Escocia, ama del so futuru

El referéndum que va celebrase n’Escocia mañana xueves 18 setiembre marca un enantes y un depués na Historia d’esti país, sinón tamién de la Europa occidental. Per primer vez, una nación de la UE va decidir llibremente si quier siguir formando parte o non d’otru estáu nel que ta inxerta dende va sieglos. Nun ye novedá nel continente, dao qu’esa triba de consultes yá se fixeren en dellos países de la Europa oriental de la qu’esbarrumbó’l bloque socialista, pero sí nesta parte del mesmu que tanto presume de democracia hasta’l puntu d’invadir o bombardiar países pa, supuestamente, imponela.

La votación de mañana ye’l resultáu d’un procesu d’acumulación de fuercies qu’empecipia nos años setenta del sieglu XX y que tuviera fuertes avances y retrocesos. A diferencia del procesu soberanista catalán, onde Mas y CiU acabaron apuntándose a un movimientu que yá taba en marcha pa que nun los llevara per delantre, nel escocés son el gobiernu y el partíu que lu sustenta, el SNP, los motores del procesu, al frente d’una amplia movilización de la sociedá civil. Con un final inciertu mañana, yá ta claro que yá nada va ser igual vencia la opción que vencia pero’l trunfu del SÍ a la independencia pue tener unes consecuencies perimportantes pa los pueblos de la Unión.

El Reinu Uníu ye una de les grandes potencies imperialistes del planeta. Anque yá nun ye lo que yera, y agora xuega más el papel de segundón de los USA, sigue siendo una de les potencies centrales del capitalismu global, qu’en gran midida inventaron ellos. Una rotura d’esi esllabón de la cadena imperialista, que nun ye precisamente’l más débil, tendría consecuencies perpositives pa tolos pueblos d’Europa, porque:

a. El procesu soberanista escocés, nun siendo un procesu hexemonizáu nin pola esquierda nin poles clases populares, tien de toles maneres un claru componente democráticu, onde la independencia vese como una forma d’escapar a la velea thatcherista que lleva trenta y cinco años apoderando Gran Bretaña. La defensa de la independencia faise en nome del derechu a poder llevantar una democracia redistributiva, alloñada amás de les aventures militares britániques. Anque’l SNP fore esnidiando nestos meses pa la derecha prometiendo la permanencia de la monarquía británica, la llibra esterlina y la OTAN, hai una fuerte alma republicana, democrática y pacifista nel bloque independentista que va ser mui revesosa de tornar de ganar el sí.

b. Constitúi un exemplu de democracia, gane la opción que gane. Sigue siendo un procesu d’autodeterminación, independientemente del resultáu, en plena Europa occidental, dexando ensin argumentos a los que nieguen talu derechu afirmando que namás existe pa los pueblos colonizaos d’otros continente.

c. Ruempe l’equilibriu internu de la UE, dao que l’exemplu escocés animará ensin dulda a otros procesos nacionales yá maduros, como’l flamencu o’l catalán, y pondrá a la propia Unión nuna situación revesosa nun momentu históricu en que la UE ye l’enemigu qu’hai que valtar.

La contraofensiva del gobiernu británicu nos últimos meses foi la de facer concesiones, prometiendo a Escocia lo mesmo qu’esta reclamaba va años, y que na práctica implicaba la conversión d’esti país nun estáu llibre asociáu, con plena soberanía fiscal. Gane la opción que gane, el pueblu escocés va ver aumentáu el so techu de soberanía, y eso va permitir siguir acumulando fuercies. Esa estratexa amuesa amás que pa ganar daqué hai qu’esixilo too.

D’otru llau, ye mui de reconocer l’actitú de la gran mayoría de la esquierda británica, non solo reconociendo’l derechu del pueblu escocés a decidir el so futuru, sinón defendiendo abiertamente’l sí a la independencia, amosando asina non solo un auténticu espíritu internacionalista y democráticu, sinón una gran intelixencia al dase cuenta del güelpe que supón pa la oligarquía británica la perda d’Escocia y los sos xacimientos de petróleu, asina como’l proyectu redistributivu que ta na base del argumentariu de los partidarios del sí.

Munchos son los riesgos, evidentemente. La independencia por sí sola, bien lo sabe’l pueblu irlandés, de poco val si sigue’l mesmu sistema social depredador y bona parte de les llaves de la soberanía permanecen en manes britániques, empezando pela moneda. Evidentemente, pasar de ser siervos de Londres a selo de Bruxeles –o más bien solo de Bruxeles- nun ye en sí mesmu un gran avance. L’avance ye que la capacidá de decisión tea en manes del pueblu escocés, y que podia siguir tando. Esi ye’l retu, y la obligación de tolos demócrates ye encontalu ensin duldes. Tolos pueblos tienen derechu irrenunciable a ser únicos amos del so futuru. Escocia ta güei mui cerca d’algamalo. Dende Asturies namás podemos querer que lo seya y lluchar pa selo nós tamién.

Dirección Nacional d’Izquierda Asturiana (IAS)

Los comentarios están cerrados.