Izquierda Asturiana (IAS) énte les elecciones europees

Elecciones Europees 2014Esti 25 de mayu, fecha histórica na que se conmemora’l llevantamientu del pueblu asturianu en 1808 escontra la potencia que dominaba daquella’l continente européu, l’Imperiu Francés, coincide paradóxicamente coles elecciones al Parllamentu européu. Estes elecciones danse nun contestu d’agravamientu de la crisis de llexitimidá que tienen tanto’l réxime español como la propia UE, en medio de movilizaciones sociales perfuertes tanto n’Asturies como en bona parte d’Europa, y podíen ser una bona ocasión pa dir perfilando un programa realmente alternativu pa los pueblos del continente.

Por desgracia, nestes elecciones nun se ta falando de lo que la UE supunxo y supón p’Asturies. Nun se ta falando de cómo l’ingresu del Reinu d’España na CEE fíxose, ente otres coses, empara d’esmantelar el texíu productivo que yera’l motor de la economía asturiana dende diba más d’un sieglu. Nun se fala de los millones en fondos europeos que llegaron al nuestru país y que s’alministraron de forma ineficaz y corrupta, de cómo nun s’usaron pa rexenerar el texíu productivo sinón pa facer obres faraóniques que teníen como única xustificación el fechu mesmu de faceles, lo mesmo que p’armar una rede clientelar cola qu’articular mayoríes electorales. Nun se fala de la moneda único y de lo que supunxo pa los pueblos del continente, nin de los intentos de centralización d’un proyectu políticu, la UE, que nació como superestructura económica del gran capital francoalemán, como tampoco se fala del inminente Tratáu de Llibre Comerciu ente la UE y los USA, qu’implica una impunidá tovía mayor de les multinacionales y que va tener consecuencies catastrófiques nel ámbitu llaboral, ambiental y de la salú.

L’europeísmu, entendíu como l’encontu acríticu a la UE, ye’l discursu ideolóxicu que cuayó a derecha y esquierda en tolos pueblos del Reinu d’España dende l’ingresu d’esti na CEE. La práctica totalidá del arcu políticu cayó na trampa d’esi discursu, resultáu en gran midida d’un tradicional complexu d’inferioridá. L’europeísmu foi la sida perfecta pa mazcarar l’esmantelamientu de la economía asturiana, y los fondos que llegaron de la CEE primero y de la UE depués l’anestesia social que xeneró’l consensu necesariu. Poques voces, perpoques, alzáronse nestos ventiocho años pa denunciar esta situación.

Anguaño, cola credibilidá de les instituciones de la UE pelos suelos, sigue la gran farsa, y la cuasi totalidá de les candidatures que concurren pa esti 25 de mayu siguen repitiendo los mesmos mantras. Na esquierda, si acaso, fálase d’oponese a la Troika y de nun pagar la delda, pero síguese nes llendes de la UE y de lo que la UE marca, como la moneda único. Otres candidatures fálennos de construyir la Europa de los pueblos, pero al empar que se definen como independentistes respecto al Reinu d’España a la de falar de la UE fáenlo con una ambigüedá absoluta: ¿ye posible la independencia real pasando de depender de Madrid a facelo directamente de Bruxeles o Berlín? N’Izquierda Asturiana (IAS) pensamos que non.

Desgraciadamente, tenemos que reconocer que de toles candidatures que concurren pa les elecciones del 25 de mayu nun hai nenguna que fale abiertamente de superar el marcu de la UE, en tanto qu’estructura irreformable, y al mesmu tiempu defenda’l derechu del pueblu asturianu a constituyise n’estructura política soberana, llibre pa decidir los marcos de federación con otros pueblos. Primen los llugares comunes, les conseñes vacies, les promeses de qu’otra UE, esta vez “social”, ye posible.

Neses condiciones, dende Izquierda Asturiana (IAS) nun podemos encamentar el votu pa nenguna candidatura concreta, porque nenguna llega a esos mínimos aceptables pa nós. Creemos, tamién, que l’abstención nun ye una opción útil nesti momentu, darréu que tovía la crisis de llexitimidá del réxime nun ye tan fuerte, y nun existe nenguna institucionalidá alternativa en marcha como espresión del poder popular, que fixera operativa l’astención masiva. Tanto si va a votar el 30% del censu como si va’l 60%, los eurodiputaos van salir elixíos y la crisis de llexitimidá de les instituciones de la UE va siguir siendo la mesma. La participación electoral al Parllamentu européu vien siendo escandalosamente baxa dende va décades y nun valió tovía pa cambiales. Creemos que’l votu en blanco sí pue ser una espresión de castigu de mayor utilidá en tanto qu’algama muncha mayor visibilidá que l’abstención.

Por too ello, la Xunta Xeneral d’Izquierda Asturiana (IAS) fai un llamáu a la participación nes elecciones europees per mediu del votu en blanco o a aquelles candidatures que más s’acerquen a les dos llinies básiques d’oposición frontal a la UE y de reconocimientu espresu del pueblu asturianu a la so soberanía.

Uviéu, 21 de mayu de 2014

Xunta Xeneral d’Izquierda Asturiana (IAS)

Los comentarios están cerrados.