Izquierda Asturiana (IAS) y la Unidá Popular

Con motivu de la nueva convocatoria electoral a les Cortes españoles el nuestru partíu, Izquierda Asturiana (IAS), quier amosar la so posición política nesti momentu clave de la nuestra Historia:papela

1º) Les elecciones del 20 d’avientu de 2015 fueron un pasu más na crisis del réxime. El turnismu ente’l PP y el PSOE, les dos pates de la II Restauración, quedó mui feríu y, igual que na crisis de la I, ábrese un impasse ente esi momentu en que les vieyes fuercies nun pueden gobernar como siempre, pero les fuercies del cambiu, con tolos matices que se querian, nun son a imponese. La pata más feble del réxime ye’l PSOE, que nun taba tovía maduru pa da-y el preste a un gobiernu col PP, pero foi presu de les sos dinámiques internes p’articular una mayoría nueva qu’implicara francer el pautu de la Transición, como se vio cola cuestión nacional, ente otres. Nesi sentíu, la nueva convocatoria electoral va servir pa esclariar si la qu’hasta agora siguía siendo la fuercia mayoritaria de la presunta esquierda va doblar definitivamente énte’l PP, cola pantasma del PASOK griegu esnalando per ende, o si va aceptar conformar una mayoría alternativa, esta vez yá non como fuercia hexemónica.

2º) Nesi sentíu, la conformación de la coalición XUNÍOS PODEMOS, que n’Asturies ta formada por Podemos, IU, Equo y el nuestru partíu, Izquierda Asturiana (IAS) ye una ferramienta necesaria p’afondar nesa crisis de réxime, en tanto que puede valir pa xenerar más contradicciones nel mesmu.

3º) Sicasí, somos conscientes de los riesgos d’esti proyectu. IAS lleva dende xineru del 2015 pidiendo n’Asturies una Unidá Popular de partíos y sectores pa baltar el réxime, dende un procesu de movilización ciudadana y dende la base. Esta coalición nun lo ye. Y nun lo ye por ser un alcuerdu de cúpules p’arreblagar pela llei electoral y intentar que nes Cortes españoles heba una presencia institucional mayor de la esquierda. Nun lo ye porque nun hubo primaries. Nun lo ye porque nun hubo programa participativu, namás un alcuerdu de mínimos que nun sirve de llínia de defensa real frente a la nueva ofensiva que s’acolumbra dende Bruxelles. Parte, eso sí, del reconocimientu de la soberanía de les organizaciones integraes. Poro, esto nun foi abondo pa qu’IAS aportare candidatos agora nes llistes electorales, y ye la razón pola que se renunció a ocupar los puestos que nos correspondíen.

4º) Ye amás un procesu fechu nuna clave centralista. IAS entiende que la especificidá asturiana merecía, y merez, un procesu propiu. Izquierda Asturiana nun igua col papel subalternu del PSOE qu’IU xuega na Xunta Xeneral, al contrario de Podemos, que fai una oposición clara (anque tovía nun pasó de la oposición a la propuesta). En cambiu, a nivel estatal UP-IU tien un componente más roturista qu’un Podemos qu’anda clamiando por gobernar col PSOE, contribuyendo asina a enterrar el discursu que tan bonos resultaos-y dio nel nuestru país. Nun ye razonable que se decida en Madrid l’orde de la llista asturiana al Congresu, como nun ye razonable que nel alcuerdu de mínimos se metan elementos contradictorios col programa d’UP-IU tan sensibles p’Asturies como’l fin del carbón, yá que, anque Izquierda Asturiana defenda la so eliminación progresiva, nun mos paez lóxico que se decida perriba d’una asamblea participativa onde nós propunximos… y perdimos.

5º) Entendemos que na actual coyuntura política ye fundamental torgar la posibilidá d’un nuevu gobiernu del PP y que, de dase esti, pudiera tener delantre una oposición d’esquierda fuerte. Llamentamos que l’alcuerdu de mínimos seya nesi sentíu tan sumamente floxu que nun entienda que la oposición a la moneda única, la OTAN o la defensa d’un procesu constituyente en clave republicana seyan claves p’amosar una alternativa real. Entendemos tamién que, neses condiciones, el compromisu col cambiu de los electos con estes premises tendría que ser quedase en votar una investidura alternativa al PP y defender nes Cortes un programa que recueya un procesu real de cambiu que desllexitime al Réxime.

6º) Perafitámonos en que ye más necesaria que nunca una organización republicana y socialista d’obediencia asturiana, que nun acepte un papel subalternu del nuestru país nel procesu de redefinición territorial que previsiblemente va abrise, y nun podemos compartir la estratexa d’aquellos sectores del asturianismu qu’acabaron fundiéndose en proyectos partidarios que dan por bono que les decisiones qu’afecten al nuestru pueblu se garren en Madrid.

7º) Vamos pidir el votu y fadrémos campaña activa pa XUNIOS PODEMOS, pero depués del 26 de xunu, seya’l que seya’l resultáu, IZQUIERDA ASTURIANA (IAS) va siguir apostando pola UNIDÁ POPULAR pa baltar el réxime y los marcos de dominación que torguen al nuestru pueblu. Siguimos y vamos siguir apostando por un proyectu de clase y asturianu.

 

 

Dirección Nacional d’IAS, a 26 de mayu del 2016

 

 

Los comentarios están cerrados.