IZQUIERDA ASTURIANA (IAS) ÉNTE LES ELECCIONES DEL 10 DE PAYARES

Esti domingu 10 de payares hai otres elecciones xenerales a les Cortes españoles, les cuartes en cuatro años. Elecciones estes que vinieron causaes pola incapacidá del PSOE p’algamar alcuerdos con otres formaciones polítiques col envís d’algamar una mayoría parlamentaria qu’afitara la lexislatura. Col parlamentu más fragmentáu dende l’aniciu de la II Restauración, ye evidente que tamos asistiendo a una crisis de réxime: les clases dominantes nun son a gobernar como hasta agora, al traviés del bipartidismu turnista, pero tampoco se columbra una fuercia opositora con un programa claru de valtar esi mesmu réxime en crisis. El procesu catalán tampoco ye un intentu de valtar el réxime, sinón de fuxir del mesmu. Nesa situación, el deterioru institucional nun puede más que siguir afondando poles propies contradicciones internes del réxime.733a4aec-ed4c-40a5-9001-3fd6f9c850bb

Tenemos una derecha xabaz en plenu procesu de recomposición, con una ultraderecha ca vez más fuerte gracies a PP y Ciudadanos, qu’esblanquiñaron el componente antidemocráticu de Vox pautando con ellos l’asaltu a les instituciones onde podíen construyir mayoríes, y a unos medios de comunicación que-yos dieron espaciu nestos años, en dellos casos pa qu’espardieren impunemente llevantos y mentires ensin contrastatales mínimamente. Podemos dicir que la prensa escrita asturiana distinguióse especialmente nesi llabor de da-y respetabilidá y normalidá  a quien nun ye nin normal nin respetable, lo que dexa bien claro (otra vez) la so naturaleza y la de los intereses a los que sirve.

Tenemos un PSOE que, siendo la fuercia más importante del parlamentu español, tien la mesma qu’hai cuarenta años, non diez o venti. Eso implica la necesidá de llegar a alcuerdos parlamentarios con otres fuercies, y polo tanto concesiones. Pero’l PSOE sigue enfotáu en que lo que ta a la so esquierda tien la obligación de da-y de baldre l’apoyu a cambiu de nada, ximielgando l’espantayu de que vien la derecha, pa depués pautar con esa mesma derecha les polítiques lliberales y antipopulares que bien faciendo dende hai más de trenta años: les contrarreformes llaborales, la reforma de la Constitución nel artículu 135, l’aplicación del 155 en Cataluña. El PSOE, anque tocáu, sigue siendo funcional dafechu a los intereses de la oligarquía, española y europea, y ye la necesaria pata esquierda del réxime de la II Restauración.

Nesi contestu, abúltanos raro la obsesión d’Unidas Podemos por entrar nel gobiernu central. Ye terriblemente contradictorio pa Podemos, que se diz heriede del 15-M, movimientu qu’impugnó de base’l sistema bipartidista y el modelu subsidiariu del PSOE qu’aplicaba IU, y que foi la base del discursu podemista ente 2014 y 2016, cuando se negaba a incluyise na esquierda, xuegue a esblanquiñar de tala manera al PSOE presentándolu como “progresista” y posible y deseabla sociu de gobiernu. Ye tamién contradictorio pa IU, con una dirección que diz dexar atrás el llamazarismu pa siguir viéndose como subsidiaria del PSOE y facer llamazarismu ensin Llamazares.

Abúltanos raro, dicimos, la obsesión por entrar en gobiernu central dada la correlación de fuercies col PSOE. Un hipotéticu gobiernu del PSOE con UP implicaría siguir aplicando’l programa del PSOE: dende la “mochila austríaca” a siguir cola solución represiva pal problema políticu abiertu en Cataluña. Unos hipotéticos ministros d’UP lo único pa lo que valdríen sería pa xustificar y ser cómplices de polítiques reaccionaries y antipopulares. Nesi contestu, yera muncho más razonable pautar col PSOE un conxuntu de midíes sociales mínimamente rialistes, votar la investidura, pasar a la opisición y velar pol so cumplimientu, intentando reconstruyir un texíu social vaciáu enforma  pola pulsión electoral pa movilizar les cais cuando’l gobiernu incumpliera’l so propiu programa, cosa inevitable dada la propia naturaleza del PSOE y el contestu políticu nel que tamos, por nun falar del nuevu episodiu de crisis económica que paez venir.

Abúltanos igual de raro que lo anterior que los mesmos que critiquen al grupu parlamentariu d’Asturies pela Izquierda na Xunta Xeneral por negociar midíes programátiques col PSOE y nun participar nel gobiernu, viendo nello una terrible subordinación, tean tan ilusionaos cola posibilidá de ver sentase nel conseyu de ministros español a xente d’UP ensin plantegase siquiera baxo qué programa.

El domingu hai elecciones. Ye responsabilidá de la esquierda nun presentar una alternativa de réxime, sinón simples remiendos a una situación que ye irresoluble. El procesu políticu abiertu en Cataluña namás tien igua dende una reforma constitucional, cuestión que naide quier abrir. La represión namás va valir pa encetar un problema que, si nun ye a curtiu plazu, volvia con más fuercia a mediu. Nun hai solución dientro del modelu autonómicu, como tampoco hai solución rial a los problemes sociales del Reinu d’España nos marcos de dominación existentes. Esi ye’l problema y nesa dirección hai qu’avanzar, ensin renunciar a xestionar el presente como ferramienta d’acumulación de fuercies p’abrir espacios de tresformaciones más radicales.

Asturies ta nun momentu dramáticu, yá hachuquináu’l modelu productivu que pilotó la nuestra economía per sieglu y mediu. Hai cuarenta años mandábemos 10 dipuatos a Madrid. Anguaño 7. Tamos dende hai venti años en muerte demográfica y ye esti añu cuando otros partíos que nun seyan el nuestru falen d’ello. En diez años perdimos 83.000 puestos de trabayu. Somos un pueblu avieyáu, con poca actividá productiva, fonte de mano d’obra, carne d’emigración. La llingua asturiana cuerre peligru de muerte y, habiendo una mayoría parlamentaria favorable a la oficialidá, tenémosla bloquiada por una minoría reaccionaria y pataya. Los nuestros problemes nun tienen igua nel estáu autonómicu, nin nel marcu neolliberal. Hai que llevantar l’alternativa, no social y no electoral, y esa ye una xera por facer pa la que necesitamos tiempu. Nestes elecciones, el votu n’Asturies a Xuníes Podemos puede valir pa ganar tiempu, pa tornar a la derecha reaccionaria al preciu de dexar gobernar al PSOE neolliberal y centralista. Ye responsabilidá de Xuníes Podemos xestionar esi votu del cambiu pa que nun seya, ca vez más, el del desencantu. Porque si’l desencantu ye mui grande, lo que vien detrás ye pior.

Nesi camín, nel de llevantar l’alternativa nacional y popular p’Asturies, nel de la construcción de la República democrática y federativa, podemos atopanos.

Xunta Xeneral d’Izquierda Asturiana (IAS)

Uviéu, 7 de payares de 2019

Los comentarios están cerrados.