D’equí p’alantre

Con motivu de l’apaición de les informaciones relatives a la fortuna amasada pol que, hasta va poco y per más de trenta años foi secretariu xeneral del SOMA, miembru de la executiva federal del PSOE y home fuerte de la FSA, José Ángel Fernández Villa, Izquierda Asturiana (IAS) quier facer delles considerances:

1º) Que’l SOMA-UGT y el so brazu políticu, la FSA-PSOE, lleven décades armando n’Asturies una rede clientelar engordada colos fondos europeos que llegaron a Asturies como compensación por esmantelar el sistema productivu al ingresar el Reinu d’España na CEE (ingresu pilotáu polos gobiernos del propiu PSOE) ye una realidá evidente que nun sorpriende a naide. Ye, más qu’un secretu a voces, una realidá que mercó voluntaes y debilitó, cuando non desfixo, a la esquierda sindical y política y aseguró mayoríes electorales que duraron decenios.

2º) N’IAS tamos indignaos, amás, porque nun renunciamos a les meyores tradiciones de la esquierda y la solidariedá obrera por muncho qu’un sátrapa lleve más de 30 años corrompiendo y aprovechándose de la llucha histórica de los trabayadores asturianos.

3º) Facese agora los sorprendíos, non solo dende la FSA-PSOE y el SOMA-UGT, sinón dende los que va venticinco años tán xugando a ser los hermanos pequeños nesa rede clientelar, ye, como mínimo, una amuesa d’hipocresía bien curiosa. Nun dexa d’abultar que’l que compartió diagnósticos de la situación, encontó presupuestos y conformó gobiernos de coalición cola FSA-PSOE, xeneralmente cola xustificación de “tornar a la derecha” se faga agora cruces. Más estraño tovía resulta qu’inclusive en dellos casos faga bandera contra “la casta” el que formó parte d’ella mientres pasaben estes coses.

4º) Esti escándalu sirve tamién p’alimentar el discursu antisindical y antipolíticu que favorez a mediu plazu postures populistes radicalmente contraries non yá a la democracia, sinón al simple réxime parllamentariu y al probe autogobiernu que tien Asturies. Podemos dicir al altu la lleva que va venti años qu’hai organizaciones sindicales y polítiques que venimos denunciando esa rede clientelar, les práctiques mafioses y l’esmantelamientu de la economía asturiana per parte d’esta castra de nuevos caciques.

5º) Como llevamos diciendo cuantayá, si les ferramientes polítiques y sindicales qu’articularon al nuestru pueblu per décades yá nun son amañoses, ye la hora de cambiales por otres que sí lo seyan. Pero l’alternativa a los partíos qu’hexemonizaron históricamente la esquierda asturiana nun ye l’ausencia de partíos d’esquierda, igual que l’alternativa al sindicalismu promiscuu col estáu nun ye l’ausencia de sindicatos.

6º) Va sabese más, muncho más, sobre la inmensa farsa que ye la política asturiana va décades. Dende Izquierda Asturiana (IAS) vamos siguir trabayando pa qu’Asturies dexe de ser el comederu de los que la fundieron y de los sos cómplices.

Los comentarios están cerrados.