| Unos
meses enantes de la Guerra Civil, na seronda
de 1935 surdía’l Partíu
Obreru d’Unificación Marsista,
más conocíu pol so acrósticu,
el POUM. Yera’l resultáu del
procesu de xunidá de dos organizaciones
enforma peculiares, la Izquierda Comunista
d’Andreu Nin y Juan Andrade, --disidente
con aquel Partíu Comunista de los
años trenta nel que la estalinización
afogaba la intelixencia, y entamaben a guariar
les zunes qu’enveredaríen al
desastre de los años noventa del
sieglu venti--, col Bloque Obreru y Campesín.
Esti postreru cuasimente hexemónicu
nel movimientu obreru de delles comarques
catalanes y del Levante, tenía en
Joaquín Maurín el dirixente
de más freba teórica ya intelectual,
y entendió, profética y solitariamente,
dende la isquierda revolucionaria la fondura
democrática de los procesos de construcción
nacional. Y si peculiares yeren les dos
organizaciones en sigo mesmes, non menos
lo foi’l resultáu de la suma
d’entrambes les dos. Porque’l
POUM foi la organización marsista
disidente más importante de la so
dómina, con un protagonismu nos aconteceres
de la Revolución española
que diba más alló de la so
implantación numbérica. L’esfuerciu
por entender racionalmente’l signo
de los tiempos, por anticipar les traxedies
futures, por esconxurar el xuiciu nel que
nos venales papeles de la hestoria conseñen
los vencedores, aquellos homes y muyeres
–col fusil entá fumeante al
llombu—dienon a estampa testos fundamentales
dende los qu’atalantar cómo
y porqué pasanon les coses.
Siempre
suañando en tomar el cielu por asaltu,
fonon hérues nel Madrid martir de
1936, soldaos de la Revolución nos
frentes d’Aragón, perseguíos
y torturaos por defender la dignidá
d’una República traicionada
nes llurigues estalinistes de la Barcelona
humillada de 1937, fonon guerrilleros y
resistentes na Europa rota y saqueada de
la II Guerra Mundial, y, esiliaos permanentes,
na so mirada llimpia estos ancianos caltienen
la verdá d’una dignidá
que fue quien a vivir y sobrevivir un tiempu
infame; esa mesma mirada qu’un xoven
escritor inglés tentó de tresmitir
y describir na so obra, escrita tovía
coles ferides de la metralla rompiendo la
carne y coles ferides de la derrota pingando
cruel en toes y cauna de les pallabres d’esi
“Homenaxe a Cataluña”
d’un tal George Orwell.
|
