Izquierda Asturiana (IAS) participa nes primaries d’Agora en Común

Tres militantes representen al republicanismu asturianista na candidatura de confluencia

Izquierda Asturiana (IAS) decidió l’otru llunes 12 d’ochobre participar nel procesu de primaries que tán faciendo les plataformes conocíes de forma provisional como Agora en Común/Ahora en Común. Nun siendo esta la unidá popular que’l nuestru partíu lleva defendiendo dende va casi un añu, nin siendo tampoco les prieses electorlaes bones conseyeres nestos asuntos, decidimos dar el pasu alantre poles siguientes razones:

1º) Estes elecciones a les Cortes españoles van suponer previsiblemente un pasu más na crisis del réxime. La posibilidá de que la salida al mesmu seya otra vez un actu de gatopardismu traducíu nuna reforma constitucional ad hoc pa contentar dellos sectores, y onde Asturies, otra vuelta, vuelva a ser la gran marxinada, fáinos albidrar que les candidatures d’AeC puen ser les úniques qu’apuesten por un modelu federal onde’l nuestru país tenga voz y votu.

2º) El contestu xeneral de la gran mayoría de la esquierda europea respecto a les polítiques criminales de la Troika y los sos amos en Berlín, qu’amoria ente la submisión más porcaz y la retórica más vacia, fáinos ver nes candidatures d’AeC una posibilidá de llevantar n’Asturies una esquierda que s’atreva a pensar en qu’hai vida fuera de los marcos supraestatales de dominiu: la UE, la moneda única o la OTAN.

3º) Les candidatures d’AeC asúmense como una converxencia plural de fuercies onde se respeta la pluralidá y la identidá de los sos integrantes, y non como un partíu centralista a les órdenes d’un cabezaleru carismáticu.

Por too ello, Izquierda Asturiana (IAS) decidió presentar la candidatura de dos compañeros y una compañera al procesu de primaries. Presentámoslos como candidatos individuales, y non como una candidatura colectiva d’IAS, porque entendemos que nesti momentu ha primar más la suma de militantes de corrientes estremaes que la llucha de sigles por imponer candidatos. Son en tou casu, los representantes del republicanismu asturianista qu’aspiramos a ver nuna llista unitaria a les Cortes españoles en defensa de los intereses del pueblu asturianu.

Los compañeros y la compañera que se presenten, de llarga trayectoria militante, son:

Al Congresu:

Camilo Xabel Sousa González,camilo

trabayador autónomu como ebanista, guía de montaña y presentador de televisión.
Vive n’Argame, Morcín. Militante del movimientu ecoloxista, tuvo parte activa nes movilizaciones antiglobalización y escontra la moneda única. Ye militante d’IAS dende la so fundación en 1992.

 

Maite Duarte Llaneza,maite,psicopedagoga, trabaya nel Equipu d’Orientación Educativa del Nalón. Vive en La Felguera, Llangréu. Activista pola escuela pública y militante de SUATEA, yelo d’IAS dende 2012.

 

 

Al Senáu:

Ignacio López Fernández, Naciu Llope,llope

médicu psiquiatra nel Centru de Salú Mental de Cangas. Vive
n’Arganza, Tinéu. Escritor, tien publicao dellos llibros de poesía y ensayu. Lletrista del grupu Llan de Cubel. Miembru de la Fundación Belenos y del Conseyu Editorial de la revista Asturies, memoria encesa d’un país. Afiliáu a la CSI, milita n’IAS dende 1996.

 

Por too ello, pidimos el votu pa ellos a tola ciudadanía asturiana nel procesu de primaries que ta acabante d’abrise, y facemos votos pa que de les mesmes salga una llista mosaicu que seya un espeyu de la realidá plural de la esquierda y de los movimientos sociales asturianos

Los comentarios están cerrados.