Nun ye namás un anacronismu llingüísticu. Nun ye una cuestión terminolóxica. Anque de la Revolución francesa p’acá, la condición de “ciudadanu” se contraponga dialécticamente a la de “súbditu”: Ciudadanu yera polo tanto la persona con derechos políticos integrada nuna comunidá, por oposición al súbditu que debía sumisión a un monarca. Uno ye l’autoridá del pueblu organizáu y dotáu d’una espresión política y lo otro vivir sometíu a una autoridá que n’última instancia provién d’un poder divinu, sobrenatural y tresmitíu por vía consanguínea. Nel Estáu español -perdón, n’El Reinu d’España, que ye lo que pon nel documentu d’identidá y nos pasaportes- llevamos treinta y picu años sintiendo les mesmes disculpes non pidíes, les mesmes esplicaciones absurdes que nos cuenten la vieya película. A saber “En realidá, anque nun lo ponga, somos ciudadanos; el rei reina pero nun gobierna; esto ye una monarquía republicana; lo importante ye que tamos nun Estáu de derechu, etc. etc. Quixeron facenos vivir creyendo na cuadratura del círculu y baxo la llei del silenciu amazcaráu de “consensu”. Pues mirái, non. Esta película tien un guión escritu polos protagonistes de la Dictadura franquista, dictáu polos mesmos poderes económicos qu’engordaron al calor d’ella pa poder siguir chupando’l sangre de la xente que vivimos del nuestru trabayu. Onde tolos que nun somos parte d’esa nobleza moderna qu’agora dellos llamen castra, tamos condergaos a ser simples espectadores. Pagamos la entrada cada cuatro años, pero la película ye la mesma. Llegaos a esti puntu, somos yá mayoría los que tamos fartos y nun nos resignamos al papel d’espectadores. Ye hora de ser protagonistes, o polo menos actores.

IAS apoya y llama a participar nes marches y movilizaciones contra la monarquía. Dicímoslo bien claro: Tamos contra la propia existencia de la monarquía. Siempre lo tuviemos. Danos ascu’l papel reserváu a Asturies dientro d’esta comedia casposa. IAS afirma que tola parafernalia qu’arrodia a les celebraciones de los premios “Príncipe” igual que tolo rellacionao cola institución monárquica nun ye namás una pantomima digna de la Edá Media: Ye la consagración d’un sistema estructuralmente corruptu, antidemocráticu, falsu, excluyente y absurdu. Llamamos a participar nel Foru Social que va ser güei xueves y nes marches que van llegar a Uviéu mañana vienres, asina como nes movilizaciones de la tarde. Persabemos que suponen un desafíu tanto a la institución monárquica como al nuevu monarca, y denunciamos por ello los intentos dende’l turnismu de deslexitimar la protesta social. Persabemos tamién que’l poder necesita poder abrir los telediarios de mañana con noticies que falen de “la violencia” pa poder tapar que l’Uviéu de los premios Príncipe va tar desbordáu por una manifestación republicana.

Al mesmu tiempu, tampoco podemos dexar d’espresar que nun mos gusten munches de les formes nes que s’espresa esti rechazu per parte de los protagonistes de les protestes. Como ciudadanos que nos reclamamos d’una comunidá humana llamada Asturies y como conocedores de la so llaceriosa historia contemporánea nun puede prestanos poles bones nin podemos tar del too agustu colo que tal recuerda una “toma d’Uviéu” per parte de les tropes d’un Foru Social nel qu’Asturies solo pon l’escenariu. Nun existe o nun tien pesu visible la nuestra realidá nacional. Pero tamién reconocemos qu’eso ye asina pola propia debilidá del movimientu asturianista pa incorporar los derechos que nos asisten como pueblu a l’axenda de CIUDADANÍA que representen estes protestes.

Ello nun quita pa que pongamos los nuestros brazos al llau de los que, como nosotros, yá nun creen en cuentos de príncipes y princeses. Leonor, váyase per onde vieno.

Estos cuentos yá fieden. Lleven demasios años fediendo.