|
también en castellano
Ésta ye
la tuya
 El
14 de marzu celébrense les elecciones xenerales,
y la ciudadanía asturiana paez condergada
a elexir los sos representantes ente los mesmos
responsables de la so situación. Izquierda
Asturiana (IAS) preséntase a estes
elecciones porque entendemos que les fuercies
polítiques que lleven venticinco
años dominando la política asturiana
non solo nun son a resolver los problemes del
nuestru país, sinón que tienden
a facelos más graves tovía, cuando
non a criar otros nuevos.
Nun fai
falta ser un espertu pa decatase de les graves
carencies de la sociedá asturiana: ca añu
que pasa menos empléu (tenemos la tasa
d’actividá más baxa de la
UE, yá que namás trabaya un 30%
de la población), el qu’hai ye ca
vuelta más precariu, y miles d’asturianos
y asturianes, sobre too xente mozo y mui
cualificao, tien qu’emigrar fuera
d’Asturies pa ganase la vida. Asistimos
impotentes a la voladura controlada de los sectores
tradicionales que puxaron pola economía
asturiana, ensin que nueves alternatives xeneradores
d’empléu y riqueza vengan a sustituyilos,
lo que fai que munchos y munches de les persones
que deciden o nun tienen más remediu que
quedar n’Asturies vean empeorar
les sos condiciones de vida y la precarización
de los sos trabayos. Padecemos la privatización
adulces de los servicios públicos, que
son la base de la solidariedá social. Sigue
la estroza mediuambiental con nueves actividaes
económiques altamente contaminantes, obres
d’infraestructures faraóniques o
un urbanismu xabaz. Los elementos que conformen
la nuestra identidá colectiva como pueblu,
y mui especialmente la llingua, cuerren seriu
peligru ente la indiferencia absoluta de la clase
política, y frente a too eso, topámonos
con que les instituciones asturianes nun tienen
la menor capacidá rial pa decidir sobre
toes aquelles cuestiones qu’afecten al nuestru
futuru colectivu: güei más
que nunca les decisiones sobre Asturies tómense
en Madrid y en Bruxelles.
Vivimos nuna
Asturies improductiva onde se-y paga a della xente
más por nun trabayar que por trabayar,
onde los fondos que tenín que valir pa
rexenerar l’actividá productiva que
permitiere una recuperación económica
y social d’Asturies úsense en caltener
infames redes clientelares qu’alimenten
el votu cautivu, anestesien la opinión
pública y afueguen les espresiones más
dinámiques de la sociedá civil.
Vivimos nun país subvencionáu polos
mesmos que dinamitaron l’actividá
económica y pretenden agora reprochanos
que nun la tengamos.
Les persones
que formamos Izquierda Asturiana (IAS)
apostamos por otra Asturies, una Asturies productiva,
basada na rexeneración del texíu
económicu baxo criterios de sustentabilidá
y col envís de xenerar condiciones sociales
que permitan tornar la sangría
demográfica y la marxinación d’amplios
sectores sociales. Pa qu’esa otra
Asturies seya posible, necesitamos otru modelu
políticu: cuando tamos a puntu d’entrar
nun nuevu debate sobre la configuración
territorial del Estáu, Asturies
nun pue ser como hai venticinco años la
convidada de piedra que llega tarde y tien que
conformase coles migayes que dexen otros. Defendemos
un nuevu procesu constituyente del que salga un
marcu políticu nel qu’Asturies tenga
capacidá d’autogobiernu rial,
basada nuna soberanía fiscal, pa con ello
tener la capacidá financiera
p’aplicar polítiques redistributives
socialmente avanzaes y integradores. Los partíos
que dende hai venticinco años dominen la
política asturiana, PSOE, PP y
IU, aparte de declaraciones que nunca
s’acompañen de fechos, siguen apostando
por un modelu de relaciones col Estáu
que perpetúa la sumisión y afuega
les potencialidaes d’esti país.
Vamos asistir
a una campaña mui polarizada y basada na
falsa elección ente la derecha (PP) y una
presunta izquierda (PSOE y subalternos)
tan cobarde como pa nun cuestionar dende’l
raigañu el discursu dominante. Ente una
derecha ensin complexos y una izquierda acomplexada.
Ente una derecha y una presunta izquierda que
tienen en común escaecer les sos promeses
electorales al otru día de tar en gobiernu.
Ente una derecha y una presunta izquierda igual
de sucursalizaes y d’impotentes
pa pensar en clave asturiana. Dende Izquierda
Asturiana (IAS) creemos que ye indispensable
francer esa dinámica y apostar por nueves
alternatives.
Nesta campaña
vamos ver constantes llamaos al votu útil.
Efectivamente, ye útil votar al PP pa que
nun gane el PSOE, y votar al PSOE (y a los sos
subalternos) pa que nun gane’l PP. Pa los
empresarios beneficiarios del comederu,
los políticos funcionariales y los emprendedores
de la estafa ye útil votar al PSOE o al
PP, porque defenden les polítiques neolliberales
que tan bien-yos vinieron estos años. Pero
pa una moza emigrante, un trabayador en precario
o un autónomu afogáu polos impuestos
y la competencia de les grandes cadenes transnacionales
nun ye útil votar polos que son
responsables de la so situación.
Nun ye útil votar a quien cree que’l
pueblu asturianu ye un eternu menor d’edá
pa decidir el so futuru. El votu útil ye’l
que val pa cambiar les coses. Y votando
al PP o al PSOE y subalternos les coses nun van
cambiar, sinón quedar igual. O
pior.
Yá ye
hora de que nunes elecciones xenerales falemos
de llevar los problemes d’Asturies a Madrid
y non de que los problemes de la clase política
en Madrid seyan los que marquen la nuestra axenda.
Izquierda Asturiana (IAS) preséntase
a estes elecciones col slogan "Ésta
ye la tuya" pa tresmitir un doble mensaxe:
qu’esta ye la to izquierda,
la que quier el poder pa la mayoría
social asturiana, y qu’ésta
ye la to oportunidá pa que te sientan bien
fuerte dici-yos que yá valió
de más de lo mesmo. Col to votu,
y col to compromisu.
Faustino Zapico
Candidatu nº 1 al Congresu de los Diputaos
por Izquierda Asturiana (IAS)
|
