Ía curiosu como la materia de Bretaña s’espardióu por tou la Europa continental espuéis de caltrir la lliteratura ya l’imaxinariu míticu de la vieya Islla de Bretaña. Asina, nel continente, escritores ya cortesanos, poetas ya xente del común garranon los feichos del Rei Arturo ya los sous nobles caballeros ya construyenon un paradigma de la lliteratura occidental. Inda más, un paradigma de la cultura occidental. Una suerte de canon col que describir mundos maravillosos nos que los homes son nobles, los nobles xenerosos ya arrogantes, las muyeres damas fuertes ya formosas ya la tierra vive ya sufre colos avatares d’aquellos que la sayan, d’aquellos que la riegan ya la cuchan. Ya tan eficaz como poderosu rescamplóu esi vraeiru sistema lliterariu, qu’a la hora de describir territorios, paisaxes ya mares, l’adxetivu celta remite con precisión a la borrina derroucándose de los montes escontra la mar; a cantiles nos que los refollones de la nortianda zurrian la herba, abangan los árboles; a viaxeiros abriendo con vagar la puerta d’una casa mentantu sutripan la roupa pa quitar l’augua del postrer bastiazu ou los faloupos de la nevarada que vei caendo na braña, ya según s’asientan nel escañu, a la vera la llariega, sienten dar la bienllegada con agasayu carnal ya, al empar que-ys apurren una escudiella col potaxe ou un cachu col ácedu vino del país ou una zapica cola sidra fresca de la cabeira llagarada, falan pacetiblemente de las miserias del mundu ya de la grandeza de l’amistá. Ya sentirán los aguyíos de los llobos viniendo del fondu de la nueche, cuando’l suañu invita a ufrir los pousos del auguardiente a la borra ya deixase añar pola alcordanza de la risa d’aquella rapaza de melota roxa qu’a lo cabeiru la danza aveirábase gayaspera col sol na mirada. Ya’l final volver. Volver a la patria, a los verdes praos onde’l vientu fila nos árboles l’harmonía toda del mundu, al valle onde la tierra tien el mesmu nome de la tierra: eillí, nel cantu arispiu de la peña dende la que s’acolumbra la mar, ya un poucu más lluenxe, la Verde Erín, ou las sableras blancas de la Cornubia, ou las rías escuras ya fondas de l’Armórica.

Trátase d’una suerte de resignificación d’un pallabra –celta--, que de la descripción ya connotación del extranxeiru nel cultu ya civilizáu mundu clásicu, transitóu los grebios ya tantiguantes mapas de la hestoria, l’arqueoloxía, l’arte ou la llingüística, ya arribóu a la lliteratura. Arribóu a la lliteratura dende las fazañas Gawain, Lanzelote ou la Reina Xinebra, pero col ecu potente de toula épica irlandesa ya galesa antigas retinxendo nas sous páxinas. Un ecu qu’axunta las voces de las periferias atlánticas: unas voces crepusculares que vienen dando cuenta de mundos que muerren en cuenta de seguir viviendo, escuendíos, amortagañaos nas engurrias de la hestoria.

Son las voces poderosas d’esos llugares onde acaba la tierra.