IAS pide responsabilidá histórica y nun se llevantar de la mesa

x1080

Énte la situación de bloquéu nes negociaciones llevaes a cabu poles cuatro fuerces polítiques que tán d’alcuerdu en sacar alantre una reforma del Estatutu d’Autonomía qu’incluya’l reconocimientu de la oficialidá del asturianu, esto ye: FSA-PSOE; Podemos; IX y Foro,  n’Izquierda Asturiana entendemos qu’hai que facer un llamáu urxente a una movilización social de tolos sectores que tán na defensa de los derechos llingüísticos que diga a les clares que ye intolerable que se pierda la meyor oportunidá histórica p’acabar con esta marxinación y vulneración de derechos. Sí ye posible algamar un alcuerdu, siempre que los partíos negociadores abandonen postures que ponen per delantre  lo púramente ideolóxico.

Delles voces señalen la responsabilidá de Foro Asturias pola so intransixencia a negociar la reforma si al tiempu nun s’aborda una modificación d’impuestos qu’asitie a Asturies en paralelu con otres comunidaes. Pero al mesmu tiempu y per boca del diputáu Adrián Pumares reconozse que’l tema de la modificación de los baremos del Impuestu de Sucesiones ye una cuestión ensin muncha repercusión real nes cuentes autonómiques y almítese que ye un tema simbólicu y si se quier, ideolóxicu.

Hai que dicir qu’esti ye, efectivamente, un tema simbólicu pero non solo pa la derecha asturiana, sinon pa les fuerces d’esquierda qu’históricamente punxeron el focu na capacidá impositiva como ferramienta de distribución social y garantía pal caltenimientu de la rede de servicios públicos del que la nuestra comunidá siempre tuvo arguyosa. Sicasí, tanto PODEMOS ASTURIES como Izquierda Xunida y non digamos la FSA, son sabedores del calter más simbólicu que real de la repercusión que tendría una rebaxa nes cargues recaudatories derivaes del Impuestu de Sucesiones. El famosu y masuñáu argumentu de la menor capacidá competitiva d’Asturies pue tener creyentes que dean réditos electorales, igual que los tien la defensa a ultranza del so mantenimientu, pero lo cierto ye que los dirixentes políticos asturianos saben que ye un argumentu falsu y que, en términos de liquidez real ye’l «chocolate del loro» o poco menos que garulla presupuestaria con mui poca repercusión.

La intransixencia amosada por Foro, fuerza que tien un solu diputáu na Xunta, clave pa siguir alantre col procesu, contrasta cola honestidá cola que reconocen que necesiten una «victoria simbólica» como esta que-yos dea aire de cara a un futuru viable como alternativa política pa la sociedá asturiana y tamién cola crudeza cola que meten el deu na ferida de les prieses qu’emburrien a los partíos de la esquierda que ponen fecha tope pa la fin del mundu na próxima lexislatura.

De toles maneres, heba o non fin del mundu o hecatombe electoral pa dalgunos, la suerte del idioma de los asturianos nun ta pa xuegos florales o partíes de póker y la responsabilidá pa coles xeneraciones futures nun pue quedar allancada na miopía coxuntural d’un presente que nun tien que vivir condicionáu por sambenitos d’otros tiempos. La xente asturiano tien derechu a que se-yos fale non como borregos, retrasaos o aficionaos incondicionales d’un equipu de fútbol, sinon con madurez y honestidá.

Esa mesma honestidá qu’asoleyaron nesti procesu  PODEMOS Asturies y Izquierda Xunida, que poniendo per delantre la importancia del momentu históricu, arrenunciaron a la mayor parte de les sos xustes aspiraciones nun nuevu marcu competencial p’Asturies. Aspiraciones que por so calter de xusticia social son tamién compartíes por nós. Esa honestidá merez espurrise y llevase tamién al ámbitu d’un debate políticu honestu que derribe mitos por mui simbólicos o instalaos que tean nel imaxinariu del elector. Ún d’esos mitos ye’l de la cuantía real de les cargues fiscales a cargu de l’Alministración autonómica asturiana que son -hai que dicilo- más bien ridícules a la hora de condicionar la capacidá presupuestaria y d’actuación de la ruína autonomía asturiana.

Como parte d’esa izquierda na que nos reconocemos, camentámonos que la mayor herencia que se-y pue dexar al nuestru pueblu ye l’autoestima  y quita-y esta llábana ideolóxica y cultural que supón la falta de derechos pa los falantes y ye elementu clave de la nuestra identidá comunitaria.

El  papel de la FSA- PSOE en tou esti procesu ye mui discutible en cuanto a la estratexa d’allanciar y descargar responsabilidaes, pero lo cierto ye que la so posición hexemónica permíte-y quedar bien y nun gastar. El so papel tien de ser de lideralgu, y en nengún momentu pue trancar les puertes nin echar piesllu al procesu, precísamente porque tien una responsabilidá histórica y a estes altures nun pue desandar un camín que tampoco nun foi fácil pa ellos pero al que llegó tarde, con toles consecuencies y llaceries que siguimos pagando. Si’l PSOE quier siguir siendo l’actor responsable y protagonista nun pue asitiase en dinámiques inmovilistes y tien que cumplir cola retórica qu’en palabres del presidente Adrián Barbón, albidraba una nueva etapa pa la nuestra comunidá nel ámbitu d’un Estáu reformáu, que por muncho que nun seya l’horizonte que nós suañamos, aprucía como más respirable que lo que carecimos hasta agora.

Si cuntamos amás con que les diferencies na carga impositiva ente comunidaes  tán pendientes d’una harmonización fiscal que va ser pautada dende les los poderes del Estáu, tendríamos como resultáu  que la efectividá real d’una reforma nun impuestu concretu tien una llende temporal mui curtia, colo que’l gastu o déficit que supón ye tovía más reducíu. Merez la pena pagar esi preciu, yá non solo por simbólicu sinon porque nun hai preciu que pague la supervivencia de la llingua y porque les fuerces defensores de la reforma nun puen permitir la derrota estratéxica de pesllar les negociaciones ensin alcuerdu y da-y baces  a una derecha reaccionaria y españolista que yá anuncia victoria  nesta absurda partida de cartes. Consiguir agora  un estatutu con oficialidá  pa les llingües d’Asturies ye una muria necesaria pa poner sebe a los que tán semando un futuru inciertu.

Pol nuestru futuru, vamos dexar bona herencia.

DN d’Izquierda Asturiana, 26 de xineru de 2022.

 

Los comentarios están cerrados.