Izquierda Asturiana con Unidá Popular

Alberto Garzón, Por un nuevu país. Unidá PopularEsti domingu 20 d’avientu celébrense unes elecciones a les Cortes españoles de gran importancia pal pueblu asturianu. El nuestru país, que lleva trenta años asistiendo como convidáu de piedra al esmantelamientu del so sistema productivu, ve agora que, como consecuencia del resultáu electoral nel Reinu d’España, en plena crisis del modelu turnista de la II Restauración, ye mui posible que s’abra una nueva operación gattopardesca, un cambialo too pa que too siga igual, onde les consecuencies podian ser tovía más negatives pal nuestru pueblu.

La nueva operación de maquillaxe del réxime paez que pasa per una reforma constitucional que tenga como resultáu final que, igual qu’en 1978, Asturies volvia a quedar arrequexada. Los cuatro partíos a los que los grandes grupos de comunicación dieron el preste pa ser potenciales vencedores de les elecciones (PSOE, PP, Podemos y Ciudadanos), esto ye, el vieyu turnismu y los sos recambios, representen n’Asturies la submisión y el sucursalismu más porcaz. Nengún d’ellos tien un programa de rotura cola oligarquía nin colos marcos de dominación qu’emanen d’ella: el réxime del 78, la OTAN, la UE. Nengún d’ellos plantega n’Asturies un marcu d’autogobiernu superior a la ruina autonomía del Estatutu de 1981.

Izquierda Asturiana (IAS) decidió participar nestes elecciones n’Unidá Popular, la coalición electoral na que participamos xunta IU, Alternativa Socialista, Chunta Aragonesista o Izquierda Castellana, ente otres fuercies, y que pon como candidatu a la presidencia del gobiernu a Alberto Garzón. Participemos nes elecciones primaries pa elexir candidatos y como resultáu de les mesmes los compañeros Camilo Xabel Sousa y Ignaciu Llope formen parte de la candidatura al Congresu y al Senáu.

Unidá Popular nun ye la unidá popular que’l nuestru partíu defende pero creemos que ye un primer pasu nesa dirección. UP ye la única candidatura unitaria qu’inclúi nel programa midíes abiertamente antioligárquiques. La única que, con contradicciones, nun participa del consensu de la moneda única. La única que s’opón abiertamente a la OTAN y que defende un procesu constituyente y una república federativa. Nesti contestu, creemos que’l votu a UP ye la única forma de poner a Asturies nel mapa cuando s’abre un nuevu procesu de reforma de les instituciones.

Depués del 20 d’avientu, independientemente de los resultaos, toca reflexonar sobre la ferramienta política a construyir pa encarar el nuevu contestu. Dende Izquierda Asturiana (IAS) vamos siguir defendiendo que namás dende l’autoorganización del nuestru pueblu, la llucha social y la non subordinación a los partíos turnistes ye posible avanzar na configuración d’un nuevu bloque históricu que-y dispute la hexemonía a la oligarquía que ta fundiendo’l nuestru país.

Dirección Nacional d’Izquierda Asturiana (IAS)

Los comentarios están cerrados.