Énte’l nuevu contestu políticu

Manifestación. sábadu 7 de xunu, a les 19'00 hores na Plaza América d'Uviéu.

Manifestación. sábadu 7 de xunu, a les 19’00 hores na Plaza América d’Uviéu.

L’anuncia de la próxima abdicación del heriede de Francisco Franco na xefatura del Estáu, Juan Carlos de Borbón, abre definitivamente un nuevu tiempu políticu onde toles posibilidaes empiecen a ponese enriba la mesa.

L’abdicación, o más bien anuncia de la mesma, darréu que’l monarca nun va facelo hasta que nun se-y garantice la impunidá, ye un intentu de la oligarquía vencedora de la guerra civil, esa mesma oligarquía que punxo nel poder a Franco y fixo lo mesmo col réxime monarco-lliberal de 1978, de retomar el control social que taba perdiendo de forma acelerada. Si les Marches de la Dignidá del 22 de marzu amosaron qu’había una masa social pidiendo yá un cambiu de réxime, el resultáu de les elecciones al Parllamentu européu del 25 de mayu, onde per primer vez a nivel estatal el turnismu bipartidista nun llegó al 50% de los votos, y n’Asturies les fuercies a la esquierda del PSOE saquen más votos qu’esti, amosaron que’l nivel de la representación política tamién taba siendo tomáu polos partidarios, con tolos matices que se querian, del cambiu de modelu. El recambiu de Xuan Carlos I por Felipe VI nun ye otro que facer por recuperar la falsa épica de la Transición pa intentar una nueva operación restauracionista que dexe ensin tocar los encontos del poder económicu y políticu del Reinu d’España. Necesiten facelo agora porque saben que la desafección va dir a más, y que les Cortes españoles salíes de les elecciones de 2011 son les caberes del bipartidismu hexemónicu. Tienen poco un añu xustu pa rematar la operación, enantes de les elecciones municipales y autonómiques, pa intentar desinflar el globu republicanu.

Énte eso, el campu popular tien de presentar una respuesta unitaria. Izquierda Asturiana (IAS) nun comparte la propuesta del referéndum sobre monarquía o república que planteguen dellos sectores de la esquierda. Nun la compartimos porque nel actual ordenamientu constitucional español los referéndums nun son vinculantes, sinón meramente consultivos, y polo tanto nun tienen fuercia llegal nenguna. Ensin entrar a valorar cómo ye posible esta situación, vemos que ye un error centrar la propuesta nun referéndum qu’amás da una llexitimidá que nun tien a la Constitución de 1978. Lo qu’hai qu’esixir na cai ye l’apertura d’un nuevu procesu constituyente, qu’implique los procesos constituyentes de los países del reinu pa que nel exerciciu de la so soberanía definian los nuevos marcos de convivencia. Asturies, como parte constituyente del estáu español modernu en tanto que comunidá política soberana en 1808, tien de ser ún d’esos suxetos políticos que soberanamente decidan el so futuru.

Izquierda Asturiana (IAS) comprométese a trabayar nesa dirección, y a facelo unitariamente. Facemos un llamáu a tolos sectores que defenden que’l futuru del pueblu asturianu tenemos que lu decidir los ciudadanos y ciudadanes d’Asturies, a facer tolos intentos posibles pa qu’Asturies nun seya otra vuelta, como va cuarenta años, el convidáu de piedra na ellaboración del nuevu réxime. Güei ye más posible que nunca dende va munchu tiempu.

A emburriar hasta valtar
Fuercia y unidá hasta la victoria

Izquierda Asturiana (IAS)

Los comentarios están cerrados.