Izquierda Asturiana agradez l'apoyu de los asturianos y asturianes que sofitaron les nuestres candidatures el 14-M y fai un brinde al trabayu conxuntu nel futuru

Izquierda Asturiana (IAS) agradez sinceramente el so apoyu a les más de 1.700 persones que nos apurrieron el so votu al Senáu y les más de 800 que lo fixeron al Congresu de los Diputaos na nuesa primer presentación en solitario a unes eleiciones.

IAS entiende que la nuesa presentación a les eleiciones fíxose na pior de les circunstancies posibles depués de la masacre de Madrid y la fola de votu anti-PP que xeneró un corrimientu de votu escontra'l PSOE y IU. Esi corrimientu fixo que la nuesa posible espectativa de votu amenorgara de forma bultable, anque los votos coyíos pal Senáu (más de 1.700 votos) y la llamatible diferencia ente Congresu y Senáu, que nun tien comparanza cola d'otros partíos, demuestren unes cifres de simpatía pequeñes pero abondo mayores que les que enseñen los 800 votos algamaos nel Congresu.

Los resultaos en términos de votos son perprobes, cuasi insignificantes nel contestu global de la política asturiana. Sicasí, los oxetivos d'IAS en nengún momentu se cifraben, como diximos cuando anunciamos la nuesa presentación a esta convocatoria, n'algamar una cifra concreta de votos, sinon en poner en marcha la nuesa estructura de partíu, dar a conocer la sigla, convertinos nun espaciu políticu referencial de futuru non vinculáu necesariamente al resultáu final d'estes eleiciones y asitianos como un actor más nel campu del nacionalismu políticu y del asturianismu d'izquierdes, aportando un discursu, por construyir ente toos y toes d'agora en delantre, que pueda algamar nun futuru mayoríes sociales y graos de representación importantes.

La insignificancia -predecible primero de les eleiciones- de votu asturianu nel so conxuntu, tien de facer reflexionar al conxuntu de los partíos qu'intenten ocupar o criar un espaciu asturianista nel nuesu país. IAS comprometése a facer de forma posada esa reflexión y sacar les lleiciones pertinentes pal futuru inmediatu.

A toos y toles que s'enfotaron en IAS, pa toos y toes los que nos apurrieron el votu o firmaron el nuesu manifiestu, a toos y toles que nos manifestaron les sos simpatíes anque finalmente dieren el so votu a otres opciones por un respetable entendimientu de lo que ye'l "votu útil", a toles persones que trabayaron con nós o que tuvieron con nós nesta campaña... dámos-yos unes gracies sinceres y asegurámos-yos qu'IAS sigue trabayando con más gana y enfotu nel futuru que nunca, que nun los vamos defraudar, qu'esto ye namás el principiu del camín y que vamos facer tolos posibles y falar con toles fuercies y persones que seya mester, dende perspectives de xenerosidá y respetu mutuu, pa que'l nacionalismu asturianu pueda tener opciones dignes y qu'aspiren a porcentaxes de representación y votos apreciables nes eleiciones municipales y asturianes de 2007.

Facémoste un brinde pa que si compartes esti enfotu, dende les tos posiciones, dende dientro o fuera d'IAS, trabayes con nós dende yá nesi mesmu sen.

Estaya de Comunicación d’Izquierda Asturiana (IAS)
Uviéu a 16 de marzu de 2004.