|
también en castellano
Estimáu/ada
compatriota:
N’Izquierda
Asturiana somos sabedores de les problemátiques
coles que s’atopa l’Asturies exterior.
Más de 250.000 homes y muyeres que viven
fuera de la so tierra y que, les más de
les veces, sufren l’abandonu sistemáticu
de les alministraciones públiques asturianes
y españoles. Tanto ye asina que cuasi
un terciu de les nuestres candidatures
pa estes elecciones xenerales tan compuestes por
persones que viven fuera del nuestru país,
o bien por emigrantes retornaos. Por ello, dende
IAS apostamos porque l’abegosa situación
d’estes miles de persones cambie y pa ello,
proponemos una riestra de midíes que resumimos
darréu:
1.- Creación
d’un Plan d’entidaes asturianes,
qu’englobe, non solo los centros asturianos
oficiales, sinon toes aquelles que s’esmolecen
pola cultura y faen actos de xuntura pa colos
emigrantes asturianos, que caltienen viva la nuesa
cultura, y que, por tanto, merecen el sofitu del
gobiernu asturianu pola promoción de la
so asturianía. Hai que sofitar les actividaes
culturales de la emigración asturiana ensin
diferenciar ente sociedaes “oficiales”
o non., promoviendo, en definitiva, al traviés
de subvenciones, el desarrollu de les actividaes
culturales d’interés p’Asturies
y los asturianos.
2.-
Ellaboración d’un censu real
d’emigrantes en collaboración
coles asociaciones d’emigrantes. Cualquier
midida que se quiera entamar dende les instituciones
públiques ha tener, como base de trabayu,
unes cifres fiables y actualizaes que permitan
desenrollar con efectividá polítiques
que respuendan a les necesidaes específiques
d’esti colectivu.
3.- Redacción
y execución d’un plan cultural global
que-y dea cuerpu verdaderu a l’asturianía,
cola celebración periódica y efectiva
de los Congresos Mundiales d’Asturianía
y con cursos periódicos de llingua y cultura
asturiana, p’acercar Asturies a la xente
que vive fuera y a los sos descendientes, sirviéndose
pa ello de les entidaes asturianes (“oficiales”
o non) esistentes.
4.- Incrementar
les ayudes sociales a los asturianos
na emigración que lo necesiten, faciendo
efectivu, amás, un plan específicu
pal emigrante retornáu, y facilitando que
la emigración seya una opción voluntaria
y non una obligación marcada pola falta
de futuru na nuesa tierra. L’emigrante retornáu
tien de tener derechu tamién a toles ventayes
(accesu a bolses de vivienda protexío y
ayudes sociales) que tean al algame de los asturianos
que residen nel nuestru país, ensin atender
(tal y como se fai güei) cuasi esclusivamente
a razones d’edá. Creación
d’Estatutu del Trabayador Emigráu
y puesta en marcha d’una llinia d’Ayudes
al retornu, como una Formación Profesional
específica y cursos de reclicax llaboral.
Aplicación d’un subsidiu pa la xente
retornao equivalente al SMI (Salariu Mínimu
Interprofesional) y con una duración mínima
de dos años.
5.- Desarrollu
d’un plan integral de xestión d’espedientes
que sirva pa facilitar la obtención de
la nacionalidá a los asturianos de segunda
y tercera xeneración, axilizando con ello
la tramitación alministrativa y permitiendo
que disfruten de los derechos y obligaciones que
conlleva la nacionalidá española
a la mayor brevedá posible.
Ensin otru particular,
y confiando tengas a bien danos col to votu la
oportunidá de llevar alantre los nuestros
proyectos, salúdate atentamente:
Faustino Zapico
Candidatu al Congresu por Izquierda Asturiana
(IAS)
|
