Cuadonga ye un llugar, ye ún d’esos omphalos, d’esos centros del mundu onde siempre emprima la hestoria. Porque Cuadonga ye una xeografía que –como afirmó nos años 70, metanes la Transición política, un daquella nombráu polígrafu rexonal—rique porque la hestoria traze na so orografía’l cursu fatal del destín. Con esti escenariu, nel que la xeoloxía fala como si d’una crónica haxiográfica se tratare, namás faltaben los personaxes. Y éstos aprucienon bien ceo. Porque la Cova Dominica –la cueva de la Señora—de la que ñaz el rigu Deva, que más pa contra’l monte llamen Orandi, tien horizonte habitacional, a lo menos, neolíticu. Y asina la continuidá de la presencia humana nel tiempu vei garrando perfiles más definíos, vei garrando nomes propios. Pero ye nel sieglu VIII cuando estos nomes marquen los fitos d’un mapa, que se volverá cuasimente definitivu, total, esllendante. Esi llugar nel que pola Providencia divina “los godos españoles salvanon Europa y la civilización cristiana de la fola musulmana”, continúa esconsonando cola so potencia simbólica. De “bierzu d’España” a “bierzu de la Monarquía” anguaño reinante, namás fexo falta enunciar un bucle hestóricu y asociar la semeya del Rei Borbón a la del Caudillu Pelayo. Y ye qu’en cualisquier mitu de los oríxenes, ye necesaria la continuidá, la presencia de la nación al marxe de los avatares de los tiempos, talamente como si una voluntá divina la caltuviere levitantdo sobre tierres y xentes. Poro, dende que’l primer xeógrafo latinu falare d’Hispania, la fuercia del nome –como si d’una plegaria se tratare--, apurrió sustancia y realidá, yá definitivamente inmutable, a España. Nesti simple, pero eficaz discursu, la esistencia d’otres dinámiques hestóriques nun ye tolerable, pues tolos acontecimientos son como l’anuncia feliz de la definitiva xunificación política de 1492, baxo’l piadosu reináu de los católicos Isabel y Fernando. Y ente esos acontecimientos, les revueltes ástures contra la conquista árabe nel sieglu VIII, namás algamen coherencia colo anterior si son consecuencia del caudillaxe godo, esi pueblu que garantizó la unidá d’España ente Roma y Castiella. Neso consiste’l cuadonguismu, y d’ehí la so efectividá como elementu lexitimador: Asturies esiste en tanto nun solo ye España, sinón l’orixe d’España.