NOTA INFORMATIVA

Nestos momentos tamos actualizando la web nacional d'Izquierda Asturiana amás de les secciones locales. En prósimos díes www.ias.as volverá a tar con vosotros y vosotres como davezu.

Queremos saber la verdá

12/03/2004 La contradicción nes versiones oficiales sobre l’autoría de los atentaos d’ayeri en Madrid tan creando ente la ciudadanía y ente les persones que militamos y ocupamos responsabilidaes n’Izquierda Asturiana una sensación d’engañu y d’utilización política de los llamentables socesos qu’acabaron cola vida ­hasta’l momentu- de 199 persones énte la que nun podemos callar.

Cuando los partíos políticos decidimos pesllar la campaña electoral, nós ficímoslo dafechu, pero vemos con vergüenza como’l partíu en gobiernu quixo xugar a envolvese na bandera "nacional" con un claru envís electoral. Actuaciones como la del ministru Acebes aneciando en qu’atribuyir l’atentáu a quien nun fuere ETA yera una “intoxicación interesada” abúltennos d’una torpeza inxustificable, agora que les prebes sobre l’autoría apunten n’otres direcciones, neto qu’atribuyir a ETA, tradicional espantayu que ximielga’l PP pa meter mieu a la sociedá civil, l’autoría del atentáu ensin prebes definitives pa ello.

Evidentemente, nos nun somos quien pa dicir quien fizo esta masacre, pero en nome de la democracia pidimos al gobiernu qu’asoleye tola verdá sobre l’autoría del crime enantes del domingu. Non facelo asina dempués d’echar un día enteru aporfiando n’atribuciones qu’agora paecen enquivocaes sedría una estafa electoral y moral.

Izquierda Asturiana (IAS), énte’l brutal atentáu terrorista d’esta mañana en Madrid, quier manifestar la so más profunda refuga, condena, ascu ya indignación pola barbarie que asoló al pueblu de Madrid y de tol Estáu Español. Nestos momentos tan desesperanzadores queremos amosar el nuestru apoyu moral a les víctimes y a los sos familiares, esperando que la sangre derramada nesti día aciagu seya la última que se vierta por causa del terrorismu.
Igualmente, dende Izquierda Asturiana queremos facer un llamáu a la calma y a la reflexón sobre esti fechu llamentable y afalar a la población asturiana a mostrar la so solidariedá coles víctimes y a participar masivamente nes urnes el próximu 14 de marzu.
IAS pide tamién al conxuntu de les formaciones polítiques del estáu que, nestos dramáticos momentos, nun faigan usu políticu del sufrimientu de les víctimes.
Por último, como señal de duelu coles víctimes queremos dar anuncia de la suspensión de toles actividades de campaña que IAS tenía previsto primero de les elecciones xenerales del domingu.

IAS defende nel so programa del 14-M el cumplimientu del protocolu de Kioto y un desenvolvimientu p’Asturies sostenible, autocentráu y endóxenu

10/03/2004 Izquierda Asturiana (IAS) inclúi nel so programa electoral un refileru de propuestes y análisis que dan respuesta y contrapuntu al pensamientu dominante ente los partíos parllamentarios asturianos al respective de la necesidá de “desenvolvimientu” como sía ensin entrar a matizar razones y consecuencies del mesmu.
[más..]

IAS sigue recorriendo Asturies presentando les sos propuestes

6/03/2004 IAS va visitar nos prósimos dellos puntos de la xeografía del país. Candidatos y candidates del partíu van visitar conceyos como Nava, Xixón o Piloña.
[más información n'axenda]

El Manifiestu electoral d'IAS recibe más apoyos al travies de la web.

5/03/2004 El Manifiestu de sofitu a la candidatura d'IAS que consta de la firma de 100 persones representatives del asturianismu y de la izquierda social, ta recibiendo nuevos apoyos al travies d'esta web electoral. Dende IAS queremos agradecer a toles persones que nos tan apoyando el so compromusu pola construcción d'una alternativa asturianista y d'izquierdes. Darréu van dellos de los apoyos que nos tan llegando estos últimos díes:

• José Manuel Suárez Rodríguez (Asesor fiscal y ex-secretariu de l'agrupación asturianista de Villaviciosa).
• Susana Rodríguez Sela (Llibrera)
• José Enrique Fernández (Empresariu de turismu rural)
• Álvaro Arias Cabal (profesor de Filoloxía y delegáu sindical de CCOO)
• Mel Arki Sampedro García (empleáu alministrativu)
• Lucía Vega Fuentes (maestra de llingua asturiana)
• Chus Coto (abogáu na emigración)
• Fonso Flores (Estudiante de Ciencies Polítiques y de l´Alministración)
• David Varela (músicu y artesanu)
• José Suárez Arias-Cachero, "Felechosa" (empresariu)
• Silvia García (chigrera, Trisquel)

[Ver manifiestu y firmantes orixinales]

Vienres 5 . IAS visita Pravia y Cuideiru

3/03/2004 IAS va visitar mañana Pravia y Cuideiru nel so andar pela xeografía del país. Tamién va tar n'Uviéu.
[más información n'axenda]

Xueves 4 . IAS visita l'occidente asturianu.

3/03/2004 Cangas, Tinéu y Salas son los conceyos que visita mañana xueves Faustino Zapico y otros miembros de la candidatura d'IAS.
[más información n'axenda]

Miércoles 3. IAS va visitar L'Entregu y Piedrasblancas.

2/03/2004 Miembros d'Izquierda Asturiana van visitar los mercaos de L'Entregu y Piedrasblancas.
[más información n'axenda]

Faustino Zapico intervién nun debate en TeleAsturias

2/03/2004 Faustino Zapico, candidatu al congresu por Izquierda Asturiana (IAS) participo esta nueche nun debate nel programa "Ventana Crítica" de TeleAsturias. Nesta ocasión el el tema tratáu yera "Seguridá Ciudadana" participando PSOE y IU.

El candidatu d'IAS, Faustino Zapico, fexo una intervención mui diferente a les que nos tienen avezaos IU y PSOE de crítica al gobiernu de Jose María Aznar poniendo como igua a tolos problemes l'aumentu de les plantilles de los cuerpos de seguridá del estáu.

Zapico basó la so intervención nuna visión asturiana faciendo un apueste pola descentralización de los servicios de seguridá, criticando la privatización encubierta y nel que la policía autonómica xugare un papel protagonista. D'otra parte, tamién recordó que ye per importante que la llabor de les fuercies de seguridá tien de ser el de la prevención y la educación, actuando sobre la problemática del país dende una perspectiva y un analís autónomu. Asina mesmo, comentó como la desmilitarización de la Guardia Civil, y la so fusión cola Policía Nacional meyoraría la so eficiencia.

La polémica saltó al criticar el portavoz d'IAS la hipocresía reinante en temes como la despenalización del cánnabis, que nun fai otro que detrayer recursos a cuestiones verdaderamente peligroses como la violencia de xéneru o a los menores. Énte ésta intervención el portavoz del PSOE perdió dafechu los papeles venceyando'l consumu del cánnabis a los "auténticos cuadros humanos que podemos encontrar a 100 m. de aquí".

MIAS presentó les "21 propuestes moces"

29/02/2004 Na mañana del vienres, Carlos Suari, Coordinador de Mocedá d'Izquierda Asturiana (MIAS) y candidatu al Congreso de los Diputaos por Izquierda Asturiana (IAS), y María Cueto, Secretaria Xeneral de MIAS presentaron a la opinión publica asturiana'l programa xuvenil “21 propuestes pa una mocedá del sieglu XXI” nel Conseyu de la Mocedá del Principáu d’Asturies. Esti programa, desenrolláu tres un fondu períodu de debate por MIAS foi ratificáu pola Dirección Nacional de Izquierda Asturiana pa que s'incluyera dientro de les llínees programátiques del partíu y nos materiales de campaña, ente los que s'ancuentren les webs nes que ya tá disponible'l “Programa Mozu” www.ias.as y www.faustinozapico.com, toles dos pertenecientes a la campaña electoral de IAS ...
[más..]