Izquierda Asturiana (IAS) énte les elecciones del 24 de mayu

logo-ias-300x300.jpgEsti domingu día 24 de mayu celébrense unes nueves elecciones pa la Xunta Xeneral y los conceyos asturianos. Nunca enantes, de magar se restaurara’l sistema representativu nel nuestru país, tuvo’l resultáu tan abiertu. Anque too paez indicar qu’otra vuelta la FSA-PSOE va volver a quedar na primer posición, ye previsible que lo faga con un porcentax enforma menor que los que tuvo hasta agora, y, lo que ye mui significativo, xunta’l PP puen quedar alredol del 50% del votu popular, como nes elecciones de 2011 y 2012. De ser asina, el bipartidismu taría tocáu de muerte nel nuestru país.

Lo que vien depués del domingu 24 de mayu ye previsiblemente una Xunta Xeneral ensin una fuercia claramente hexemónica, y con munchos conceyos asturianos ensin alcaldes del PSOE per primer vez dende 1979 o 1983. Caminamos hacia un sistema pluripartidista, resultáu de la crisis del réxime, onde lo vieyo nun acaba de morrer y lo nuevo nun acaba de nacer. Sicasí, nun paez que los llamaos nuevos partíos vaigan convertise nes fuercies dominantes de la futura Xunta y los conceyos.

Resulta especialmente llacerioso que precisamente na crisis de lexitimidá más fuerte que tien el réxime de la II Restauración dende la so fundación, nun hebia una alternativa clara al mesmu n’Asturies. Depués del ciclu de movilizaciones abiertu dende 2011, del desgaste evidente de los partíos turnistes, de la situación económica y social que fexo esconsonar a sectores de la población tradicionalmente apáticos, llegamos a estes elecciones ensin una alternativa de poder nin pal pueblu asturianu nin pa la mayoría de los pueblos del Reinu d’España. Muncho habrá qu’analizar depués del 24 de mayu, munches coses fexo mal la esquierda del nuestru país, tanto la política como la social, pa que vuelva a dase esta situación.

Per primer vez en munchos años, nun hai una opción electoral d’esquierda asturianista presente nun mínimu de conceyos. La responsabilidá de que seya asina ye, fundamentalmente, de la propia esquierda asturianista. Presa como siempre ente’l sectarismu más pollín y l’oportunismu más porcaz, ensin voluntá nenguna d’analizar lo que ta pasando nel país, como nun seya pa buscar el réditu electoral inmediatu, lleva suicidándose ella sola dende 2007, hasta llegar al trompazu final de 2012. Depués, lo que quedó na so mayor parte foi la emigración en masa hacia Podemos, un partíu de lo más centralista qu’hai n’Asturies, non yá p’articular una estratexa asturianista nel mesmu, sinón como tabla de salvación y/o promoción política pa dellos. En nome de la tresversalidá, renuncióse a prácticamente too, teniendo que llibrar una guerra interna feroz pa reproducir debates superaos hai quince años, como la bandera de la oficialidá de la llingua asturiana.

Non solo por eso, dende Izquierda Asturiana (IAS), pensamos que Podemos nun ye’l proyectu que necesita’l nuestru pueblu. L’alternativa nun puede venir dende un proyectu radicalmente sucursalizáu, articuláu más como un club de fans que como un partíu, y que, nun añu namás, avieyó de forma bultable. La gran virtú de Podemos, la que suponía’l gran desafíu al réxime al poner nel mesmu sitiu al PSOE y al PP como les dos pates cómplices y necesaries del réxime del 78, foi perdiéndose sigún diba esnidiando hacia un llinguaxe “papalotoo” de centru col envís de sacar votos conservadores (ensin que dexaren de selo por votar a Podemos). Al facer eso, acabó compitiendo nel tarrén retóricu col propiu PSOE, tanto nes sos supuestes referencies ideolóxiques (la socialdemocracia) como na ambigüedá discursiva (renuncies a la renta básica o a l’auditoría de la delda; a les nacionalizaciones; al control de la enerxía; al debate monarquía-república; al derechu a decidir, etc.) y ehí siempre va ganar el PSOE o, nel so defectu, el Podemos de la derecha: Ciudadanos. D’otru llau, el sectarismu d’esti partíu, alimentáu poles encuestes electorales, llevólos a renunciar a dir a les elecciones municipales col so propiu nome pero apadrinando marques blanques que se vienden como candidatures d’unidá popular que nun son otro que la unidá de Podemos consigo mesmu. Nel casu d’Avilés ye especialmente terrible constatar qu’esa ye la causa de que nun hubiera una candidatura unitaria qu’esti domingu podía ganar les elecciones nel tercer conceyu del país.

Izquierda Xunida (IU-IX) dexa la duda de si va francer el cordón umbilical que la ató al PSOE. Depués d’estremase apocadamente del mesmu nos dos últimos años, la candidatura de Gaspar Llamazares vuelve a facer llamaos a formar una dudosa “mayoría d’esquierdes” ensin escluyir esplícitamente al partíu de la corrupción y el clientelismu, contribuyendo asina a lexitimalu. Y anque seya la única de les opciones con posibilidá d’algamar representación na Xunta Xeneral que polo menos mantién unos mínimos identitarios, como la defensa de la oficialidá, y tien el programa más a la esquierda de toes elles, la predisposición a los pautos col PSOE a nivel autonómicu dexa abierta la incógnita de saber cuánto va durar la firmeza na defensa de los sos principios.
Izquierda Asturiana (IAS) sacó en xineru d’esti añu un documentu nel que facíemos un llamáu a la formación d’una unidá popular baxo un programa de mínimos col oxetivu central de desmontar la rede clientelar asturiana y abrir un procesu constituyente propiu. Siguimos pensando qu’esa ye la llínia a siguir, anque nun seya posible materializala agora.

Por too ello, Izquierda Asturiana (IAS) nun da una orientación espresa de votu nestes elecciones a la Xunta Xeneral, anque pidimos que s’exerza esi derechu y que se faga a les candidatures que se vean más averaes a la esquierda y a la defensa del país. Facémoslo tamién cola esperanza de que’l bipartidismu turnista lleve una derrota lo más dura posible y qu’eso sirva pa tener un parlamentu ensin mayoría dinástica.

Nos conceyos, la situación ye enforma más plural, y tamién interesante. Izquierda Asturiana (IAS) llegó a un alcuerdu con Izquierda Xunida hai unos meses en Mieres, pol qu’un compañeru, Faustino Zapico, forma parte de la candidatura d’IU nesi conceyu. Ellí, igual qu’en Morcín onde’l nuestru compañeru Camilo Sousa tamién forma parte de la candidatura d’IU sí se dieron les condiciones mínimes marcaes por IAS pa llegar a un alcuerdu llendáu al ámbitu estrictamente local. Izquierda Asturiana caltuvo conversaciones y fexo propuestes n’otros conceyos, como Siero, Piloña, Llangréu o Colunga que nun cuayaron porque nun se daben les condiciones nin les garantíes pa faceles viables. En Piloña, los intentos de formar una auténtica candidatura d’unidá popular fracasaron básicamente pol sectarismu de Podemos. La llínia que marquemos p’algamar pautos con IU nesos conceyos foi que la nuestra presencia podía facela amoriar más pa la esquierda y pal asturianismu. Lóxicamente, pidimos el votu pa estes candidatures qu’esperamos seyan les vencedores nos sos conceyos. Sicasí, cuidamos que les nuestres propuestes nesos conceyos pueden y tienen de ser camín esbrozáu d’equí p’alantre, atendiendo a les circunstancies y práctiques polítiques que se desenvuelvan depués del domingu.

Na realidá plural del nuestru país surdió un bon fatáu d’auténtiques candidatures d’unidá popular que saludamos y pa les que pidimos el votu: N’Avilés, Ganemos Avilés; en Cuideiru, Vecinos por Cudillero; en Ribeseya, Pueblu. Al mesmu tiempu, tamién saludamos y pidimos el votu pa les candidatures de Conceyu Abiertu en Noreña, Compromisu por L.lena en L.lena y Asturianistes por Nava. Nel restu de conceyos del país, pidimos el votu pa les candidatures col programa y los candidatos que tean más averaos a los principios de la esquierda y l’asturianismu.

Na víspora del 25 de mayu, de la conmemoración de la declaración de soberanía de la Xunta Xeneral asturiana y de la declaración de guerra a quien yera daquella l’amu del continente, siguimos pensando que ye necesaria la soberanía del nuestru pueblu y que pa ello hai que desafiar a los nuevos amos d’Europa. Que’l 24 de mayu sirva p’avanzar hacia un nuevu 25 cargáu de futuru p’Asturies.

Dirección Nacional d’Izquierda Asturiana (IAS)
Uviéu, 22 de mayu del 2015

Los comentarios están cerrados.