El PP amuesa la cara retrógrada alegando a les Ordenances del asturianu en Mieres

 

Logo-Conceyu-MieresEl xueves 25 de mayu, fecha d’especial significación histórica p’Asturies, celebrábase plenu ordinariu de la corporación mierense. Nél, ente otros puntos, taba’l debate y aprobación inicial de les Ordenances d’Usu de la Llingua Asturiana nel Conceyu de Mieres, ellaboraes, a iniciativa del gobiernu local presidíu por Aníbal Vázquez, pol conceyal delegáu de Política Llingüística y militante d’Izquierda Asturiana (IAS) Faustino Zapico. Les ordenances salieron alantre col votu favorable de los grupos municipales d’Izquierda Xunida, nel que ta integráu el nuestru compañeru, PSOE y Somos Mieres y l’únicu contrariu de los 3 representantes del PP.

L’argumentariu usáu pola derecha mierense pa oponese a unes ordenances que reconocen el derechu de los vecinos a dirixise al conceyu n’asturianu, y que quierene ser marcu llegal pa una política de normalización efectiva, fueron de lo más peculiar: que yeren anticonstitucionales, yá que suponíen una oficialización del asturianu en Mieres y eso namás podía facese col Estatutu d’autonomía, y que yeren illegales porque nun incluyíen memoria económica, polo que diben suponer munchu gastu pal conceyu.

escanciando_sidra_requejo

Dende Izquierda Asturiana (IAS) podemos camentanos que los representantes del PP saben de sobra qu’esos argumentos son radicalmente falsos, polo que namás podemos concluyir que mienten a costafecha: les ordenances aprobaes nun tienen que ver cola oficialización del asturianu, porque’l conceyu nun tien capacidá llegal pa facer cosa tala, y en tou casu lo que será illegal ye’l propiu Estatutu asturianu, qu’incumple’l mandáu constitucional de facer oficiales toles llingües nos respectivos estatutos. El PP, sabedor de que lo meyor p’acabar col idioma ye facer como que se fai, sigue la llinia histórica de los gobiernos de los últimos 30 años n’Asturies y tracamundia normalización con propaganda. Eso sí, afirmando “que nun tán a la escontra del asturianu”, colo que podemos perafitanos no que dixo’l compañeru Zapico: “Ustedes dicen que nun tán a la escontra del asturianu y será verdá. Lo único que tán ye a la escontra de que s’use”.

 400px-Mapa_parroquial_de_Mieres_(color)El PP amenaza con grandes catástrofes y plagues bíbliques pal conceyu por aprobar estes ordenances, cuando la única amenaza qu’hai sobre elles ye que’l delegáu del gobiernu Gabino de Lorenzo pretenda echales abaxo, como yá fixo coles d’otros conceyos que yá les tienen aprobaes. Dao que’l delegáu del gobiernu ta puestu pol gobiernu central, del PP, ta na mano del propiu partíu dexar d’enredar nesti tema y retrasar lo que ye inevitable, esto ye, l’avance del procesu de dignificación y normalización de la llingua asturiana, desixencia de la razón y de la xusticia.

Izquierda Asturiana (IAS) ye consciente de qu’estes ordenances nun son otro qu’un pasín, pequeñu pero imprescindible, pal procesu normalizador. Son el marcu llegal baxo’l qu’encarar xeres pendientes como una oficina de normalización llingüística que funcione tol añu, o la ellaboración d’un plan de normalización ambiciosu. Y somos conscientes tamién de que les midíes más ambicioses de los conceyos namás serán posible franciendo’l techu de cristal llegal qu’hai n’Asturies: esa anomalía antidemocrática que ye l’ausencia de la oficialidá. Sabemos tamién quién son los responsables de que nun la hebia.

Pa rematar, Izquierda Asturiana (IAS) quier agradecer a los grupos municipales del PSOE y Somos Mieres el so votu favorable a les ordenances y la so participación na ellaboración de les mesmes, apurriendo enmiendes y suxerencies, anque nun dexa d’abultanos estraño que nun tomaren la palabra pa defendeles nel plenu. Llamentamos que’l PP, otra vez, volvia a amosar que sigue siendo la vieya derecha reaccionaria y sucursalista que siempre foi. Nin les amenaces nin les falcatrúes llegales van ser quien a parar la llucha lexítima polos derechos llingüísticos de los mierenses y del conxuntu de la ciudadanía asturiana.

 

Dirección Nacional d’Izquierda Asturiana (IAS)

27 de mayu del 2017

 

Los comentarios están cerrados.