El cambiu ye posible

El Cambiu ye posible

Dirección nacional d’Izquierda Asturiana

Descargar PDF – El cambiu ye posible

Tamos viviendo unos cursos políticos mui malos d’escaecer. La televisión y la rede llenáronse de debates y de noticies que mazquen ensin tregua la indignación xeneral. La xente fala pela cai de los casos de corrupción, de los nuevos oradores, de les encuestes y hasta de lo que pasa en Grecia. Paez que la tan esperada era política, esa na que nun día lloñe la ciudadanía garraría les riendes de la sociedá, pica a la puerta. Les oportunidaes de cambiu rescamplen y si toos sabemos facelo bien el nuestru contestu vital, existencial, políticu y cultural, que ye Asturies, pue tener delantre de sí la oportunidá de francer coles atadures estructurales y les males polítiques que la llevaren a esti cruz que nun ye solo de caminos. Y too ello, lo que ye mui importante y esperanzador, nun contestu tamién meyoráu, más abiertu, con clares intenciones de querer dir rompiendo de forma decidida y bien plantegada coles riegles y les vixentes rellaciones del modelu capitalista. El Reinu d’España vive momentos de cambiu, lo mesmo que la Unión Europea y anque los cambios nun se columbren rápidos nin cenciellos naide niega’l so calter de tresversalidá y el so estáu de puntu de non retornu.

Vivimos nun momentu que simplemente yera impensable ha cinco años, por muncho que dellos yá aneciáremos en cuálu yera’l camín a siguir. Les places del 15M cambiaren munches coses. Agora empecipien a sintetizase, y esto tien una dimensión específica n’Asturies. Asistimos a la resquiebra del réxime políticu español y a la particular rotura de la so propia configuración especial y única nel nuestru país. Toa coyuntura que s’abre nel camín paez ser nueva. Tamos nun puntu d’aniciu, d’entamu, de cambiu. La cuestión ye: d’agora en delantre.

Anque la realidá presente ye bien tráxica, quiciabes por eso la esperanza ye tan grande. Les perspectives de cambiu políticu pa superar l’actual situación de fundimientu adulces na llamarga de la sociedá del sufrimientu apaecen n’escena xenerando ilusión, pero tamién incertidume sobre lo que podia venir depués. Les llendes del cambiu posible apaecen desdibuxaes, y tampoco nun paez tar mui claro si lo posible coincide colo necesario. Mecíes cola esperanza apaecen les duldes, los peligros, la inmensidá del llabor. Too ello represéntase nun espectáculu total, onde nun falten amenaces pergraves per parte de los poderes financieros y de la clase fáctica –y fatídica- política, la mesma qu’empobinó a Asturies pela vía de la escelencia qu’a lo cabero yera un camín en llinia recta contra l’abismu, y nel que nun podíen faltar –nun hai traxedia ensin farsa– una bona recatafila d’arribistes y esguiles, que dende’l minutu ún tán dando l’espectáculu circense, hasta onde se-yos dexe, que consiste nes sos descaraes y estrafalaries maniobres de reasitiamientu, con  habilidaes acrobátiques bien curioses. El pueblu tien agora más que nunca la palabra y d’él depende en gran midida si la política se tresforma pa incorporase a la vida cotidiana o sigue siendo una estructura ensin utilidá pal bien común.

N’Asturies, el país de la crisis permanente, los síntomes de descomposición son evidentes. La superposición de crisis –económica internacional, burbuya inmobiliaria, de réxime- a la tradicional asturiana que vien d’hai venticinco años da col inmovilismu tradicional de les elites asturianes, y provoca resquiebres nel comederu institucional entamáu alredor del Principáu y la so nefasta xestión de la muerte del sistema productivu asturianu. A nivel electoral traducióse yá en 2011 cola victoria electoral de Foro Asturias, y anque nes xenerales d’esi añu y les autonómiques del otru hebo una cierta recomposición del bipartidismu na so variante asturiana, les elecciones europees amosaren yá que’l cambiu sociolóxicu dau dende’l 15M yá tenía unes consecuencies electorales imparables. Hai razones pa ser optimistes, y por ello queremos facer un análisis de les condiciones, les lluces y les solombres del procesu qu’acaba d’entamar y darréu d’ello facer una propuesta.

1. ¿Crisis de réxime o crisis sistémica?

Nun dexa de llamar l’atención que la crisis sistémica del capitalismu européu, que tien especial virulencia nos países interveníos de forma abierta o tapecida pola Troika nun tea xenerando una crisis del propiu réxime políticu cola mesma intensidá que la crisis social qu’acompaña a eses intervenciones. Asina, vemos como n’Irlanda, Grecia, Italia o Portugal hai desplazamientos políticos de mayor o menor intensidá y asistimos a l’apaición de nueves fuercies o a la medría d’otres antes más minoritaries, pero nun se pon seriamente en cuestión, cola posible escepción de Grecia, el mesmu réxime políticu espeyáu nes respectives constituciones. Esto en sí ye un datu llamaderu que tien una respuesta fácil: en toos estos casos, sacante n’Irlanda, les constituciones que tienen son el resultáu del consensu antifascista xeneráu nel escenariu de la derrota política de les respectives dictadures, y tienen un grau de llexitimidá social superior y más fondu que’l famosu consensu del 78 español, fechu sobre la base de la impunidá y l’amnesia colectiva. Nel casu portugués y italianu, amás, les constituciones vixentes son la llinia de defensa de la esquierda frente a la ofensiva neolliberal.

Asina, el corsé del 78, el déficit democráticu del Reinu d’España, muncho más evidente que nes repúbliques enantes mentaes, y la so característica de primer constitución de la globalización, en tanto que diseñada pa nun ceder soberanía p’abaxo –pa los sos países– pero sí p’arriba –pa instituciones supraestatales–, acaba convirtiéndose nel caballu de batalla pa salir de la crisis. Tien la virtú de sorrayar la necesidá política de superar el marcu actual pa iguar la situación económica, pero comete’l grave error de pensar que la solución ta únicamente na estructura política del Reinu d’España. A diferencia de Portugal o Grecia, nun se plantega un debate social sobre’l papel de la UE nel procesu de saquéu a los pueblos del continente.

N’Asturies, como resultáu de la sucursalización que llevamos padeciendo dende va décades, el nuestru procesu de crisis, pesie a toles variables propies que tien, ta viviéndose como una mera aplicación del patrón estatal. Eso esplica l’ausencia absoluta de debate, o de simple denuncia, de lo que’l llamáu procesu de construcción europea supunxo p’Asturies, o de cómo la denuncia del comederu político-sindical-empresarial entamáu nel país quede somorguiáu nel xenéricu ataque a “la castra”, ensin definir qué ye y qué papel xuega na sociedá asturiana, o de cómo se contrapón a un hipotéticu “99%” de la población frente a un odiosu “1%” responsable de tolos males imaxinables, cuando la complicidá social y el beneficiu directu del comederu asturianu lleguen, y per tiempu llegaren enforma, a un cachu bien curiosu de la nuestra sociedá.

Esa falta absoluta d’análisis de la realidá asturiana nos últimos años llévanos a asumir con más fuercia que nunca los análisis foráneos fechos con ferramientes amañoses pa otres realidaes, pero non tanto pa la nuestra. Güei, precisamente cuando la posibilidá de cambiu políticu ta más cerca que nunca en trenta años, hai una ausencia dafechu d’un discursu centráu na realidá asturiana y que nun seya una simple traducción de recetes esternes. Por desgracia, eso asocede en tol abanicu políticu. Y nun ta de más dicir que precisamente por esa falta d’análisis en clave asturiana les posibilidaes de cambiu puen vese seriamente comprometíes, porque faen de menos la capacidá de penetración social del modelu clientelar del turnismu asturianu, la so eficacia a la de comprar votos, o pa chiscar al conxuntu de la sociedá, incluyendo a sectores qu’agora paecen revolvese escontra esi modelu, pero que fueren tamién beneficiarios del mesmu.

Y nesi contestu, les fuercies polítiques que dominen la sociedá asturiana van fundiendo adulces, apaeciendo toes elles como responsables o cómplices necesaries de l’actual situación del país.
Tenemos una FSA-PSOE tocada pero non fundida, tovía con una gran capacidá de xenerar consensu alredor d’ella. Los escándalos de corrupción que van rescamplando nun acaben de fundila definitivamente, dao que nun dexaben de ser nos más de los casos secretos a voces que cuntaben con una complicidá social y mediática bien curiosa.

La otra pata del turnismu, el PP, que n’Asturies siempre fuera subalterna, medio desfecha pol argayu que supunxo’l surdimientu de Foro Asturias, sufre tamién les consecuencies del so papel d’heraldu de les nefastes polítiques del gobiernu central.

La fuercia alternativa de la derecha oficial, FAC, pierde puxu, pero paez afitase como’l proyectu conservador rexonalista de recambiu al PP.

L’hermanu menor de la esquierda oficial, IU, sigue ayenu a les voces de renovación que con más fuercia clamien al sur del cordal, mientres n’Asturies paez enfotada en lluches internes que recuerden demasiao a esa vieya política de la que tantes veces foi cómpliz.
La derecha nacional-constitucionalista representada por UPyD nun acaba de topar güecu abondu na política asturiana, llastrada tanto pola competencia con Foro Asturias como pola egolatría de la so cabezalera.

Mentanto, como gran promesa, surde con fuercia Podemos, que tien n’Asturies la so plaza más fuerte en votos. El nuevu partíu, con un programa mui asemeyáu al d’IU, pero con una puesta en escena, discursu y estratexa bien estremaos, ta conviertiéndose nel depositariu de les esperances d’un sector cada vez mayor que nun se sentía representáu por nenguna de les formaciones esistentes. Sicasí, los problemes inherentes a la organización d’un partíu que tando acabante de nacer algama yá una dimensión de mases, al igual que los pasos que tán dándose hacia la “moderación” col envís de quitar la rocea que despierta nos sectores sociales menos conscientes, xeneren una montonera d’incógnites.

No que toca al asturianismu políticu, esti vivió la so derrota electoral definitiva en 2012. Enantes, en 2011, certificárase la so muerte social cola ausencia del 15M y del ciclu de lluches sociales qu’entamaba. Al mesmu tiempu, la so vertiente cultural vivía una crisis pergrave que se viera un poco primero, col aniciu de la nueva crisis económica, que remataba un procesu entamáu en 2003 col primer gobiernu de la “esquierda plural”. Nel casu de Bloque por Asturies-UNA, depués Compromisu por Asturies, l’ausencia de debate internu sobre otra cosa que nun fuere la estratexa electoral torgó cualesquier posibilidá de facer una llectura siquiera medio completa de la realidá. Asina, cuando’l proyectu daba les boquiaes y apaeció con fuercia Podemos, lo que quedó al final foi una carrera hacia’l nuevu proyectu, en dellos casos espectacular polo atlética, pa garrar posiciones nel nuevu proyectu. Esa carrera diose en dos tiempos, a lo primero de forma organizada, pa depués dexenerar nun “sálvese quien pueda” intentando garrar posiciones nos círculos de cada conceyu.

2. Otra vez, el tren de la Historia
El réxime de la II Restauración, el marcu políticu que naz del pautu ente elites nos primeros años depués de la muerte de Franco y que queda espeyáu na Constitución de 1978, l’aceptación de la monarquía y la renuncia a la depuración del estáu franquista, la conservación de los privilexos de la oligarquía española y el consensu pa integrala nel procesu de construcción europea y l’estáu descentralizáu pero unitariu, tien yá abondes resquiebres como pa que seya tovía funcional.

Nesi sentíu, la situación actual paezse enforma a la de 1917, cuando una fuelga xeneral revolucionaria nel conxuntu del Reinu y que n’Asturies paralizó’l país una selmana amosó que la desafección pa col réxime turnista de 1876 yera masiva, pero non abonda como pa valtalu. Al mesmu tiempu, les dos pates del turnismu, lliberales y conservadores, tampoco yeren quien a reconstruyir la so hexemonía como pa gobernar igual, polo que dende 1918 asistimos a gobiernos de concentración lliberal-conservadores pa torgar la marea opositora. Esa situación dase anguaño nel Reinu d’España, y con abondes semeyances. Les marches de la dignidá del 22 de marzu d’esti añu amosaren a nivel estatal esa desafección, como n’Asturies tres díEs primero se fixere cola masiva movilización en Xixón de les empreses en llucha. Pero al empar, nun hai fuercia política abonda como pa echar tanto al PSOE como al PP de los distintos gobiernos qu’ocupen. Y toos dos son conscientes de que nun puen gobernar como hasta agora, polo que se columbra una gran coalición pa depués de les elecciones xenerales de 2015, teniendo n’Asturies una esperiencia pilotu col alcuerdu presupuestariu FSA-PP. Per otru llau, dende la oposición al réxime la presencia de Podemos representaría l’intentu d’articular una nueva ferramienta política p’asaltar les instituciones y abrir un nuevu procesu constituyente que dea por muertu al réxime del 78.

Evidentemente, nun pretendemos afirmar que la situación seya la mesma qu’en 1917, ente otres coses porque la situación d’Asturies o del reinu enteru nun ye la mesma qu’hai 98 años, y porque hai un marcu superior de dominiu, la UE, que ye un actor determinante na evolución política.
Asina, ábrese la llamada “ventana d’oportunidá”, esto ye, la resquiebra nel réxime que pue permitir meter la palanca que lu franza, pero ta por ver si esa ventana va aprovechase pa facer una salida acordies colos intereses de la mayoría social o si, por contra, podemos tar asistiendo a los primeros capítulos d’una operación gatopardesca onde too cambie pa que too quede igual.

D’otru llau, la baxada nel pulsu de la protesta social, fiando les posibilidaes de cambiu a los procesos electorales del añu 2015, pue llevanos a cometer un error históricu, yá que si’l mapa bipartidista empezó a francer a nivel estatal nes elecciones europees de 2014, y n’Asturies yá en 2011 nes autonómiques, arriendes de disparar nes encuestes la velocidá de fundimientu del turnismu, eso namás foi posible como resultáu de dos años de movilización social al rodiu de les plataformes ciudadanes de tou tipu y les lluches del sindicalismu alternativu. Si baxa la presión social, les posibilidaes d’asistir a un procesu de recuperación del turnismu medren, y con ello les sos oportunidaes de caltenese nel poder. Per otra parte, siguir faciendo astracción de los marcos de dominiu supraestatales, como la UE, la OTAN o, d’equí a poco, el TTIP, ye un exerciciu de suicidiu inaceptable, porque xeneren la ilusión de que ye posible un cambiu social ensin francer con ellos.

Ye posible que d’equí nun añu, en función de cómo vayan dándose los acontecimientos, acabemos topándonos cola abertura d’un nuevu procesu constituyente. Si esi ye un procesu únicu o ye más d’ún en función de la diversidá nacional del reinu, y si esi procesu o procesos van dir nuna dirección emancipatoria o van ser una mera espresión de gatopardismu ye una cuestión tovía abierta. N’Asturies, dada l’ausencia d’actores políticos fuertes non sucursalizaos, podemos topanos otra vez con que, como nel 78, el tren de la Historia pase pel nuestru pueblu ensin que pare nél. Porque inclusive dándose un procesu constituyente que dea nun nuevu marcu políticu, esta vez sí democráticu, nun ye descartable qu’a Asturies apuerte de forma rebaxada y absolutamete subalterna. Ye posible un procesu democráticu que pase pel reconocimientu del derechu a decidir de los pueblos del estáu y qu’esi derechu se-y niegue al pueblu asturianu. Ye posible un gobiernu estatal alternativu al bipartidismu, pero que n’Asturies quede gobernando’l turnismu. Pero ye posible tamién echar del gobiernu asturianu tanto al PSOE como al PP y conformar una nueva mayoría política que desmonte’l comederu y desencadene un procesu de cambiu en beneficiu de la mayoría social. Ye posible, pero nun va venir solu, y nun va venir simplemente como resultáu de la dinámica d’arrastre del cambiu estatal, precisamente porque, como diximos más arriba, la configuración del réxime clientelar asturianu ye muncho más fuerte que n’otros países del reinuPrecisamente porque creemos que ye posible’l cambiu, entendemos que ye’l momentu de l’arrogancia, de poner los intereses colectivos perriba del llexítimu patriotismu de partíu, col envís de conformar un bloque social alternativu n’Asturies qu’axunte a tolos sectores sociales que salen perdiendo non solo cola actual crisis, sinón cola yá eterna crisis asturiana entamada nos años 80.

Dende Izquierda Asturiana (IAS) creemos que ye posible y necesaria una auténtica y fonda unidá popular de los partíos, organizaciones sociales y ciudadanes que tán fartes del réxime y qu’apuesten por un cambiu fondu de les estructures económiques, sociales y polítiques del nuestru país. Ensin arrenunciar a la llexítima crítica al papel xugáu polos distintos actores nun pasáu en delles ocasiones bien recién, entendemos que la urxencia que vive’l país fai necesario arreblagar perriba de les diferencies siempre que se faga con arrogancia.

Creemos tamién que nun ye posible’l cambiu con una simple agregación de sigles y/o personalidaes más o menos famoses. La Unidá Popular que tamos proponiendo ye de sectores, non tanto de sigles más o menos representatives de los mesmos. Falamos asina de:

  • Un llamáu a la constitución d’esa unidá popular col preste espresu de les organizaciones polítiques de la esquierda: Podemos y IU, pero tamién Equo, Conceyu Abiertu o toles demás que decidan participar del procesu. Pero nun ye cuestión solo d’organizaciones polítiques. El llamáu tien que facese tamién dende organizaciones sociales, sindicales y ciudadanes de toa triba.
  • Constitución de conceyos abiertos ciudadanos onde se pongan les llinies básiques del programa, el códigu de conducta y la estratexa política. Entendemos que tien d’haber un puntu claru: nun se trata de sacar representación pa ser el sociu minoritariu d’un gobiernu de coalición col PSOE o col PP. Trátase d’echalos a toos dos, y si nun se ye quien, a pasar a la oposición, negase a alcuerdos permanentes con naide y negociar cada midida llexislativa una a una.
  • Celebración d’unes primaries abiertes a tola ciudadanía que s’inscriba nel procesu pa ellaborar les llistes electorales de los conceyos y a la Xunta Xeneral. Tolos candidatos y candidates habrán de salir d’eses primaries.

El programa común vendrá como resultáu d’un borrador pautáu polos diferentes sectores que converxan, pero que tien de pasar per un procesu d’análisis y modificaciones nos conceyos abiertos. Creemos que tien de tener ente otres coses l’oxetivu declaráu de desencadenar n’Asturies un procesu constituyente propiu que parta de la devolución de la soberanía al pueblu asturianu –llibre pa decidir los marcos nos que queria tar inxertu– y que dea nuna constitución asturiana.

Entendemos qu’esa constitución asturiana, previsiblemente inxerta nun marcu republicanu federal, ha incluyir obligatoriamente nel so articuláu la institucionalización del presupuestu participativu, esto ye, el conceyu abiertu, tanto a nivel de conceyos como d’Asturies entera, y la soberanía asturiana nos sectores estratéxicos de la so economía. Ha d’incluyir tamién el reconocimientu de les diferentes formes de propiedá, incluyendo la estatal asturiana y la colectiva autoxestionaria. Tien de reconocer los referéndums vinculantes y articular les formes de facelos efectivos. Tien de contemplar un códigu penal propiu y la inclusión del derechu consuetudinariu asturianu nel so corpus xurídicu. Y ha incluyir, tamién, la oficialidá de les llingües d’Asturies.

D’otru llau, esi programa habrá incluyir una bona recatafila de futures midíes de gobiernu, tanto pa llevales alantre nel actual marcu institucional como nel futuru nel casu de dase. Tamos falando, por exemplu, d’una banca asturiana, de la defensa radical de la escuela y la sanidá públiques negándose a financiar con perres públiques negocios privaos. Falamos de la igualdá de xéneru. Falamos tamién de la concepción d’Asturies, en conxuntu, como una realidá natural especial que merez una política urxente y única de protección, conservación y meyoramientu del mediu ambiente, pasando al primer planu de la política asturiana la reforestación con especies autóctones, el cuidáu y esplotación racional de los montes, la nacionalización del agua y de la enerxía, en definitiva la tresformación d’Asturies nel paraísu natural del que tanto se mos faló pero que tantes veces foi poco más qu’una imaxe falsa. Falamos tamién de la tresformación d’Asturies na sociedá del conocimientu, de que la nuestra universidá tien que volver a asitiase en posiciones punteres si queremos qu’Asturies llegue a una edá dorada y vuelva a tar nel centru de toles miraes. Y falamos, cómo non, del control asturianu de los fondos europeos, del fomentu del cooperativismu, de la recuperación del mediu rural, del fin del monocultivu enerxéticu, de la inclusión social, de la igualdá de xéneru, de la fiscalidá propia, etc.

Entendemos los riesgos qu’esta propuesta tien. Nun escaecemos que les primaries abiertes, anque nel nuestru partíu yá se propunxeren va bien d’años pa hipotétiques aliances electorales amplies, comporten graves riesgos en tanto que permiten que los mass media podian modelar candidatos y condicionar resultaos, asina como que cuerren el riesgu de convertise en concursos de popularidá, pero tamién creemos que nesti momentu históricu puen ser un exerciciu de tresparencia que meta aire fresco nes estructures polítiques.

Tampoco escaecemos qu’esguiles y oportunistes añeren perdayures. Nun facemos tabula rasa de la responsabilidá que tuvieren los que formaren parte de los gobiernos asturianos per años, por muncho qu’agora bramen contra “la castra” los que formaren arguyosamente parte d’ella, pero tamién entendemos qu’anguaño lo prioritario ye desmontar el comederu.

Y nun pretendemos proponer un Big Bang qu’acabe nuna nueva fuercia política. Nun ye eso. Entendemos que les diferentes espresiones polítiques han de siguir esistiendo, col so propiu programa y la so propia estratexa, dientro d’esti marcu común y seguramente coyuntural. Nós defendemos la nuestra propia identidá como proyectu estremáu, y vamos facer por que medre, porque creemos que n’Asturies ye necesaria la esistencia d’una fuercia como IAS que:

  • Seya un proyectu soberanu, non xuncíu a dinámiques estatales, non solo no organizativo sinón tamién no programático. Nunca más los patrones ayenos aplicaos a la realidá asturiana. Queremos una esquierda que piense con cabeza propia, hasta pa equivocase. Por eso fuimos la primera y per munchu tiempu única organización asturiana n’autodefinise como soberanista.
  • Seya un proyectu republicanu, nel plenu sentíu de la palabra. Nun ye solo la defensa d’una república asturiana, inxerta o non en marcos más amplios, sinón que pa nós el republicanismu democráticu y socialista ye la base del nuestru ideariu en tanto que parte de la idea radical de democracia a tolos niveles, tanto políticu como económicu, y que combine tanto les formes representatives como les directes. Por eso fuimos los primeros en defender n’Asturies el presupuestu participativu. Pero ser republicanu ye tamién defender la ética republicana, la idea de serviciu públicu, la idea de nobleza de la política, de la participación de la comunidá d’iguales, de la denuncia de la corrupción, cáncanu de la democracia. Por eso llevamos tola nuestra historia falando del comederu y negándonos a participar d’él.
  • Faga una crítica radical de la UE y de lo qu’ello implicó p’Asturies. Nun se trata de facer denuncies retóriques a la Troika, sinón de denunciar lo que supunxo p’asturies la entrada del Reinu d’España na CEE, de cómo esi ingresu foi l’aniciu de la voladura controlada del nuestru sistema productivu, el mesmu qu’articulara, mal que bien, a la sociedá asturiana per más d’un sieglu. De cómo les organizaciones históriques y hexemóniques de la squierda asturiana, tanto política como sindical, asumieren la derrota énte’l neolliberalismu y la eurocracia a cambiu d’un carráu de millones qu’invertir n’anestesia social pa fabricar mayoríes electorales. De cómo esa  estructura que ye la UE supón un corsé neolliberal que torga cualisquier política alternativa y que polo tanto ye conditio sine qua non francer pa facer posible una democracia nel nuestru.
  • Tenga un compromisu irrenunciable cola llingua y identidá asturianes. Que nun vea les llingües del país como oxetu de mercadéu pa iguar un alcuerdu de gobiernu, que nun vea la nuestra identidá histórica y cultural como daqué vieyo a superar sinón como daqué dinámico que pon a Asturies nel mapa de la Europa de los pueblos. Que defenda y fale, de forma clara y decidida, de la oficialidá de les llingües d’Asturies.

Ye la hora de la responsabilidá. Les perspectives d’un gobiernu PP-PSOE gobernando n’Uviéu y en Madrid, aplicando servilmente les recetes de Bruxeles y Berlín, inxertándonos nel TTIP, estabilizando la crisis nel ciclu de l’austeridá perpetua y condenando al nuestru pueblu a una emigración masiva asemeyada a la de va ciento venti años son demasiao prietes como pa nun facer tolo posible por armar una alternativa a esi estáu de coses.

La llarga nueche neolliberal pue perpetuase nuna velea de sufrimientu o pue acabar nuna alborada pa los pueblos. Depende de nós. D’equí p’alantre, el cambiu ye posible.

N’Asturies, xineru de 2015.

Dirección nacional d’Izquierda Asturiana

Descargar PDF – El cambiu ye posible

Los comentarios están cerrados.