también en castellano

MIAS prensentó les 21 propuestes moces

El programa mozu contién 21 propuestes referentes a estremaos ámbitos

Na mañana del vienres, Carlos Suari, Coordinador de Mocedá d'Izquierda Asturiana (MIAS) y candidatu al Congreso de los Diputaos por Izquierda Asturiana (IAS), y María Cueto, Secretaria Xeneral de MIAS presentaron a la opinión publica asturiana'l programa xuvenil “21 propuestes pa una mocedá del sieglu XXI” nel Conseyu de la Mocedá del Principáu d’Asturies. Esti programa, desenrolláu tres un fondu períodu de debate por MIAS foi ratificáu pola Dirección Nacional de Izquierda Asturiana pa que s'incluyera dientro de les llínees programátiques del partíu y nos materiales de campaña, ente los que s'ancuentren les webs nes que ya tá disponible'l “Programa Mozu” www.ias.as y www.faustinozapico.com, toles dos pertenecientes a la campaña electoral de IAS.

Acordies colo qu’explicó Carlos Suari, el “Programa Mozu” va presentase al mayor númberu posible d’agrupaciones xuveniles, asina como organismos sociales y políticos que manifiesten interés polos temes de mocedá.

La Secretaria Xeneral de MIAS, María Cueto, aseguró que l’adopción de les midíes propuestes nel “Programa Mozu” diben venir a introducir una rabasera d’aire fresco dientro del panorama de dinámiques inmovilistes d’anguaño en materia de política moza que refuercen l’estancamientu o involución en bien d’aspectos qu’afecten dafechu a la mocedá d’Asturies. “Nun atopamos agora mesmo n’Asturies iniciatives que, como ésta, remanecen de los propios mozos como frutu de la reflexón, l’análisis y la concrección y que son llevaes a los estamentos políticos que los asumen y defenden. Representa una verdadera alternativa na forma de facer política moza con capacidá de representación”, solliñó Cueto.

Pela so parte, Carlos Suari, comentó’l conteníu del programa, estremáu en 5 partes (Desenvolvimientu, Bienvivir, Llibertá, Asturies y La to voz) y 21 propuestes que falen, según afirmó’l Coordinador de MIAS, “A les clares, ensin dobles intenciones, cola sinceridá y el compromisu que da ser mozu na Asturies del 2004”. Recalcó Suari tamién nel calter interactivu de la campaña, na que, pel corréu electrónico mias@ias.as, cualquier mozu pue facer llegar la so propuesta a Mocedá d’Izquierda Asturiana. El candidatu d’Izquierda Asturiana dixo tar “percontentu cola gran participación y interés que ta amosando la mocedá que nos visita al traviés de les webs”.

Dirección Nacional
Mocedá d’Izquierda Asturiana (MIAS)
Uviéu, 27 de febreru de 2004.