Declaración del 24 d’agostu: Dizse Asturies, llámase soberanía

Dizse Asturies, llámase soberanía

MEMORIA

El 24 d’agostu, como cuasi tolos díes d’esti mes asociáu al descansu ye una fecha que pasa inalvertida nel calendariu. Ensin embargu pa los asturianos de va 83 años foi importante y nestos momentos del sieglu XXI tendría que ser polo menos alcordada non solo polo simbólico sinon como preba del exerciciu colectivu de Soberanía qu’adoptó’l lexítimu gobiernu d’Asturies nun momentu históricu grave y con calter urxente

El 24 d’agostu de 1937 róblase’l decretu qu’afita la soberanía de los territorios alministraos pol “Consejo Interprovincial de Asturias y León” que d’equí p’alantre llamaríase Conseyu Soberanu d’Asturies y Llion. Queríen con ello salvar equí l’ideal republicanu y tornar l’agresión facista d’una manera llibre y autónoma, non supeditada a un gobiernu central col que se fundieren yá toles pontes y col que la intendencia y la comunicación nun resultaben efectives, desque los sos intereses yeren contrapuestos a los de la islla republicana a la que representaben. Asturies nun podía esperar nada de fuera porque nun yera prioritaria na estratexa global y exerció una soberanía que non por efímera ye menos significativa.

EL TURISMU NUN YE ALTERNATIVA D’ECONOMÍA PRODUCTIVA.

Volviendo a l’actualidá, de la fin del estáu d’alarma acá, muncho se faló de la diferente xestión d’unos y otros territorios y de les virtúes y aciertos de l’Alministración asturiana. Una Alministración que, bien ceo s’amosó falta de competencies, enllena de razones nos sos llamaos y declaraciones pero valera de recursos llegales y xurídicos pa regular el tsunami que-y venía enriba en forma de fola d’un turismu al qu’hai que resignase por necesariu salvador de la economía.

¿Asturies, Paraisu seguru? A lo llargo d’esta primavera y branu son constantes los mensaxes que se manden dende’l Ministeriu de Sanidá y dende’l propiu gobiernu asturianu llamando a restrinxir la movilidá a too aquello que sea indispensable. Sicasí dende propiu gobiernu asturianu, asina como dellos conceyos, apurrieron campañes qu’enfrenten esi primer mensaxe vendiendo Asturies como un paraisu seguru col envís de captar turismu d’entornos alministrativos con una situación epidemiolóxica estremada a l’asturiana.

Dende los años 80 del sieglu pasáu, los sucesivos gobiernos d’’Asturies empeñáronse na apuesta pol turismu como paliativu al desmantelamientu de los sectores productivos que truxeron consigo les reconversiones industriales brutales nes industries pesaes y na minería y panacea pa la despoblación rural de grandes zones del país. Asina, foi vendiéndose un nuevu productu, esti sí, inagotable, que yera nin más nin menos que’l paisaxe y los recursos naturales asturianos, anque desasilvestrando no posible en forma d’infraestructures una naturaleza y un mediu rural eternamente desatendíu.

Esta apuesta pol turismu, anque taba a lo primero pensáu como un complementu a l’actividá agrario y ganadero, financió con recursos públicos al sector hosteleru de munches poblaciones  d’Asturies y creó una pequeña rede d’establecimientos y empreses de calter estacional. que funcionen a base d’inundar un territoriu mui sensible y limitáu cola masificación. La ilusoria dependencia d’un sector servicios que:

  1. Nun ye un sector productivu nin que xenere valor añadíu.
  2. Ye estacionariu dafechu y mui dependiente d’unes condiciones meteorolóxiques irregulares por naturaleza.
  3. Nun xenera emplegu estable nin de calidá.
  4. Namás pue crecer a base de la masificación, xenerando un problema d’ocupación del territoriu y espulsión d’otres actividaes.
  5. Trai consigo perda de calidá ambiental pola desvirtuación del mesmu productu que viende: Paisaxe, naturaleza, calidá ambiental, entornu preserváu y poco  humanizáu.
  6. Establez una rellación xerárquica ente lo propio y lo foriato, dependencia sociolóxica y psicolóxica creando una superestructura mental qu’afonda’l menospreciu polo propio, lo qu’esplica porqué:
  7. Escaez los aspectos culturales del país, que queden llendaos a lo púramente gastronómico pero ensin ser xenerador d’’infraestructura agroalimentario, al tiempu que afonda nos tópicos más rancios y susceptibles de ser aceptaos ensin conflictu por una clientela centralista que ve y consume’l “productu Asturies” como dalgo que-y pertenez y a lo que tien derechu.
  8. Róba-y a los propios ciudadanos la posibilidá de siguir usando los espacios d’ociu nunos territorios que d’otra manera seríen abondos y amañosos.

NECESITAMOS COMPETENCIES

Asturies necesita competencies pa poder establecer midíes de seguranza pa la so ciudadanía. Muncho se fala de derechos territoriales y estáu descentralizáu pero poco se fai por avanzar a un modelu siquieramente federal. El federalismu implica una xuntura voluntaria de les partes que la integren, que coordinen les sos polítiques y entamen aspectos comunes de mutuu alcuerdu, non nuna delegación coyuntural por parte d’un centru omnipotente y omnisciente.

Nesti momentu precísase un marcu llegal y xurídicu autónomu que permita afitar controles sanitarios pa la entrada y salida d’Asturies, blindar y garantizar los llogros algamaos col personal y los recursos propios y nun quedar otra vegada más al debalu del caprichu políticu y d’intereses ayenos que echen embaxu l’esfuerzu de la xente asturiano.

UN MODELU DE NORMALIDÁ: ASTURIES SEGURA.

Asturies tien los recursos y los medios humanos necesarios pa caminar a un modelu non de “nueva normalidá” sinon de “normalidá” a cencielles. Defender asumir y executar les competencies de movilidá ye una forma de protexer a los asturianos y asturianes y a los sectores productivos que más aporten al PIB frente al modeu de la hostelería y el turismu.

L’actual momentu de debacle económica y inseguranza social pue dir tovía a pior y hai qu’aprender de les llecciones de los meses anteriores, onde un MInisteriu de Sanidá que llevaba 30 años ensin xestionar nin la compra d’una aspirina empallonóse en dictador absolutu que tuvo a piques de llevar al caos al conxuntu del Estáu por nun saber nin querer aplicar un modelu de  desaniciu de la pandemia qu’implicaba pesllar los focos siguiendo exemplos descentralizaos. 

Asturies tien una rede asistencial y sanitario que, con toles sos carencies ye mui quien pa facer una política pa una población y un territoriu compactos como los nuestros y que pue dir más allá de la contención pa empobinase a un modelu de desaniciu, non de contención,  propiu de países soberanos como Nueva Zelanda.

UN PROBLEMA LLAMÁU MADRID

Los xestores políticos del Estáu nun quixeron aplicar con Madrid, a pesar de toles evidencies y estudios epidemiolóxicos el modelu italianu onde se peslló l’area de Milán. Apostó por amenorgar el problema con una política de fases na que, la tolerancia col principal focu y la vista gorda tuvo presente dende’l primer momentu y namás la aplicación estricta de midíes n’otros territorios exercía de muria de contención , mientres dende los medios de propaganda madrileños (que son cuasi toos) y les redes sociales medraben les acusaciones de separatistes, pueblerinos , paletos y  insolidarios, nuna cantinela que lleva tiempu de moda ente los creadores d’opinión a sueldu mesetariu. El problema, sicasí, tien raigaños más fondos: Tolos responsables y protagonistes de la batalla política, xestores, opositores, fans mediáticos, son, de derecha a esquierda, madrileños y representen una obra na que los demás somos espectadores. L’espectáculu políticu de les batalles ente l’Estáu, ayuntamientu y comunidá de Madrid que nada tienen que ver cola nuestra realidá epidemiolóxica, acabámos pagándoles por ser un territoriu dependiente y atáu de pies y manes. La visión centralista ye tresversal a tol espectru políticu madrileñu, que ye’l que proyecta la so realidá enriba tolos demás. Asina, produzse un doble dañu: aplicar a otros territorios recomendaciones sanitaries y de movilidá pensaes pa la comunidá madrileña, mientres que ésta pasa penriba d’elles olímpicamente. Hai qu’alcordase que la comunidá de Madrid nun pasó peles fases preceptives pa llegar al actual estáu de “Nueva Normalidá” y si s’aplicaren los criterios estadísticos internacionales nos que supuestamente s’enarta l’Estáu Español habría que-y aplicar un confinamientu estrictu de 45 díes, por nun falar de los incumplimientos, les neglixencies y la inacción chulesca del gobiernu d’Isabel Ayuso.

Esa concepción centralista de que’l restu de territorios del reinu son una estensión de la capital, zones que-y pertenecen y nes qu’hai que tar a la so disposición, esplica la montonera de conductes incíviques propiciaes por grupos agazapaos ente la fola de la invasión turística d’esti branu n’Asturies.

MÁS QUE PALABRES

El gobiernu asturianu tien que pensar si mereció la pena tirar pela borda la bona situación y la xestión a fecha del mes de xunu p’alimentar a un sector económicu de cierta rentabilidá económica inmediata pero dudosa rentabilidá social y pasar a tener agora una hipoteca sobre’l cursu escolar y tol sistema educativu, sobre la rede asistencial pa mayores y sobre’l propiu sistema de salú. Les palabres y declaraciones de poco valen si nun hai capacidá executiva nin lexislativa. La inacción y la espera pola solución dende un xestor central enfoscáu en batalles ayenes empobina ensin remediu a más recentralización.

L’exemplu más claru d’esa nueva recentralización de competencies que se ta cociendo tenémosla nes numberoses declaraciones de responsables políticos d’educación na última quincena, llamando a midíes coordinaes. Les CCAA tienen asumíes les competencies no que cinca al sistema educativu, ¿qué hai que coordinar? Si fuere una reformulación de la LOMCE podría entendese, pero la realidá ye que nun ficieron los deberes a lo llargo d’estos meses y al échase-yos l’exame encima hai que buscar escuses que xustifiquen los malos resultaos que se barrunten. Casualmente o non, les comunidaes qu’abrieron la espicha fueron les gobernaes y apoyaes por PP, C’s y Vox, evidenciando una dexadez de funciones.

Va unes selmanes el presidente d’Aragón, Javier Lambán, en medio d’una situación sanitaria complicada declaraba que “nun diben trancar Zaragoza porque yera’l motor cultural y económicu d’Aragón”. Esto fainos subsidiarios de les situaciones sociosanitaries d’otros entornos alministrativos, sobre los que los asturianos y asturianes nun podemos exercer nengún tipu d’acción, y conviértenos en rehenes d’intereses políticos, sociales y económicos ayenos al nuestru país.

¿Ye normal tener trancaos a los mayores nes residencies de llugares turísticos pa que’l restu la xente cuerra cola conciencia tranquila? ¿Ye normal que l’Alministración asturiana tea autorizada a poner midíes restrictives a los pasaxeros de países comunitarios nel Aeropuertu d’Asturies mientres miramos complacientes como decenes de miles de persones procedentes del restu de comunidaes españoles invaden pueblos, comercios, playes y montes, saltando penriba les recomendaciones sanitaries? ¿Tenemos que dar les gracies resignaos y ensin gorgutiar pol maná turísticu y asumir lo que venga pel hibiernu en forma d’andanciu y desbordamientu social?

¿Por qué nun s’empleguen midíes más allá del “avisu”?

ASTURIES YE QUIEN

En momentos históricos d’urxencia social, los que rixíen el destín d’Asturies tuvieron a l’altura y asumieron lo que tocaba ensin medrana. Exercer yá una acción política que faiga posible soluciones propies pa la nuestra realidá ye más qu’un lexítimu rixu ideolóxicu asturianista, ye una NECESIDÁ.

Adrián Barbón roblaba va un añu los sos primeros decretos na mesma mesa onde Belarmino Tomás ochenta y seis años atrás asumía y exercía la soberanía del Pueblu Asturianu. Ye hora de dexar atrás lo simbólico y dar un pasu al frente na defensa d’Asturies y de los asturianos y asturianes. Nun necesitamos mandar embaxadores a la Sociedá de Naciones, pero sí garantizar la plena normalidá del conxuntu de la sociedá asturiana.

¡ASTURIES SOBERANA PA PESLLAR!

DECLARACIÓN 24 D’AGOSTU D’IZQUIERDA ASTURIANA (IAS)

Los comentarios están cerrados.