa situación na que s’atopen los habitantes de Castañeda, na parroquia de La Madalena los Corros, pola mor de la falta de seguridá nos accesos peatonales al so nucleu de población. La falta d'anchor de la carretera que crucia'l barriu y l'ausencia d'una cera pa tornar el peligru de la propia vía. IAS-Avilés reclama al equipu de gobiernu la construcción d'una cera ente la ilesia de La Madalena y el nucleu de Castañeda qu’evite’l peligru al que se ven sometíos los usuarios de dicha vía. D'otru llau l’estudiu, por parte de la Conseyería d’Infraestructures del Principáu d’Asturies, de la posibilidá d’una prolongación peatonal na AS 314 hasta Villa (Corvera) y la creación d’una rede de senderos conducentes a la falda del Picu Gorfolín.
Comunicáu enteru.