IAS ÉNTE LA REFORMA ESTATUTARIA

WhatsApp Image 2022-01-24 at 21.08.22

Dende que’l gobiernu presidíu por Adrián Barbón entamara’l procesu, Asturies lleva meses enserta na dinámica de negociaciones multipartidaries pa intentar sacar alantre una reforma estatutaria que, llevando selmanes paralizada, paez quedar en vía muerta depués de la salida de Foro Asturias. Nun ye un problema pequeñu yá que, pa qu’esa hipotética reforma salga alantre nesta lexislatura, cumplir los plazos ye perimportante. De nun s’aprobar na Xunta Xeneral esa reforma a lo más tardar en xunu d’esti añu 2022, les posibilidaes de que dea tiempu a que se vote nes Cortes españoles, qu’acaben la lexislatura na seronda de 2023, son mínimes por nun decir nules.

  1. EL MARCU INSTITUCIONAL

La Constitución de 1978 afitó un modelu d’estáu unitariu (esto ye, la soberanía pertenez al “conxuntu del pueblu español”) pero descentralizáu, que permite l’autonomía de los territorios que la soliciten, y a los que se-yos da (y se-yos quita si se ve necesario, como se vio na aplicación del artículo 155 a Cataluña) una riestra de competencies. Nun ye, polo tanto, l’español un estáu federal por muncho qu’anecien en dicínoslo, tracamundiando a costafecha federalismu y descentralización, conceptos que suelen dir xuncíos pero non siempre. Asina, hai estaos unitarios mui descentralizaos, como la República Sudafricana, y estaos federales bastante centralizaos, como la Federación Rusa). L’español ye, efectivamente, un estáu descentralizáu, pero por cesión voluntaria del poder central.

Esa mesma Constitución afitó dos víes d’accesu a l’autonomía: la rápida (art.151) y la lenta (art.143). Permitióse acceder a la vía rápida a los territorios que teníen aprobáu un estatutu en tiempos de la II República, anque nun llegare a entrar en vigor, más el casu andaluz, por estratexa política del PSOE. Los demás tuvieron qu’acceder pela vía lenta, como foi el casu d’Asturies, con dos escepciones: Navarra, que tuvo la so propia vía, y Madrid, qu’accedió pela vía escepcional. La diferencia del puntu de partida nun tenía por que selo nel puntu de llegada, esto ye, nel techu competencial a algamar poles distintes CCAA. Pero’l casu ye qu’acabó siéndolo, xenerando agravios y distorsionando’l debate.

Nos años 90, en virtú del pautu autonómicu de 1994 robláu ente’l PP y el PSOE entamó un procesu de reforma estatutaria qu’aumentó enforma’l techu competencial de les autonomíes del 143. Asturies tuvo tres reformes: en 1991, 1994 y la más importante en 1999.

Na primer década del sieglu XXI, con motivu de la reforma del estatutu catalán, abrióse un nuevu procesu de reformes estatutaries, que n’Asturies acaba en 2008 ensin alcuerdu y polo tanto ensin reforma, al negase PSOE y PP a aceptar la oficialidá del asturianu. Hubo 8 CCAA que sí reformaron los sos estatutos y algamaron nueves competencies, quedando otra vez Asturies con una autonomía devaluada. Asina, la necesidá d’una reforma estatutaria fonda p’algamar nueves competencias que sí tienen otres CC.AA. pero Asturies non ye evidente pa encarar procesos como la xestión de la crisis provocada pola andancia de la COVID-19 y de los fondos europeos que tán llegando, ente otres cuestiones.

  1. EL CONTESTU POLÍTICU

El cambiu de postura de la FSA sobre la oficialidá del asturianu después del so XXXII congresu en 2017, asina como la necesidá de poder acceder a les competencies frustraes pol fracasu de 2008, faen qu’en 2021 s’abriera un nuevu procesu de reforma, onde’l focu ta puestu interesadamente na cuestión llingüística.

El nuevu procesu vieno marcáu pola priesa, dao que’l calandariu de negociaciones vien enforma apertáu nel tiempu pa qu’hebia marxen abondu p’aprobalu na Xunta Xeneral y mandalu a Madrid pa ver si s’aprueba na presente lexislatura, qu’acaba na seronda de 2023. Nun debemos escaecer que l’estatutu asturianu, como los demás, ye una llei orgánica de les Cortes españoles, y que d’aprobase n’Asturies entraría en Madrid como un proyectu de llei orgánica más, detrás de los proyectos de llei que llegaron primero. Por eso la priesa ye tanta, porque andáu’l mes de xineru les posibilidaes de que pase’l trámite parlamentariu n’Asturies anantes de xunetu pa qu’entre en Madrid con un marxe de tiempu mínimu pa que se trate nesta lexislatura son remotes. Nesto tien bona responsabilidá’l gobiernu asturianu, yá que nun empezó a falar en serio de reforma hasta setiembre de 2021, pasaos yá dos años de lexislatura. ¿Acasu cambiara la composición del parlamentu de 2019 p’acá? Non. Dende marzu de 2020 la COVID-19 foi la sida perfeuta pa nun facer nada nesti y n’otros temes, porque tol llabor del gobiernu tuvo centráu na xestión de l’andancia. D’otru llau, ta la crisis de Foro Asturias, partíu que llevaba nel so programa la oficialidá y que sacó 2 escaños na Xunta Xeneral, pero que lleva rotu dende poco después de les elecciones de 2019, siendo ún de los diputaos contrariu dafechu a la reforma y l’otru, anguaño secretariu xeneral, favorable pero que quier vender el so apoyu a la mesma a cambiu de modificaciones lexislatives que nada tienen que ver col estatutu.

  1. ASTURIES NUN NECESITA UN ESTATUTU, NECESITA UNA CONSTITUCIÓN

Asturies, más qu’una reforma del actual estatutu, o unu nuevu dafechu, necesita una constitución. Esta afirmación, que pue abultar estraña viendo l’actual marcu políticu y la correlación de fuercies, nun ye ningún brinde al sol, sinon l’alternativa razonable al actual estáu de coses qu’IAS bien defendiendo dende la so fundación. Si fuera verdá, que nun lo ye, que l’español ye un estáu federal les partes integrantes del mesmu tendríen constituciones nacíes de la so soberanía popular, non estatutos que son una llei otorgada pol poder central. Siguimos, y vamos siguir, reivindicando’l reconocimientu de la soberanía política del nuestru pueblu, que tien que tener como expresión institucional la República Asturiana, siendo la nuestra la primera organización del país qu’asina lo reivindicó, como amuesen les nuestres Bases Constituyentes de 1995. Qu’esa república tea federada o non, con quién y en qué condiciones nun ye cosa qu’obviamente teamos en condiciones de debatir agora, porque la rialidá política asturiana ta anguaño mui lloñe de planteganos esi escenariu como inmediatu. Lo que tenemos agora enriba la mesa ye una reforma d’una llei orgánica del Reinu d’España, que ye lo que son los estatutos d’autonomía nel marcu constitucional vixente. Sicasí, l’oxetivu inmediatu nun pue facenos escaecer el final, mientres que mos permita dar pasos na direición correcha.

Si’l marcu políticu-institucional actual nun da pa más que pa un estatutu d’autonomía, IAS quierlu de máximos. Nunca vamos almitir que’l nuestru pueblu tenga menos derechos qu’otros, y resumímoslo na conseña “Asturies como les demás”, esto ye, como les demás naciones del reinu. Nin más nin menos. Asturies foi un suxetu constituyente y soberanu del actual estáu español hai más de doscientos años. Asturies apaez como un suxetu propiu en toles propuestes federalistes de los sieglos XIX y XX, tanto n’España como en Portugal, y el republicanismu asturianu ufrió bases pa una constitución asturiana en 1873, 1883 y 1897. Nun vamos renunciar a eso. Mentanto llega’l momentu en que seya posible perpasar l’actual marcu llegal y s’abra’l procesu constituyente que resulte del final del réxime del 78, nun vamos quedanos esperando qu’eso pase y arrenunciar a emburriar por cambios que, por ruinos que seyan, fagan camín na bona dirección.

  1. REFORMA BLANDIA Y REFORMA DURA

La cuestión entós ye: ¿reforma de máximos o reforma de mínimos? Esto ye ¿Entamamos un procesu de reforma p’asumir el máximu de competencies pendientes, sabiendo qu’eso va allargar el procesu nel tiempu, o apostamos por una reforma de mínimos p’amarrar cuestiones como la oficialidá, por mieu a que nes próximes lexislatures asturiana y española nun hebia mayoría cualificada abonda?

La respuesta a esta cuestión bien marcada por dos factores: el del tiempu y el del déficit democráticu que supón p’Asturies l’ausencia d’oficialidá de les llingües del país depués de cuarenta años en que sí hai esa oficialidá n’otres CCAA con llingua propia non castellana. Polo tanto, si l’aritmética parlamentaria lo permite agora, n’Uviéu y en Madrid, ye necesario apostar por una reforma de mínimos, que namás incluya cuestiones nes qu’hebia ampliu consensu y que nun necesiten llargos debates previos, y la oficialidá, conditio sine qua non pa qu’esta seya una reforma mínimamente aceptable.

Sería aconseyable una reforma de máximos si esti debate llega a plantegase non na seronda de 2021, sinón na de 2019. Podíen debatise con calma toles cuestiones necesaries, tanto na Xunta Xeneral como na cai y nos medios, y texer consensos más amplios, y que d’ehí saliera un nuevu estatutu qu’algamara’l techu competencial que permite l’actual constitución. Pero nun foi asina, y la responsabilidá máxima ye del gobiernu asturianu y del partíu que tien por él, la FSA-PSOE.

Polo tanto, si nun quremos qu’esta seya otra lexislatura inútil más, hai qu’intentar zarrar estes selmanes un alcuerdu qu’incluya la oficialidá y toles demás cuestiones más nes qu’hebia yá consensu previu, y aprobar la reforma na Xunta anantes de qu’acabe xunu. Si somos quien a sacar esto alantre, será na lexislatura 2023-27 onde podamos plantegar la campaña por un estatutu nuevu y de máximos, que tendría qu’incluyir, como mínimo:

-La supresión del Principáu.

-Una carta de derechos y deberes de la ciudadanía asturiana.

-Garantíes pa la escuela, la sanidá y demás servicios públicos.

-Un modelu propiu de seguranza pública.

-Una regulación de la vivienda.

-Una regulación d’un potente sector públicu asturianu.

-Una garantía pa los tresportes.

-Una nueva llei electoral, qu’incluya la circunscripción única.

-Un aumentu del tamañu de la Xunta Xeneral.

  1. LA CUESTIÓN DE LA OFICIALIDÁ

Ye evidente que la cuestión llingüística ta siendo la estrella de los debates d’esta negociación. Ye la causa de que tanto C’s como’l PP se negaren a negociar nada, y ye’l tema col que la prensa escrita ta faciendo una campaña fuina y mentirosa, como nun podía ser menos. Ye’l tema que fai esconsonar a pantasmes d’otru tiempu que si tuvieren un mínimu de dignidá nun volveríen a abrir la boca en público, como l’expresidente Juan Luis Rodríguez-Vigil. Ye’l tema que la prensa española descubrió qu’existía, depués de décades d’ignoralu a costafecha. Ye’l caballu de batalla de la derecha reaccionaria, que recurre a anunciar apocalipsis terribles si llega a aprobase la oficialidá, y a campañes indecentes escontra quien ven como’l traidor de la derecha, el diputáu de Foro Asturias Adrián Pumares.

D’otru llau, Foro, queriendo tanto vender caru’l so apoyu a la reforma como garantizase la so posición de bisagra pa lexislatures futures, pon condiciones estraestatutaries como la rebaxa del impuestu de sucesiones, queriendo asina apaecer como la derecha constructiva que-y saca concesiones al gobiernu y al mesmu tiempu desixe que, d’aprobase la oficialidá, la llei de normalización que la desendolque tien d’aprobase cola mesma mayoría que la de la reforma, esto ye, de 3/5 de la cámara.

Entendemos que Foro, al tensar tanto la negociación como pa rompela queriendo sacar concesiones en política fiscal a cambiu del so apoyu, cuando les demás fuercies polítiques yá apoyen nueve de les dolce propuestes que fixera, ta arriesgándose a quedar como’l responsable caberu d’un hipotéticu fracasu, cuando la culpa principal ye del PSOE por arronchar tantu tiempu, primero pa entamar el procesu y depués por nun llevar iniciativa ninguna. Si Foro fai fracasar esta reforma tará cavando la so tumba política: los contrarios a la oficialidá nun van perdona-y que fuera favorable, por munches condiciones que punxera, y los partidarios de la mesma nun van perdona-y tampoco qu’esta nun seya posible por una posición intransixente. Amás ¿Quién podría respetar un partíu que, depués de la campaña indecente que Vox entamó escontra’l so secretariu xeneral, acabara faciendo lo que la ultraderecha-y manda?

No que toca a la propuesta de la condición de los 3/5 p’aprobar una llei de normalización, anque de mano supón una esceicionalidá que nunca nun necesitó nenguna otra llei y entendese como una posible dictadura d’una minoría que nun futuru exerciera un bloquéu, tien la virtú de romper l’argumentu falaz de la división en bloques de la sociedá asturiana. La masuñada falta de consensu que xustificó l’inmovilismu de la clase dirixente nos últimos 40 años. Quiciás el momentu merez el riesgu más que probable que los que amagosten esa llei na llexislatura que vien seyan el PSOE y el PP, intentando facela lo más floxa posible

Sicasí, nun ye too tan terrible como paez, porque la mesma apaición de la oficialidá nel articuláu del estatutu yá xenera obligaciones llegales, polo que l’aprobación de la llei de normalización tendría que dir darréu d’aprobase l’estatutu, previsiblemente a lo primero de la lexislatura de 2023-27, y ehí ye más que probable que quien amagoste esa llei seyan el PSOE y el PP, intentando que seya lo más floxa posible. Al mesmu tiempu, si faen falta 3/5 p’aprobar una llei de normalización llingüística tamién fadríen falta 3/5 pa quitala y poner otra, o nenguna.

  1. ¿QUÉ OFICIALIDÁ?

Si hai dellos debates derivaos de la cuestión llingüística que vienen dende fuera del movimientu de reivindicación de la oficialidá, hai ún que vien dende dientro del mesmu, como ye’l de la denominación de la llingua del estremu occidental asturianu. Hai un consensu ampliu, texíu cuantayá non ensin conflictu internu nesi momentu, en que’l dominiu llingüísticu asturianu nun llega a tol territoriu del país, y que lo que falen los asturianos que viven ente l’Eo y el Navia ye otru idioma que merez un tratamientu aparte. Llegar a esi consensu foi un trunfu y un avance perimportante, qu’ente otres coses valió p’arrequexar visiones esencialistes de la identidá asturiana, y por eso resulta esmolecedor que’l debate se centre agora na cuestión de la propia denominación d’esa llingua, amás del ámbito territorial d’esa oficialidá.

La variedá llingüística del galaico-portugués falada ente l’Eo y el Navia tien el nome popular de “a fala”. Otres denominaciones, como gallego-asturiano o eonaviego nun acabaron de cuayar, anque tienen partidarios, siendo la primera la denominación que se-y da a l’asignatura que s’imparte nel sistema educativu. Les razones que dan quien refuguen el términu gallego-asturiano ye porque o bien piensen que ye gallegu oriental y que polo tanto lo d’asturianu sobra, o bien porque piensen que ye asturianu occidental -escontra tou criterio filolóxicu seriu- y sobra lo de gallegu, o bien porque esi nome remite a una fala de transición y eso ye una forma de rebaxar el status llingüísticu del idioma. Les razones que se dan pa refugar el términu eonaviego ye que ye un nome mui nuevu, y pa unos quíta-y la condición de gallegu al idioma, mientras pa otros el problema ta en que-y quita la condición d’asturianu.

Pa izquierda Asturiana (IAS) esti ye un debate absurdu. Asumiendo que’l nome popular del idioma, a fala, nun ye posible de meter nel estatutu porque rebaxa la categoría llingüística del mesmu, yá qu’a nadie se-y ocurriría llamar nun testu llegal “el habla” o “la fala” pa referise al castellán o al asturianu, ye evidente qu’hai que poner ún, y pensamos que la denominación d’eonaviegu, por ser más aséptica en tanto que nun la clasifica filolóxicamente pero que define l’ámbitu territorial d’Asturies nel que se fala, ye la más amañosa. En tou casu, y porque ye importante llegar a un consensu, nun sería ningún problema poner les dos denominaciones nel artículu 4º del estatutu.

D’otru llau, ta la cuestión del ámbitu territorial de la oficialidá. Les posibles alternatives son: A) la oficialidá del asturianu xunto col castellán en toa Asturies y del eonaviegu nel so ámbitu. B) La oficialidá del castellán n’Asturies entera, y del asturianu y del eonaviegu nos sos respectivos ámbitos, y C) La oficialidá de les tres llingües en tol territoriu asturianu.

Nun ye una cuestión menor, obviamente, pero pensamos que nun toca agora. Pa nós, la batalla de la recuperación de les llingües propies d’Asturies, de la so normalización y garantía de tresmisión interxeneracional, hai que dala en cuatro fases.

La primera ye que s’apruebe na Xunta Xeneral una reforma estatutaria qu’incluya la oficialidá.

La segunda ye qu’esa reforma seya aprobada poles Cortes españoles.

La tercera ye que s’apruebe na Xunta Xeneral una llei de normalización curiosa.

La cuarta ye qu’esa llei se cumpla.

Tovía tamos, evidentemente, na primera fase. Intentar especificar agora l’ámbitu d’aplicación acuyá d’unes llínies xenerales ye un error, porque abre debates que nun ayuden a iguar el problema, y apurren armes a los enemigos de la oficialidá. Entendiendo qu’abre toles puertes y nun zarra nenguna, dende IAS pensamos que la redacción más amañosa pal artículu 4º del estatutu sería una mui asemeyada a la que tien l’estatutu catalán no que toca al aranés, y podría ser esta:

La llingua del Navia-Eo, llamada eonaviegu, ye la llingua propia d’esti territoriu y ye oficial n’Asturies, acordies a lo afitao nesti estatutu y nes lleis de normalización llingüística.

Esti marcu dexa abiertu’l debate posterior sobre l’ámbitu d’aplicación territorial de la oficialidá, que taría recoyíu nel testu de la llei de normalización. Efectivamente, ye un debate qu’hai que tener, pero namás podremos tenelu si algamamos el marcu llegal previu, que ye la oficialidá.

 

  1. LA CONSEÑA DEL REFERÉNDUM

    Yá pa rematar, nun podemos dexar de referinos a la cuestión del referéndum plantegáu pola Plataforma contra la Cooficialidad, nome de Vox pa la so campaña escontra l’asturianu, y de la que se fixo eco bona parte de la derecha social y mediática. L’argumentu ye que la oficialidá del asturianu ye una cuestión de seriedá abonda, y que pa que s’apruebe nun ye abondo con una mayoría cualificada na Xunta Xeneral, sinón que fadría falta un referéndum nel que tola ciudadanía asturiana pudiera pronunciase. Y fáise, cómo non, apelando a la democracia.

Abulta raro que la derecha, siempre roceana a cualisquier tipu de consulta popular, diga agora que quier un referéndum sobre la oficialidá, plantegando en rialidá un referéndum sobre si se tien que cumplir o non la Constitución española n’Asturies, que diz nel so artículu 3 que “Las demás lenguas españolas serán también oficiales en las respectivas Comunidades Autónomas de acuerdo con sus Estatutos.” Al mesmu tiempu, la convocatoria d’un referéndum, sigún la constitución vixente, fáila’l rei a propuesta del presidente del gobiernu previa autorización del Congresu de los Diputaos. El gobiernu asturianu nun pue convocar un referéndum, qu’amás, en tou casu y acordies a la Constitución del 78, ye siempre consultivu, non vinculante. Prueba d’ello ye qu’en 1986 aprobóse nun referéndum qu’España permaneciese na OTAN pero fuera de la estructura militar y en 1999 el gobiernu d’Aznar metióla dafechu.

El problema nun ye referéndum sí o non. Somos conscientes que, d’habelu, ganábemoslu, pero ye inaceptable que nun valga p’Asturies lo que sí valió pa otres comunidaes. Nun ye almisible baxo ningún conceptu que se faga un referéndum pa ver si se cumple la constitución -que nun ye la nuestra nin la que queremos- sinón porque nun ye serio. Por esa mesma razón, por facer un referéndum pa ver si se cumplía, nesti casu p’autodeterminase, suspendieron l’autonomía catalana. La propuesta de la derecha asturiana ye tan illegal como la que fixo nel so momentu Puigdemont, y sábenlo. Namás la proponen pa intentar allongar el procesu nel tiempu y porque saben que nun ye posible, y asina intentar falar d’imposición antidemocrática.

Los mesmos que falen d’imposición son los que dicíen en 1999 y en 2008 que la oficialidá nun yera posible porque los partíos que la defendíen y la teníen nel programa nun teníen diputaos abondos. Nes elecciones de 2019 esos partíos algamaron el 60% de los votos y 28 escaños, frente al 37’9 y 17 escaños de los contrarios. Como yá nun-yos vienen bien les riegles del xuegu, yá nun se valen y quieren otres. Polo tanto, la idea del referéndum, nos términos nos que se plantega, ye absurda y los sos promotores sábenlo.

D’otru llau, la postura histórica d’IAS siempre foi que l’estatutu asturianu tenía que sometese a referéndum ente la población asturiana. ¿Cómo casa eso cola posición qu’acabamos d’espresar? Pues defendiendo qu’Asturies llegue al máximu techu competencial posible anguaño, con un estatutu nuevu y de máximos que, esti sí, debería ser refrendáu pola población asturiana, como lo fueron los estatutos vascu, catalán, gallegu y andaluz. L’estatutu enteru, non cachinos. Como fixeron les demás. Polo tanto, agora lo que toca ye una reforma rápida y de mínimos pa iguar el déficit antidemocráticu de la falta d’oficialidá, y coles mesmes condiciones que los demás, esto ye, por mayoría de 3/5. Depués, la batalla por un estatutu de máximos, que diría enteru a referéndum.

Pa concluir, facemos un llamáu a la responsabilidá de toles fuercies polítiques y sociales asturianes pa ser quien a rematar la reforma. Nun ye’l momentu del narcisismu nin del exhibicionismu. La victoria, d’habela, serálo de tolos qu’emburriaron por ella. Tenemos que ser conscientes, y munchos na esquierda social y política nun lo son, de que la oficialidá nel estatutu asturianu ye una victoria simbólica sobre la transición, sobre esa transición que peslló en falso’l debate sobre la plurinacionalidá afitando, xunto al castellán, tres rialidaes llingüístiques pero arrequexando les demás y condenándoles al ostracismu y a la desapaición. La oficialidá del asturianu francería esi discursu, omnipresente nos medios de comunicación, nos manuales escolares y nel discursu oficial dende hai cuarenta años. La derecha ye consciente d’ello y por eso ta esprecetada. La prensa madrilana y l’asturiana tamién. La madrilana nun entiende lo que ta pasando, depués de tar ignorando a costafecha la rialidá llingüística asturiana y el movimientu social qu’hai detrás. L’asturiana entiéndelo tan bien que por eso-y dieron cancha mediática y reconocimientu a los sectores más fediondos de la nuestra sociedá, intentando apurri-yos una respetabilidá que nin tienen nin merecen. Tamos cerca de ganar una batalla perimportante y nun podemos dar pasos en falso. Ye la hora de la responsabilidá. Ye la hora del cambiu.

Dirección Nacional d’Izquierda Asturiana (IAS)

23 de xineru de 2022

 

 

 

 

 

Los comentarios están cerrados.